Read Hmong Njua Henplais 1 Bible Online

Henplais 1 - Hmong Njua bible

Henplais 1

¹Thaus u muaj ntau zag Vaajtswv ua le nuav le u qha cov kws cev Vaajtswv lug kuas puab qha rua peb cov yawmkoob paub tej kws Vaajtswv has,

²tabsis tam kawg nuav Vaajtswv khaiv Vaajtswv tug Tub lug qha peb. Vaajtswv tsaa Vaajtswv tug Tub ua tug tsim lub ntuj hab lub nplajteb. Thaus kawg Vaajtswv yuav pub ib puas tsaav yaam huv tuabsi ua tug Tub ntawd tug.

³Vaajtswv lub fwjchim ua rua tug Tub ntawd ci ntsaa ab. Nwg muaj fwvxyeej ib yaam le Vaajtswv, nwg tej lug kws muaj fwjchim luj kawg nkaus tuav lub ntuj hab lub nplajteb. Thaus nwg theej tuabneeg lub txhoj taag lawm, nwg moog sau ntuj ceebtsheej. Nwg moog nyob ntawm Vaajtswv tug kws muaj fwjchim luj kawg nkaus saab xis.

⁴Vaajtswv tis lub npe kws tseemceeb dlua cov timtswv ceebtsheej lub rua Vaajtswv tug Tub, ib yaam le Vaajtswv tsaa Vaajtswv tug Tub ua tug kws muaj fwjchim luj dlua cov timtswv ceebtsheej.

⁵Rua qhov Vaajtswv yeej tsi tau has rua nwg cov timtswv ib tug twg has tas: “Koj yog kuv tug Tub; nub nua kuv ua koj Txiv lawm.” Hab Vaajtswv tsi tau has rua cov timtswv ib tug twg has tas, “Kuv yuav ua koj Txiv, hab koj yuav ua kuv tug Tub.”

⁶Thaus Vaajtswv yuav khaiv Vaajtswv tug Tub hlub nqeg lug huv nplajteb, Vaajtswv rov has dlua le nuav: “Vaajtswv cov timtswv sau ntuj txhua tug yuavtsum pehawm tug Tub.”

⁷Thaus Vaajtswv has txug cov timtswv, nwg has tas, “Vaajtswv tsim Vaajtswv cov timtswv zoo le cua hab nwg tsim nwg cov tubkhai zoo le nplaim tawg.”

⁸Tabsis thaus Vaajtswv has txug nwg tug Tub, nwg has tas, “Vaajtswv, koj lub tebchaws yuav nyob moog ibtxhis, Koj kaav koj tsaav tuabneeg moog rua txujkev ncaaj nceeg.

⁹Koj nyam qhov zoo, koj ntxub qhov phem. tub yog vim le nuav Vaajtswv tug kws yog koj tug Vaajtswv txhaj xaiv koj ca, hab ua rua koj zoo sab kawg le, rua qhov koj tau koob meej heev dlua koj cov phoojywg.”

¹⁰Nwg has dlua has tas, “Tug Tswv, thaus chivkeeb koj tsim lub nplajteb, hab yog koj txhais teg tsim lub ntuj.

¹¹Tej ntawd puavleej yuav pluj moog, tabsis koj yuav nyob moog le; tej ntawd yuav txawj qub ib yaam le tej rig tsho.

¹²Koj yuav muab tej ntawd tais ca ib yaam le luas tais lub tsho ntev, hab koj yuav muab tej ntawd hloov ib yaam le luas hloov rig tsho. Tabsis koj yeej zoo le qub, koj yuav tsi txawj laug.”

¹³Vaajtswv yeej tsi tau has rua Vaajtswv cov timtswv ib tug twg has tas: “Koj ca le lug nyob ntawm kuv saab xis moog txug thaus kuv muab koj cov yeebncuab rua koj tsuj.”

¹⁴Yog le ntawd cov timtswv ceebtsheej tsuas yog cov tuabneeg qaum ntuj kws ua Vaajtswv teg num xwb. Vaajtswv khaiv puab lug paab cov tuabneeg kws yuav dlim lub txim.