Read Hmong Njua Titus 1 Bible Online

Titus 1 - Hmong Njua bible

Titus 1

¹Kuv yog Paulus kws yog Vaajtswv tug tubkhai hab yog Yexus Khetos tug timthawj. Vaajtswv xaiv kuv hab khaiv kuv moog paab cov tuabneeg kws Vaajtswv tau xaiv ca lawm, hab qha kuas puab paub txujlug tseeb kws peb ntseeg,

²puab txhaj yuav tau txujsa ntev dlhawv moog ibtxhis. Thaus kws tsi tau tsim lub nplajteb, Vaajtswv coglug tseg has tas, nwg yuav pub txujsa ntawd rua peb, nwg has le ntawd, nwg yeej tsi dlaag le.

³Thaus txug lub sijhawm kws Vaajtswv teem ca lawm, Vaajtswv qha zaaj nuav rua peb. Vaajtswv tug kws yog peb tug Cawmseej, nwg muab zaaj nuav tso rua kuv, hab kuas kuv coj moog qha rua suavdlawg.

⁴Titus, kuv sau tsaab ntawv nuav xaa tuaj rua koj tug kws yog kuv tug tub, rua qhov wb ntseeg ib yaam nkaus. Thov Vaajtswv tug kws yog peb leej Txiv hab Yexus Khetos tug kws yog peb tug Cawmseej foom koob moov rua koj hab paab kuas koj muaj kev kaaj sab lug.

⁵Thaus kuv ca koj nyob huv koog Povtxwv Keletes, kuv xaav kuas koj ua teg num kws peb tseem ua tsi tau taag ntawd kuas tav, hab huv txhua lub nroog kws muaj cov ntseeg nyob, kuv xaav kuas koj moog tsaa ib cov txwjlaug saib puab. Koj yuavtsum ncu ntsoov tej lug kws kuv tub qha rua koj lawm:

⁶tug txwjlaug yuavtsum yog tug kws ua lub neej zoo kws tsi muaj leejtwg thuam le; nwg muaj ib tug quaspuj xwb, nwg cov mivnyuas yuavtsum yog cov kws ntseeg Vaajtswv hab yog cov kws tsi muaj leejtwg thuam has tas yog tuabneeg lajlees hab tawv ncauj.

⁷Tug thawjcoj kws saib Vaajtswv teg num huv pawg ntseeg, yuavtsum yog tug kws tsi tau ua ib yaam dlaabtsi rua luas thuam le. Nwg tsi khaavtheeb, tsi chim sai, tsi quav cawv, tsi muaj lub sab heev hab tsi ntshaw luas tug;

⁸tabsis nwg nyam qhua, nyam qhov zoo, nwg tswj tau nwg lub sab, nwg ua ncaaj nceeg, nwg ua lub neej dlawbhuv hab xyum ua lub neej zoo.

⁹Nwg yuavtsum muab sab npuab Vaajtswv tej lug kws nwg tub kawm lug lawm. Yog nwg ua le ntawd, tej lug kws nwg qha yuav txhawb tau cov kws noog tug zug, hab yuav muab cov tuabneeg kws tawmtsaam tej lug has txhum nthuav rua suavdlawg paub.

¹⁰Rua qhov muaj coob leej ua tuabneeg ntxeev sab hab has tej lug tsi muaj qaabhau ntxag lwm tug kuas yuam kev, cov tuabneeg kws has le ntawd, cov coob yog cov Yudais kws ua kevcai txav.

¹¹Koj yuavtsum txwv tsi xob pub puab qha le ntawd, rua qhov puab qha tej zaaj kws tsi tsimnyog ua rua txhua tsev tuabneeg muaj kev kub ntxhuv. Puab qha le ntawd tub yog puab ntxag suavdlawg tej nyaj yuav xwb.

¹²Muaj ib tug xwbfwb kws yog tuabneeg Kaletes, nwg qha has tas, “Cov tuabneeg Kaletes puavleej yog tuabneeg dlaag, ua nruj ua tsiv ib yaam le tej tsaj hab yog tuabneeg tubnkeeg kws noj ntau.”

¹³Yeej muaj lawv le tej lug kws tug ntawd has tag. Yog le ntawd koj yuavtsum ntuag puab, puab txhaj yuav muaj kev ntseeg ruaj,

¹⁴puab txhaj yuav tsi naj nub moog noog tej lug nruag kws cov Yudais has, hab tsi moog noog tej zaaj kws tuabneeg lub tswvyim xaav. Cov tuabneeg kws qha tej zaaj ntawd, puab yeej tsi kaam ua lawv le txujlug tseeb.

¹⁵Cov tuabneeg kws muaj lub sab dlawb sab zoo, puab saib yaam twg los puavleej yog yaam kws zoo; tabsis cov tuabneeg sab phem hab tsi ca sab rua Vaajtswv, tej kws puab saib tsi muaj ib yaam kws puab yuav has tas yog yaam kws zoo, rua qhov puab lub sab hab tej kws puab xaav huv puab lub sab yeej phem.

¹⁶Puab has tas puab yog cov kws paub Vaajtswv, tabsis puab tsi ua puab lub neej zoo le cov kws paub Vaajtswv ua, puab yog tuabneeg sab phem hab tsi noog leejtwg lug. Koj tsi xob muab ib teg num tseemceeb tso rua cov tuabneeg ntawd ua hlo le, rua qhov puab yeej ua tsi tau.