Read Hmong Njua 2 Timautes 3 Bible Online

2 Timautes 3 - Hmong Njua bible

2 Timautes 3

¹Koj yuavtsum ncu ntsoov has tas thaus lub sijhawm kws nplajteb yuav kawg, yuav muaj kev ntxhuv sab heev,

²rua qhov tej tuabneeg nyag yuav xaav txug nyag xwb, puab yuav xaav tsi txug lwm tug le. Puab yuav ntshaw nyaj txag, yuav khaavtheeb, yuav muab hlub, hab yuav tsi noog nam txiv lug, tsi ris luas txaj ntsig, hab saib tsi taug Vaajtswv txuj kevcai.

³Puab yuav tsi sis hlub, tsi zaam txim rua lwm tug, nyam taug xaiv, Puab tsi tswj puab lub sab, ua tuabneeg tsiv tsaim hab tsi nyam ua zoo,

⁴ua tuabneeg ntxeev sab, sab heev, hab puab saib puab tsimtxaj dlua lwm tug. Puab nyam kev lomzem heev dlua nyam Vaajtswv.

⁵Puab yuav has tas, puab yog cov kws ntseeg Vaajtswv. Tabsis puab yeej tsi ua lawv le Vaajtswv txuj kevcai. Koj tsi xob nrug cov tuabneeg kws zoo le ntawd ua ke hlo le.

⁶Cov tuabneeg ntawd muaj qee leej pheej moog huv luas tej tsev, moog ntxag tej quaspuj kws tsi tshua muaj tswvyim kws pheej nyuaj sab rua puab tej kev txhum hab xaav ua phem.

⁷Cov quaspuj ntawd naj nub kawm, tabsis puab tsi paub has tas, lub ntsab lug yog le caag tag.

⁸Cov tuabneeg kws moog ntxag cov quaspuj ntawd, puab tawmtsaam Vaajtswv txujlug ib yaam le thaus u Yaanes hab Yaanpeles obtug tawmtsaam Mauxes. Puab lub sab ruag hab puab tsi ntseeg Vaajtswv lawm.

⁹Puab ua tsi tau num ntxiv lawm, rua qhov suavdlawg pum has tas puab ruag ib yaam le Yaanes hab Yaanpeles.

¹⁰Timautes, koj tub ua lawv le kuv tej lug qha hab ua lawv le tej kws koj pum kuv ua lawm, hab ua lawv le tej kws kuv xaav tseg lawm has tas kuv yuav ua. Koj yeej paub has tas kuv muab sab rau ntseeg, muaj lub sab ntev, hlub lwm tug, ua sab ntev tiv kev

¹¹tsimtxom hab kev txomnyem. Koj tub paub txhua yaam kws kuv raug huv lub nroog Aati-aukias, huv lub nroog Ikauni-us, hab huv lub nroog Lixathas lawm. Txawm yog kuv raug kev tsimtxom heev npaum le ntawd los kuv tseem ua sab ntev tiv tej ntawd. Tabsis qhov kws kuv dlim tej ntawd, tub yog peb tug Tswv Yexus paab kuv, kuv txhaj dlim.

¹²Cov ntseeg Yexus Khetos txhua tug kws xaav ua lub neej kuas Vaajtswv tau ntsejmuag, puab yeej yuav raug kev tsimtxom.

¹³Tabsis cov tuabneeg kws ua phem hab cov tuabneeg kws dlaag ntxag lwm tug, puab tseem yuav ua phem heev zuj zug. Txawm yog puab moog dlaag ntxag lwm tug los puab tub tsi paub has tas lwm tug tub dlaag ntxag puab lawm hab.

¹⁴Tabsis koj tsi xob ua le puab. Koj yuavtsum ua lawv le Vaajtswv txujlug kws koj tau kawm hab ca sab rua lawm. Rua qhov koj yeej paub has tas cov tuabneeg kws qha koj, puab yeej tsi dlaag koj ib zag le.

¹⁵Hab koj yeej paub has tas txij thaus koj tseem yau, koj yeej kawm Vaajtswv txujlug lug lawm. Vaajtswv txujlug paab tau kuas tug kws kawm muaj tswvyim, hab yog nwg lug ntseeg Yexus Khetos, nwg yuav dlim nwg lub txim.

¹⁶Vaajtswv txujlug txhua zaaj puavleej yog Vaajtswv tshoov tuabneeg lub sab kuas tuabneeg sau. Vaajtswv txujlug yog txuj kws qha qhov tseeb, qhuab ntuag tug kws ua txhum, paab tau tug kws ua txhum, hab qha kuas suavdlawg paub ua lub neej ncaaj nceeg.

¹⁷Vaajtswv txujlug qha le ntawd, kuas tug kws ua Vaajtswv teg num txhaj paub txhij, hab txawj ua txhua yaam num zoo.