Read Hmong Njua Titus 3 Bible Online

Titus 3 - Hmong Njua bible

Titus 3

¹Koj qha rua cov ntseeg has tas, puab yuavtsum fwm tej numtswv, noog numtswv lug hab zoo sab hlo ua txhua yaam num zoo.

²Koj qha puab kuas puab tsi xob thuam leejtwg, tsi xob nyam sis caav sis tshe, tabsis kuas puab ib leeg hlub ib leeg hab nrug suavdlawg sis raug zoo.

³Koj yuavtsum qha tej nuav rua suavdlawg, rua qhov yaav taag lug peb yeej yog tuabneeg ruag, tuabneeg tawv ncauj, tuabneeg ua txhum, peb qaug rua kev phem kev qas hab rua txhua yaam kev lomzem. Peb lub sab naj nub xaav phem, ntshaw luas tug hab ib leeg ntxub ib leeg.

⁴Tabsis thaus Vaajtswv tug kws yog peb tug Cawmseej, nwg qha nwg txujkev hlub rua suavdlawg,

⁵thaus ntawd Vaajtswv muab peb lub txim tshem moog povtseg lawm. Vaajtswv ua le ntawd, tsi yog vim peb ua ib yaam num zoo, tabsis vim Vaajtswv hlub peb xwb. Vaaj Ntsujplig tug Dlawbhuv tub ntxuav peb lub sab kuas peb muaj lub sab tshab hab nwg tsim peb dlua tshab.

⁶Qhov kws Vaajtswv pub Vaaj Ntsujplig tug Dlawbhuv rua peb, tub yog vim peb ntseeg Yexus Khetos tug kws yog peb tug Cawmseej,

⁷Vaajtswv hlub peb le ntawd, Vaajtswv txhaj suav has tas peb yog tuabneeg ncaaj nceeg, hab peb ca sab has tas Vaajtswv yuav pub txujsa ntev dlhawv moog ibtxhis rua peb.

⁸Tej lug nuav, yog tej lug kws tseemceeb. Kuv xaav kuas koj naj nub qha tej nuav, cov ntseeg Vaajtswv txhaj muab sab rau ua txhua yaam num zoo; tej ntawd yeej zoo hab muaj nqes rua txhua tug.

⁹Tabsis koj tsi xob nrug leejtwg sis caav txug tej zaaj kws tsi muaj hauvpaug hauvntsis, sis caav has txug cov yawmkoob tej npe kws muaj nyob huv ntawv hab sis caav has txug Vaajtswv txuj kevcai. Qhov kws ib tug pheej nrug ib tug sis caav sis tshe, qhov ntawd tsi tseemceeb hab tsi muaj qaabhau dlaabtsi le.

¹⁰Koj yuavtsum ntuag tug kws pheej ua rua suavdlawg tsi sis hum, yog koj ntuag nwg ob peb zag, nwg pheej tsi noog, ces koj tsi xob quavntsej nwg le lawm.

¹¹Rua qhov koj tub paub lawm has tas, tug tuabneeg kws ua le ntawd, nwg yog tug kws ua phem kawg le, hab nwg tej kev txhum yeej qha tau has tas nwg yog tug kws ua txhum.

¹²Yog thaus twg kuv khaiv Athemas lossis Tikhikus tuaj nyob tim ko, saib koj puas khoom tuaj nrug kuv nyob peg lub nroog Nikaupaulis, rua qhov kuv xaav has tas thaus txug lub caij ntuj no kuv yuav moog nyob ib ntus huv lub nroog ntawd.

¹³Koj yuavtsum paab xaa Xenas kws yog tug txheem plaub hab Apaulaus moog, hab saib obtug puas muaj qhov txhua chaw txhij.

¹⁴Koj yuavtsum qha cov ntseeg kuas puab xyum ua txhua yaam num zoo, hab paub npaaj tej kws yuav paab tau suavdlawg, thaus muaj num tseemceeb suavdlawg txhaj tau siv. Tsi tsimnyog cov ntseeg yuav ua dlog ua dlig.

¹⁵Txhua tug kws nrug kuv nyob ntawm nuav, puab puavleej has noj qaab nyob zoo rua koj. Thov koj has peb tej lug noj qaab nyob zoo rua cov ntseeg. Thov Vaajtswv foom koob moov rua mej txhua tug.