Read Hmong Njua Titus 2 Bible Online

Titus 2 - Hmong Njua bible

Titus 2

¹Titus, koj yuavtsum qha lawv le tej zaaj tseemceeb kws yog txujkev ntseeg.

²Koj yuavtsum ntuag cov yawm laug kuas puab ua tuabneeg xyuam xwm, coj cai hab paub tswj puab lub sab; kuas puab muab sab rau ntseeg, muaj lub sab hlub hab ua sab ntev.

³Koj yuavtsum qha cov pug laug ib yaam nkaus, kuas puab yuavtsum ua puab lub neej dlawbhuv rua Vaajtswv tau ntsejmuag. Puab tsi xob ua tuabneeg taug xaiv lossis ua tuabneeg quav cawv. Puab yuavtsum qha tej zaaj kws zoo rua cov quaspuj hluas,

⁴cov quaspuj hluas txhaj paub hlub puab cov quasyawg hab puab cov mivnyuas,

⁵hab qha puab kuas puab paub tswj puab lub sab, ua tuabneeg dlawbhuv, nquag tu vaaj tu tsev, ua sab dlawb sab zoo hab noog puab cov quasyawg lug, txhaj yuav tsi muaj leejtwg thuam Vaajtswv txujlug.

⁶Koj yuavtsum qha cov tub hluas ib yaam nkaus, kuas puab paub tswj puab lub sab.

⁷Koj yuavtsum ua txhua yaam num zoo rua puab xyum. Thaus koj qha Vaajtswv txujlug koj yuavtsum ua tuab zoo qha tag tag.

⁸Koj yuavtsum has tej lug zoo xwb, lwm tug txhaj yuav tsi muaj lug thuam tau koj. Cov tuabneeg kws ntxub koj, puab yuav txaajmuag, rua qhov puab yuav tsi muaj ib lu lug thuam peb cov ntseeg.

⁹Koj yuavtsum qha cov tubqhe kuas puab nyag noog nyag tug tswv lug, hab ua txhua yaam kuas hum tug tswv sab tsi xob caav ncauj,

¹⁰hab tsi xob qee tug tswv tug. Puab yuavtsum ua puab lub neej rua suavdlawg pum has tas, puab yog cov tubqhe kws ncaaj nceeg. Yog puab ua le ntawd, suavdlawg yuav saib taug Vaajtswv tug kws yog peb tug Cawmseej tej lug qha.

¹¹Rua qhov Vaajtswv tub qha txujkev dlim txim kws nwg pub dlawb dlawb rua suavdlawg rua peb paub lawm.

¹²Vaajtswv ua le ntawd, tub yog nwg xaav kuas peb noog nwg lug, hab tso peb tej kev phem kev qas tseg, hab kuas peb paub tswj peb lub sab, ua tau tuabneeg ncaaj nceeg hab ua peb lub neej kuas Vaajtswv tau ntsejmuag,

¹³Rua qhov peb taabtom ca sab ntsoov tog nub kws Yexus Khetos tug kws yog peb tug Cawmseej rov qaab lug. Nwg yog tug Vaajtswv kws muaj fwjchim luj kawg nkaus.

¹⁴Yexus Khetos tau muab nwg txujsa lug txhwv peb kuas peb dlim txhua yaam kev phem, hab paab peb txhua tug kws nwg tau xaiv ca lawm kuas peb ua tau tuabneeg zoo kawg nkaus, hab kuas peb muaj lub sab kub lug ua txhua yaam num zoo.

¹⁵Koj qha cov ntseeg hab kuas puab ua lawv le tej lug kws kuv qha rua koj lawm, rua qhov koj yeej muaj cuabkaav has puab. Yog le ntawd, tsi xob ca leejtwg saib tsi taug koj.