Read Hmong Njua 2 Timautes 4 Bible Online

2 Timautes 4 - Hmong Njua bible

2 Timautes 4

¹Timautes, tej lug kws kuv has rua koj nuav, Vaajtswv hab Yexus Khetos kws yuav lug txav txim rua cov tuabneeg caj hab cov tuabneeg tuag yeej paub huv tuabsi. Kuv qha le nuav rua koj, rua qhov Yexus yuav lug, hab nwg yuav kaav lub qaab ntuj nuav.

²Koj yuavtsum muab sab rau qha Vaajtswv txujlug, tsi has lub sijhawm twg los koj yuavtsum qha. Koj yuavtsum ua sab ntev qhuab ntuag suavdlawg, yum suavdlawg lug ntseeg hab txhawb suavdlawg tug zug.

³Rua qhov tshuav tsi ntev, yuav tsi muaj tuabneeg xaav noog Vaajtswv txujlug lawm. Puab yuav ua lawv le puab lub sab nyam xwb, hab puab yuav moog nrhav ntau tug xwbfwb lug qha tej zaaj kws suavdlawg nyam noog.

⁴Puab yuav tsi nyam noog Vaajtswv txujlug lawm. Puab tsuas nyam noog tej lug nruag xwb.

⁵Tabsis koj tsi xob ua le puab. Koj yuavtsum tswj koj lub sab txhua lub sijhawm, ua sab ntev nyaj tej kev txomnyem moog qha Txujmoo Zoo, hab muab sab rau ua txhua yaam num kws Vaajtswv muab rua koj ua lawm kuas tav.

⁶Timautes, nwgnuav kuv zoo ib yaam le tej khoom kws luas tub muab tso rua sau lub rooj yuav muab hlawv fij rua Vaajtswv lawm. Tub txug lub sijhawm kws kuv yuav tso lub nplajteb tseg.

⁷Kuv tub siv zug dlha kawg kuv tug zug lawm, kuv tub dlha moog txug qhov kawg lawm. Kuv muab sab npuab Vaajtswv.

⁸Nwgnuav kuv yuav tau nqe zug. tej nqe zug ntawd yog tej kws Vaajtswv khaws tseg rua cov tuabneeg ncaaj nceeg. Thaus txug nub ntawd tug Tswv kws txav txim ncaaj nceeg lug, nwg yuav muab pub rua kuv. Tsi yog pub rua kuv tuab leeg xwb, tabsis nwg yuav pub rua txhua tug kws tog ntsoov nub kws Yexus rov qaab lug.

⁹Koj ca le tuaj saib kuv sai sai.

¹⁰Rua qhov Demas qaug rua tej khoom huv lub nplajteb nuav lawm. Nwg tso kuv tseg, nwg tsiv moog tim lub nroog Thexalaunikes lawm. Kelexes moog rua tim lub xeev Kalatias, hab Titus moog rua tim lub nroog Dalematias lawm.

¹¹Tsuas tshuav Lukas tuab leeg nrug kuv nyob xwb, koj ca le moog coj Malakaus nrug koj tuaj, rua qhov kuv xaav kuas nwg paab kuv ua num.

¹²Kuv khaiv Tikhikus moog rua tim lub nroog Efexus lawm.

¹³Thaus koj tuaj, thov koj paab nqaa kuv lub tsho ntev kws kuv tso rua huv Kalepus tsev peg lub nroog Rhau-as, hab nqaa kuv cov ntawv tuaj rua kuv. Tshwjxeeb yog nqaa tsi taag, koj nqaa cov kws sau rua huv tej tawv.

¹⁴Alexaades kws yog tug kws nchuav tooj lab, nwg ua phem kawg le rua kuv, Vaajtswv yuav rau txim rua nwg kuas txaus nkaus tej kws nwg tau ua rua kuv lawm.

¹⁵Koj yuavtsum ceevfaaj zoo, rua qhov tug ntawd yog tug kws pheej tawmtsaam tej kws peb qha.

¹⁶Thawj zag kws kuv has dlaws kuv zaaj, tsi muaj leejtwg paab kuv, suavdlawg puavleej tso kuv tseg. Thov Vaajtswv zaam txim rua puab.

¹⁷Tabsis Vaajtswv nrug nraim kuv hab nwg txhawb kuv tug zug, kuv txhaj muaj zug moog qha Vaajtswv txujlug rua lwm Tsaav Tuabneeg. Vaajtswv paab kuv dlim kev tuag ib yaam le dlim huv tsuv ntxhuav lub qhovncauj lug.

¹⁸Vaajtswv yuav paab kuv kuas dlim txhua yaam kev phem, hab nwg yuav coj kuv kev moog txug sau ntuj ceebtsheej. Thov kuas Vaajtswv tau koob meej moog ibtxhis le. Amees.

¹⁹Thov koj has noj qaab nyob zoo rua Paxilas hab Akilas, hab Aunexifaulus tsev tuabneeg.

²⁰Elatus nyob tim lub nroog Kauleethaus, tabsis kuv tso Taufimus rua tim lub nroog Miletus lawm, rua qhov nwg mob.

²¹Kuv xaav kuas koj tuaj thaus tseem tsi tau txug lub caij ntuj no. Enpulus, Pudees, Linus, hab Kelaudias has noj qaab nyob zoo rua koj, hab cov kwvtij ntseeg suavdlawg has noj qaab nyob zoo rua koj hab.

²²Thov Vaajtswv nrug nraim koj hab foom koob moov rua mej suavdlawg.