Read Hmong Njua 1 Timautes 3 Bible Online

1 Timautes 3 - Hmong Njua bible

1 Timautes 3

¹Muaj ib lu lug tseeb kws has le nuav: Yog leejtwg xaav ua tug thawj kws saib cov ntseeg, tug ntawd xaav ua teg num kws zoo kawg nkaus.

²Tug thawj kws saib cov ntseeg yuavtsum yog tug kws tsi muaj chaw thuam le. Nwg muaj tuab tug quaspuj xwb, nwg xyuam xwm, nwg tswj tau nwg lub sab, nwg paub cai, nwg nyam qhua hab nwg txawj qhuab qha.

³Nwg tsi yog tuabneeg quav cawv lossis tuabneeg sab heev, tabsis nwg muaj lub sab ntev, tsi nyam sis caav sis tshe, tsi ntshaw nyaj txag.

⁴Nwg txawj tswjfwm nwg tsev tuabneeg, hab qhuab ntuag nwg tej mivnyuas kuas puab fwm nwg hab noog nwg lug.

⁵Yog leejtwg tswj tsi tau nwg tsev tuabneeg, ces nwg yuav ua le caag saib tau cov ntseeg Vaajtswv.

⁶Tsi xob muab tug kws nyavnyuas lug ntseeg tshab tsaa ua tug kws saib cov ntseeg, nyob tsaam nwg khaavtheeb hab raug txim ib yaam le dlaab Ntxwgnyoog.

⁷Tug kws saib cov ntseeg yuavtsum yog tug kws cov tsi ntseeg Vaajtswv los puavleej fwm, nwg txhaj yuav tsi poob ntsejmuag hab tsi maag dlaab Ntxwgnyoog lub vuj hlua.

⁸Cov ntseeg kws paab ua Vaajtswv teg num los puab yuavtsum muaj tug cwjpwm zoo hab suavdlawg fwm, tsi ntau ncauj, tsi quav yeeb, tsi quav tshuaj, tsi quav cawv hab tsi ntshaw nyaj.

⁹Puab yuavtsum yog cov kws muaj lub sab ncaaj nceeg, muab sab npuab txujlug tseeb kws Vaajtswv tau qha rua suavdlawg lawm.

¹⁰Mej yuavtsum xub sim puab tsaiv, yog puab ua tau, mej maam le tsaa puab ua num.

¹¹Puab cov quaspuj yuavtsum ua zoo ib yaam le puab, cov quaspuj ntawd yuavtsum yog cov kws xyuam xwm, tsi nyam taug xaiv, hab txhua yaam kws puab ua, puab ua ncaaj.

¹²Tug ntseeg kws paab ua Vaajtswv teg num yuavtsum yog tug kws muaj tuab tug quaspuj xwb hab nwg tswj tau nwg tsev tuabneeg.

¹³Tug ntseeg kws paab ua Vaajtswv teg num, yog nwg ua nwg teg num zoo nwg yuav tau ntsejmuag hab nwg yuav muaj cuabkaav qha qhov kws peb nrug Yexus Khetos koom ib txujsa rua suavdlawg.

¹⁴Thaus kuv sau tsaab ntawv nuav tuaj rua koj, kuv xaav has tas, nyaj kuv yuav tau tuaj saib koj sai.

¹⁵Tabsis yog kuv tsi tau tuaj sai, tsaab ntawv nuav yuav qha rua koj paub has tas Vaajtswv tsev tuabneeg yuavtsum coj le caag. Vaajtswv tsev tuabneeg yog cov ntseeg Vaajtswv tug kws muaj sa nyob. Cov ntseeg ntawd yog tug ncej kws txawb Vaajtswv txujlug kws yog qhov tseeb.

¹⁶Txhua tug puavleej paub has tas, zaaj kws peb ntseeg yog zaaj kws tseemceeb kawg nkaus: Nwg lug yug ua tuabneeg, Vaaj Ntsujplig qha rua suavdlawg has tas, nwg yog tug kws ncaaj nceeg; Vaajtswv cov timtswv puavleej pum nwg, muaj tuabneeg qha nwg zaaj rua txhua tsaav tuabneeg, tej tuabneeg kws nyob txhua qhov huv nplajteb nuav lug ntseeg nwg, hab Vaajtswv coj nwg moog sau ntuj lawm.