Read Hmong Njua 1 Timautes 4 Bible Online

1 Timautes 4 - Hmong Njua bible

1 Timautes 4

¹Vaaj Ntsujplig qha tseeb has tas, yaav tom ntej yuav muaj qee leej tso Vaajtswv tseg. Puab yuav moog noog dlaab tej lug dlaag hab ua lawv le dlaab qha.

²Tej lug qha ntawd yog tej lug dlaag kws cov tuabneeg sab phem qha ntxag suavdlawg. Puab cov ntawd lub sab zoo le cov tuabneeg kws tuag lawd lub. Txawm yog puab ua txhum luj npaum le caag los puab tsi paub le.

³Cov tuabneeg ntawd qha has tas tsi xob sis yuav, hab has tas, tej khoom noj muaj qee yaam tsi xob noj, tabsis Vaajtswv yeej tsim tej ntawd rua tuabneeg noj. Cov tuabneeg kws paub Vaajtswv txujlug kws yog txuj tseeb, puab yuavtsum xub ua Vaajtswv tsaug tsaiv maam le noj.

⁴Ib puas tsaav yaam kws Vaajtswv tsim ca rua tuabneeg noj puavleej zoo huv tuabsi, tsi taag peb yuav caiv ib yaam dlaabtsi le. Peb yeej noj tau txhua yaam huv tuabsi, tabsis thaus peb yuav noj peb yuavtsum xub ua Vaajtswv tsaug tsaiv maam le noj.

⁵Rua qhov Vaajtswv txujlug hab qhov kws peb thov Vaajtswv foom koob moov tub ua rua tej ntawd zoo hab huv lawm.

⁶Yog koj qha tej nuav rua cov kwvtij kws ntseeg, suavdlawg yuav pum has tas koj yog Yexus Khetos tug tubkhai kws ua num zoo, rua qhov koj muab sab rau ntseeg hab coj lawv le txujlug tseeb kws koj tub kawm lug lawm.

⁷Koj tsi xob noog tej lug nruag kws suavdlawg naj nub has, tej ntawd tsi muaj qaabhau dlaabtsi hab tsi yog Vaajtswv zaaj, koj tsi xob noog tej ntawd. Koj yuavtsum ua koj lub neej kuas hum Vaajtswv sab txhaj zoo.

⁸Yog peb xyum dlha lossis xyum ua le nuav le u, yuav muaj nqes mivntsiv rua peb lub cev. Tabsis yog peb xyum ua lawv Vaajtswv txuj kevcai, peb lub neej yuav zoo heev, tsi has naj nub nua lossis yaav tom ntej.

⁹zaaj nuav yeej muaj tseeb tag, tsimnyog suavdlawg khaws coj.

¹⁰Yog le ntawd, peb txhaj le ua sab ntev tiv kev txomnyem hab rau sab ntso ua num, rua qhov peb ca sab rua Vaaajtswv tug kws muaj sa nyob kws yog tug Cawmseej. Qhov tseeb nwg yog cov ntseeg tug Cawmseej.

¹¹Koj yuavtsum qha tej nuav rua suavdlawg.

¹²Koj tsi xob pub leejtwg thuam has tas koj tseem hluas, tabsis koj yuavtsum ua koj lub neej rua cov ntseeg xyum, tsi has tej lug kws koj has, tej num kws koj ua, hlub lwm tug, muab sab rau ntseeg, hab ua tuabneeg zoo.

¹³Koj yuavtsum naj nub nyeem Vaajtswv txujlug rua suavdlawg noog, qhuab qha hab cob qha puab moog txug thaus kuv tuaj.

¹⁴Koj tsi xob tso lub tswvyim kws koj muaj tseg. Lub tswvyim ntawd yog lub kws thaus cov cev Vaajtswv lug has txug hab cov txwjlaug kws saib cov ntseeg tsaa teg thov Vaajtswv rua koj.

¹⁵Koj yuavtsum muab sab rau ua lawv le tej ntawd, suavdlawg txhaj yuav pum has tas koj teg num zoo zuj zug ntxiv.

¹⁶Koj yuavtsum ua tuab zoo saib, koj ua koj lub neej zoo le caag hab saib tej kws koj qha, koj qha le caag, koj yuavtsum ua lawv le tej ntawd, rua qhov tej ntawd yuav paab tau koj, hab paab tau cov tuabneeg kws noog koj qha kuas mej dlim mej lub txim.