Read Hmong Njua 1 Timautes 6 Bible Online

1 Timautes 6 - Hmong Njua bible

1 Timautes 6

¹Cov kws ua tubqhe nyag yuavtsum fwm nyag tug tswv, txhaj tsi muaj leejtwg thuam Vaajtswv lub npe hab thuam tej lug kws peb qha.

²Cov tubqhe kws tug tswv yog tug ntseeg, nyag yuavtsum fwm nyag tug tswv, rua qhov suavdlawg puavleej yog kwvtij ntseeg, puab hajyam yuavtsum ua tug tswv teg num zoo, rua qhov teg num ntawd yuav paab tau cov ntseeg kws puab hlub. Koj yuavtsum naj nub qha hab ntuag kuas suavdlawg ncu ntsoov tej nuav.

³Yog leejtwg qha tej zaaj kws txawv zaaj nuav, hab qha tsi lawv le peb tug Tswv Yexus Khetos qha, hab qha tsi lawv le Vaajtswv txuj kevcai,

⁴tug ntawd laam khaavtheeb xwb, nwg yeej tsi paub dlaabtsi le, nwg nyam sis caav sis tshe txug tej zaaj kws tsi muaj hauvpaug hauvntsis. Qhov kws nwg sis caav sis tshe ntawd, yuav ua rua ib tug ntxub ib tug, ib tug tshev ib tug, ib tug thuam ib tug, hab ib tug tsi ca sab rua ib tug.

⁵Cov tuabneeg kws naj nub sis caav sis tshe, puab zoo le cov tuabneeg ruag, txawm yog puab has lug phem lug zoo los puab tsi paub. Puab xaav has tas yog puab lug ntseeg Vaajtswv, puab yuav npluanuj.

⁶Tseeb tag, tug ntseeg kws txaus sab rua tej kws nwg muaj lawm txhaj yog tug npluanuj tag.

⁷Thaus peb nam peb txiv yug peb lug, peb yeej tsi coj ib yaam dlaabtsi lug. Thaus peb tuag peb yeej yuav coj tsi tau ib yaam dlaabtsi moog hab.

⁸Yog le ntawd, yog peb muaj noj muaj naav lawm, peb ca le txaus sab rua tej ntawd xwb.

⁹Tabsis cov tuabneeg kws xaav npluanuj, dlaab yuav ntxag tau puab maag dlaab lub vuj hlua, puab yuav laam tau laam ua phem hab ua tej kws yuav ua rua puab raug kev puamtsuaj.

¹⁰Qhov kws tuabneeg ntshaw nyaj txag yog ib qhov kws ua rua tuabneeg ua txhua yaam phem. Muaj qee leej tso Vaajtswv tseg lawm, hab puab rov ua rua puab raug ntau yaam kev txomnyem, tub yog vim puab xaav tau nyaj ntau heev.

¹¹Tabsis koj yog Vaajtswv tug tuabneeg lawm, koj tsi xob ua tej kws has taag lug nuav. Koj yuavtsum ua ncaaj ua nceeg, ua zoo, muab sab rau ntseeg, muaj kev hlub, ua sab ntev, hab muaj lub sab mog sab muas.

¹²Txujkev ntseeg pev ib yaam le tuabneeg sis tw dlha. Koj yuavtsum siv zug dlha kuas kawg koj tug zug, koj txhaj le tau txujsa kws ntev moog ibtxhis kws Vaajtswv hu koj lug yuav, rua qhov koj tub leeg taabmeeg rua ntau leej,

¹³hab taabmeeg Vaajtswv tug kws pub txujsa rua ib puas tsaav yaam hab taabmeeg Yexus Khetos tug kws muaj txujkev ntseeg sawv khov kho ntawm Pooti-us Philaj lub xubndlag.

¹⁴Kuv has kuas koj ua lawv le tej lug ntawd hab muab sab npuab tug Tswv moog txug Nub kws tug Tswv Yexus Khetos rov qaab lug.

¹⁵Tug Tswv Yexus yuav lug lawv le lub sijhawm kws Vaajtswv teem ca lawm. Vaajtswv yog tug foom koob moov, yog tug kaav ib puas tsaav yaam, hab yog tug Vaajntxwv ntawm txhua tug vaajntxwv hab yog tug Tswv ntawm txhua tug tswv huv tuabsi.

¹⁶Vaajtswv tuab leeg yog tug kws tsi txawj tuag, nwg nyob huv qhov pum kev kws tsi muaj leejtwg yuav txaav tau moog ti. Tsi tau muaj leejtwg pum dlua nwg hab tsi muaj leejtwg yuav pum tau nwg le. Nwg yog tug kws tsimnyog fwm hab muaj fwjchim nyob moog ibtxhis! Amees.

¹⁷Koj has kuas cov tuabneeg npluanuj tsi xob khaavtheeb, tsi xob ca sab rua puab tej nyaj txag hab qhov txhua chaw, rua qhov tej ntawd yuav pluj moog, tabsis kuas puab ca sab rua Vaajtswv tug kws muaj sab dlawb sab zoo hab pub txhua yaam rua peb, kuas peb muaj kev zoo sab.

¹⁸Koj has kuas puab muaj lub sab dlawb paug rua txhua yaam num zoo, ua tuabneeg muaj sab dlawb sab zoo hab muab tej kws puab muaj faib rua lwm tug.

¹⁹Yog puab ua le ntawd, ces yog puab npaaj qhov txhua chaw tseg rua puab yaav tom ntej, kuas puab tau txujsa kws tsi txawj pluj moog ibtxhis lug ua puab tug.

²⁰Timautes, koj khaws tej kws kuv qha rua koj lawm ca zoo zoo. Koj tsi xob nrug luas sis caav sis tshe txug tej lug kws tsi muaj qaabhau, ib yaam le tej tuabneeg ruag. Muaj qee leej xaav has tas yog “Kev txawj ntse.”

²¹Rua qhov muaj ibtxha xaav has tas, puab muaj kev txawj ntse, vim puab khaav le ntawd, puab txhaj tso txujkev ntseeg tseg lawm. Thov Vaajtswv foom koob moov rua mej suavdlawg.