Read Hmong Njua 1 Timautes 5 Bible Online

1 Timautes 5 - Hmong Njua bible

1 Timautes 5

¹Tsi xob tshev cov yawm laug, tabsis koj yuavtsum ua tuab zoo ntuag puab ib yaam le koj ntuag koj txiv. Cov kws hluas dlua koj, koj yuavtsum ntuag puab ib yaam le koj ntuag koj cov kwvtij.

²Koj ntuag cov pug laug ib yaam le koj ntuag koj nam, hab cov quaspuj kws tseem hluas, koj yuavtsum muaj lub sab ncaaj ntuag puab ib yaam le puab yog koj cov muam.

³Koj yuavtsum saib taug cov puj ntsuag kws tsi muaj leejtwg paab.

⁴Tabsis tug puj ntsuag kws muaj tub muaj ntxhais lossis muaj xeebntxwv, cov tub, cov ntxhais, hab cov xeebntxwv yuavtsum yug nwg, pauj nwg txaj ntsig txhaj hum Vaajtswv sab.

⁵Tug puj ntsuag kws tsi muaj leejtwg paab, nwg yeej ca sab rua Vaajtswv, hab naj nub naj mo thov Vaajtswv paab nwg tsi tseg tsi tu.

⁶Tabsis tug puj ntsuag kws nyam ua pleeg ua yi, txawm yog nwg tseem ua neej nyob los zoo le nwg tub tuag lawm.

⁷Koj yuavtsum qha zaaj nuav rua cov ntseeg, txhaj tsi muaj leejtwg thuam tau puab.

⁸Yog leejtwg tsi paab nwg kwv nwg tij hab nwg tsev tuabneeg, tug ntawd tsi xob has tas nwg yog tug ntseeg Vaajtswv. Yog nwg tsi paab nwg kwv nwg tij, ces nwg tseem phem heev dlua tug kws tsi ntseeg Vaajtswv hab.

⁹Koj tsi xob sau tug puj ntsuag kws noobnyoog tsi tau muaj rau caum xyoo rua huv phoo ntawv kws sau cov puj ntsuag tej npe. Tug puj ntsuag kws sau tau npe yog tug kws yuav tuab zag quasyawg xwb,

¹⁰hab yog tug kws suavdlawg qhuas has tas nwg ua num zoo, paab lwm tug. Nwg qha hab tu nwg cov mivnyuas, nwg nyam qhua, nwg ntxuav cov ntseeg kutaw, nwg paab cov tuabneeg txomnyem, hab nwg muab sab rau ua txhua yaam num zoo.

¹¹Tabsis koj tsi xob sau cov puj ntsuag kws tseem hluas tej npe rua huv phoo ntawv ntawd, rua qhov thaus puab xaav yuav quasyawg, puab yuav tso Yexus Khetos tseg hab moog yuav quasyawg.

¹²Puab ua le ntawd yog puab ua txhum, rua qhov puab tsi ua lawv le tej lug kws puab cog tseg rua Yexus Khetos lawm.

¹³Puab yuav moog xyub num taag nub hab moog cov zog rua qhov nuav qhov u. Tsi yog le ntawd xwb, puab tseem yuav xyum ua tuabneeg taug xaiv, ua tuabneeg thaab plaub hab has tej lug kws tsi tsimnyog has.

¹⁴Yog le ntawd kuv xaav kuas cov puj ntsuag kws tseem hluas rov qaab yuav quasyawg muaj tub muaj ki hab tu vaaj tu tsev. Yog puab ua le ntawd, cov tuabneeg kws ntxub peb cov kws ntseeg txhaj yuav tsi muaj lug thuam tau peb.

¹⁵Kuv has le nuav, rua qhov cov puj ntsuag muaj qee leej tso Vaajtswv tseg, hab puab nrug dlaab Ntxwgnyoog moog lawm.

¹⁶Yog has tas tug quaspuj kws ntseeg Vaajtswv, muaj ib tug puj ntsuag nyob huv nwg tsev, nwg yuavtsum paab, tsi xob muab teg num ntawd tso rua cov ntseeg. Ca cov ntseeg paab cov puj ntsuag kws tsi muaj leejtwg paab xwb.

¹⁷Tsimnyog muab nqe zug ob npaug rua cov txwjlaug kws ua num zoo, tabsis tsimnyog muab nqe zug ntau dlua rua cov kws qhuab qha hab cob qha.

¹⁸Rua qhov Vaajtswv txujlug has tas, “Thaus mej muab nyuj tsuj nplej huv lub tshaav nplej, mej tsi xob muab naab looj nyuj qhovncauj.” hab “Tsimnyog tug kws ua num tau nqe zug.”

¹⁹Yog leejtwg laam nkaug has tas cov txwjlaug ib tug twg ua txhum, yog tsi muaj ob leeg lossis peb leeg ua timkhawv has tas tug ntawd tau ua txhum tag, koj tsi xob rawm ntseeg.

²⁰Yog leejtwg ua txhum, koj yuavtsum ntuag tug ntawd taabmeeg suavdlawg kuas lwm tug txhaj ntshai.

²¹Timautes, koj yuavtsum ua lawv le tej lug kws kuv qha rua koj nuav, koj tsi xob xaiv leejtwg ntsejmuag. Txhua yaam kws koj ua, koj yuavtsum ua rua suavdlawg ib yaam nkaus. Tej lug kws kuv qha koj nuav, tug Tswv Yexus Khetos hab cov timtswv ceebtsheej kws Vaajtswv tub xaiv ca lawd puavleej paub huv tuabsi.

²²Koj tsi xob maaj tsaa leejtwg ua Vaajtswv teg num, koj yuavtsum ua tuab zoo saib nwg tsaiv, nyob tsaam koj tau ris nwg tej kev txhum. Koj yuavtsum ua koj lub neej kuas zoo kawg nkaus.

²³Koj tsi xob haus dlej xwb, tabsis koj yuavtsum haus mivntsiv cawv txiv maab, koj lub plaab txhaj tsi mob lawm.

²⁴Muaj ibtxha tuabneeg ua txhum mas paub taamsim hab qhov txhum ntawd yuav ua rua puab raug txim. Tabsis muaj ibtxha ua txhum mas tom qaab ntawd suavdlawg maam le paub.

²⁵Ib yaam nkaus le ntawd, cov tuabneeg kws ua zoo, suavdlawg yeej yuav pum puab teg num. Txawm yog cov tuabneeg kws tsi ua rua suavdlawg pum los puab yeej npog tsi tau tej num zoo kws puab ua.