Read Hmong Njua 2 Timautes 1 Bible Online

2 Timautes 1 - Hmong Njua bible

2 Timautes 1

¹Kuv yog Paulus tug kws yog Yexus Khetos ib tug timthawj lawv le Vaajtswv lub sab nyam, Vaajtswv khaiv kuv moog qha Txujmoo Zoo kws Vaajtswv tau coglug tseg has tas, tug kws nrug Yexus Khetos sis raug zoo yuav tau txujsa.

²Timautes tug tub kws kuv hlub: Thov Vaajtswv tug kws yog peb leej Txiv hab peb tug Tswv Yexus Khetos foom koob moov rua koj hab paab kuas koj tau nyob kaaj sab lug.

³Timautes, kuv yog tug kws muab sab rau ua Vaajtswv teg num ib yaam le kuv cov yawmkoob ibtxwm ua lug lawm, txhua zag kws kuv thov Vaajtswv paab koj, tsi has nruab nub lossis mo ntuj, kuv yeej ncu ntsoov ua Vaajtswv tsaug.

⁴Kuv tseem ncu ntsoov thaus wb yuav sis ncaim, koj quaj quaj. Nwgnuav kuv ncu koj hab xaav pum koj heev. Yog kuv pum koj lawm, yuav zoo kuv sab kawg le.

⁵Kuv ncu ntsoov has tas, koj muab sab rau ntseeg ib yaam le koj puj Lu-is, hab koj nam Yaunikes. Nwgnuav kuv ca sab has tas, koj tseem muab sab rau ntseeg,

⁶kuv txhaj has rua koj has tas, koj yuavtsum siv lub tswvyim kws Vaajtswv pub rua koj thaus kuv tsaa teg rua koj, hab xaa koj moog ua num.

⁷Rua qhov tug Ntsujplig kws Vaajtswv pub rua peb, yeej xaav kuas peb muaj lub sab tawv. Nwg yuav ua num rua huv peb lub sab kuas peb muaj fwjchim, hab muaj lub sab hlub lwm tug, hab kuas peb paub tswj peb lub sab.

⁸Koj tsi xob txaajmuag ua timkhawv txug peb tug Tswv zaaj, hab tsi xob txaajmuag rua qhov kws kuv raug kaw rua huv tsev lojcuj. Kuv raug kaw le nuav tub yog vim kuv ua Yexus Khetos teg num. Koj yuavtsum ua sab ntev qha Txujmoo Zoo, txawm yog koj raug kev txomnyem npaum le caag los Vaajtswv yeej yuav txhawb koj tug zug kuas koj ua tau.

⁹Vaajtswv zaam txim rua peb, hab nwg xaiv peb lug ua nwg tsaav tuabneeg, nwg ua le ntawd yog nwg hlub peb, hab yog nwg pum zoo ua, tsi yog vim peb ua num zoo. Thaus tseem tsi tau tsim ntuj tsim teb, Vaajtswv tub xub xaav tseg lawm has tas, nwg yuav muab txuj koob moov ntawd rua peb txhua tug kws ntseeg Yexus Khetos lawm.

¹⁰Nwgnuav peb tub pum txuj koob moov ntawd, rua qhov Yexus Khetos tug kws yog peb tug Cawmseej tub lug yug rua huv nplajteb nuav lawm. Nwg rhuav txujkev tuag lub fwjchim hab nwg qha Txujmoo Zoo rua peb, peb txhaj paub has tas muaj txujsa kws ntev dlhawv moog ibtxhis.

¹¹Vaajtswv tsaa kuv ua ib tug timthawj hab ua ib tug xwbfwb moog qha Txujmoo Zoo,

¹²yog le ntawd, kuv txhaj raug kev txomnyem le nuav. Txawm le ntawd los kuv tsi txaajmuag rua leejtwg le, rua qhov kuv paub has tas tug kws kuv ca sab rua yog tug kws muaj fwjchim. Hab kuv paub has tas, nwg yeej yuav tsomkwm tej kws nwg muab tso rua kuv lawm moog txug nub kws Yexus rov qaab lug.

¹³Koj yuavtsum muab tej lug tseeb kws kuv qha rua koj lawm lug ua yaam ntxwv coj hab muab sab rau ntseeg, hab hlub lwm tug. Rua qhov Vaajtswv xaav kuas peb txhua tug kws nrug Yexus Khetos sis raug zoo lawm muaj lub sab zoo le ntawd.

¹⁴koj yuavtsum saib tej kws Vaajtswv muab tso rua koj lawm zoo zoo, tsi xob pub pluj le. Vaaj Ntsujplig tug Dlawbhuv kws nyob huv peb txhua tug lub sab yuav paab koj saib tej ntawd.

¹⁵Koj tub paub lawm has tas, cov tuabneeg kws nyob huv xeev Axias Yau, tau tso kuv tseg lawm. Cov tuabneeg ntawd muaj ib tug hu ua Finkelus hab ib tug hu ua Hemaunkenes.

¹⁶Kuv thov Vaajtswv hlub Aunexifaulus tsev tuabneeg, rua qhov nwg txhawb kuv tug zug ntau zag lug lawm. Nwg tsi txaajmuag rua qhov kws kuv raug kaw rua huv tsev lojcuj le.

¹⁷Thaus nwg tuaj txug huv lub nroog Loos, nwg kub sab lug nrhav kuv rua txhua qhov, nwg txhaj le nrhav tau kuv. Koj tub paub lawm has tas, thaus kuv tseem nyob huv lub nroog Efexus, nwg tau paab kuv ntau yaam.

¹⁸Kuv thov Vaajtswv has tas thaus txug nub Vaajtswv txav txim, thov Vaajtswv hlub nwg hab.