Read Hmong Njua 1 Timautes 2 Bible Online

1 Timautes 2 - Hmong Njua bible

1 Timautes 2

¹Qhov tseemceeb kws kuv xaav kuas mej ua yog le nuav, mej yuavtsum thov Vaajtswv paab suavdlawg hab mej yuavtsum ua Vaajtswv tsaug.

²Kuv thov mej thov Vaajtswv paab cov vaajntxwv hab cov numtswv. Yog peb ua le ntawd, peb yuav tau nyob kaaj sab lug ua Vaajtswv teg num hab tau zoo ua peb lub neej kuas phim qhov kws peb yog cov ntseeg.

³Qhov nuav yog qhov zoo hab hum Vaajtswv tug kws yog peb tug Cawmseej lub sab.

⁴Vaajtswv xaav kuas tej tuabneeg suavdlawg nyag dlim nyag lub txim, hab xaav kuas puab paub qhov tseeb.

⁵Rua qhov yeej muaj tuab tug Vaajtswv xwb, hab muaj tuab tug nyob nruab nraab ua kuas tuabneeg hab Vaajtswv sis cuag tau. Tug ntawd yog Yexus Khetos tug kws lug yug ua tuabneeg.

⁶Nwg muab nwg txujsa lug theej suavdlawg lub txhoj, nwg ua le ntawd, yog nwg qha rua suavdlawg paub has tas, tub txug lub sijhawm kws Vaajtswv teem ca lawm has tas, Vaajtswv yuav paab kuas tuabneeg dlim tuabneeg lub txim.

⁷Yog le ntawd, Vaajtswv txhaj tsaa kuv ua ib tug timthawj hab ua xwbfwb qha Vaajtswv txujlug kws yog qhov tseeb rua lwm Tsaav Tuabneeg hab coj puab lug ntseeg Vaajtswv. Tej lug kws kuv has nuav kuv has tseeb xwb kuv tsi dlaag.

⁸Thaus cov tuabneeg tuaj nyob ua ke noog lug qhuab qha, tsi has huv lub nroog twg lossis lub zog twg, kuv xaav kuas cov txivneej thov Vaajtswv, cov ntawd yuavtsum yog cov kws muab sab rau ntseeg, tsi chim rua leejtwg, hab tsi nrug leejtwg sis caav sis tshe.

⁹Kuv xaav kuas txhua tug quaspuj paub txaajmuag. Nyag yuavtsum tu nyag lub cev tsi xob ca hlaab hle zaab hle zuav lossis naav tej tsoog tsho kws tsi tsimnyog naav; tsi xob ntxag plaubhau kuas txawv luas zej luas zog lossis tsi xob coj tej saw nyaj saw kub lossis naav tej tsoog tsho kws kim kim.

¹⁰Tabsis txhua tug quaspuj yuavtsum ua num zoo paab lwm tug, txhaj tsimnyog qhov kws puab has tas, puab yog cov ntseeg Vaajtswv.

¹¹Cov quaspuj yuavtsum nyob tuabywv ua tuab zoo noog lug qhuab qha.

¹²Kuv tsi pub cov quaspuj qha txivneej lossis tsaav fwjchim luj dlua cov txivneej. Cov quaspuj yuavtsum nyob tuabywv.

¹³Rua qhov Vaajtswv xub tsim Adaas maam le tsim Evas.

¹⁴Tsi yog dlaab Ntxwgnyoog lug ntxag Adaas, tabsis yog lug ntxag Evas, Evas txhaj ua txhum.

¹⁵Tabsis cov quaspuj yuav dlim, vim puab yug mivnyuas, yog has tas puab muab sab rau ntseeg, muaj lub sab hlub lwm tug hab ua hum Vaajtswv sab.