Read Hmong Njua Henplais 10 Bible Online

Henplais 10 - Hmong Njua bible

Henplais 10

¹Cov Yudais txuj Kevcai tsuas yog tej tseemceeb kws yuav lug tom ntej nuav tug dluab xwb, yeej tsi yog tej ntawd tag tag. Txuj kevcai ntawd paab tsi tau cov tuabneeg kws naj xyoo nqaa qhov txhua chaw moog theej txhoj kuas ua tau tuabneeg zoo le.

²Yog cov tuabneeg kws moog pehawm Vaajtswv ntawd tub dlim puab lub txim lawm tag, ces puab yeej yuav tsi naj nub xaav txug puab qhov txhum hab puab yuav tsi muab tsaj tua theej puab lub txhoj lawm.

³Txawm yog le ntawd los qhov kws puab theej puab lub txhoj ntawd, ua rua puab naj xyoo ncu ntsoov puab tej kev txhum.

⁴Rua qhov tej ntshaav txiv nyuj hab ntshaav tshis yeej ntxuav tsi tau tuabneeg tej kev txhum moog ib zag le.

⁵Tub yog vim le ntawd, thaus Yexus Khetos yuav lug rua huv nplajteb nuav, nwg has rua Vaajtswv has tas: “Koj tsi yuav tej tsaj kws tuabneeg tua theej txhoj hab tej khoom kws puab muab fij rua koj, yog le ntawd, koj txhaj npaaj ib lub cev rua kuv lawm.

⁶Tej tsaj kws tuabneeg muab tua tua hlawv taagnrho rua sau lub thaaj, hab tej kws puab coj tuaj fij dlaws txim tsi hum koj sab.

⁷Tom qaab ntawd kuv has tas, ‘Vaajtswv, kuv nyob ntawm nuav, kuv yuav ua txhua yaam kws koj xaav kuas kuv ua, lawv le muaj lug sau ca has txug kuv huv Phoo Kevcai lawm.’ ”

⁸Thaus chivthawj nwg has tas, “Koj tsi yuav tej tsaj kws tuabneeg tua theej txhoj, tej khoom kws puab fij rua koj, tej tsaj kws tuabneeg muab hlawv kheej rua sau lub thaaj, tej kws puab coj tuaj theej txhoj.” Txawm yog puab ua tej ntawd lawv le kevcai los tej ntawd puavleej tsi hum koj sab.

⁹Tom qaab ntawd nwg has tas, “Vaajtswv, kuv nyob ntawd nuav, kuv yuav ua txhua yaam kws koj xaav kuas kuv ua.” Yog le ntawd Vaajtswv txhaj muab txuj qub kevcai kws tuabneeg muab tsaj tua theej txhoj ntawd tso tseg kuas muaj ib txuj tshab.

¹⁰Vim Yexus Khetos ua txhua yaam lawv le Vaajtswv xaav kuas nwg ua, hab vim nwg muab nwg lub cev rua Vaajtswv theej peb lub txhoj, peb txhaj ua tau tuabneeg zoo tsi muaj ib qhov txhum le. Qhov kws Yexus muab Yexus lub cev theej txhoj ntawd, nwg ua tuab zag xwb theej tau moog ibtxhis le.

¹¹Cov Yudais cov povthawj txhua tug ua num hab muab tej tsaj tua theej txhoj, puab naj nub ua tuab yaam qub xwb; tej ntawd ntxuav tsi tau tuabneeg tej kev txhum moog ib zag le.

¹²Tabsis Yexus Khetos theej txhoj tuab zag xwb, nwg theej tau moog ibtxhis. Tom qaab ntawd nwg moog nyob ntawm Vaajtswv saab xis.

¹³Nwgnuav nwg tseem nyob ntawd tog moog txug nub kws Vaajtswv muab nwg cov yeebncuab lug rua nwg tsuj.

¹⁴Nwg theej txhoj tuab zag xwb ua rua cov tuabneeg kws nwg xub ntxuav lawm, ua tau tuabneeg zoo kawg nkaus moog ibtxhis le.

¹⁵Vaaj Ntsujplig tug Dlawbhuv ua timkhawv rua peb has tas, yeej muaj le ntawd tag. Nwg xub has le nuav:

¹⁶“Tug Tswv has tas, tom qaab tam ntawd kuv yuav pub txuj kevcai nuav rua puab. Kuv yuav kuas puab ncu ntsoov kuv txuj Kevcai, hab kuv yuav sau txuj kevcai ntawd rua huv puab lub saab.”

¹⁷Hab tom qaab ntawd nwg rov has dlua has tas, “Kuv yuav tsi cim ntsoov puab lub txim lossis puab tej kev txhum ib zag le lawm.”

¹⁸Vaajtswv tub zaam tej kev txhum ntawd lawm, yog le ntawd tsi taag peb yuav tua tsaj theej txhoj le lawm.

¹⁹Cov kwvtij, tub yog vim Yexus tuag theej peb lub txhoj, peb txhaj muaj cuabkaav moog rua huv Chaav kws Dlawbhuv Kawg Nkaus.

²⁰Nwg qha txujkev tshab kws cawm tuabneeg txujsa rua peb taug, nwg qheb dlaim ntaub kuas peb tau kev moog rua saab huv, dlaim ntaub ntawd yog nwg lub cev.

²¹Peb muaj ib tug Povthawj Hlub kws saib Vaajtswv tsev tuabneeg.

²²Yog le ntawd, peb ca le muaj nplooj sab dlawb paug lug cuag Vaajtswv, hab ca sab ntsoov rua nwg, rua qhov peb paub has tas, Yexus cov ntshaav tub ntxuav peb lub sab hab dlej tub ntxuav peb lub cev huv tuabsi lawm.

²³Tej kws peb qha has tas, peb ca sab rua, peb yuavtsum muab sab npuab tsi xob tso tseg, rua qhov peb paub tseeb has tas, Vaajtswv yeej yuav ua lawv le Vaajtswv tej lug cog tseg.

²⁴Peb yuavtsum ua tuab zoo saib saib, peb yuav ua le caag ib tug txhaj txhawb tau ib tug tug zug, kuas ib tug txawj hlub ib tug hab ib tug ua zoo rua ib tug.

²⁵Suavdlawg yuavtsum tuaj ua ke noog lug qhuab qha tsi xob tso tseg, ib yaam le muaj qee leej tau tso tseg lawm. Mej puavleej paub has tas, tub yuav txug nub kws Yexus rov qaab lug. Yog le ntawd, peb ib tug hajyam yuavtsum txhawb ib tug tug zug heev dlua qhov qub.

²⁶Peb cov kws tub paub tseeb lawm, yog peb tseem txhobtxwm ua txhum dlua, yeej tsi muaj ib yaam dlaabtsi yuav theej tau peb lub txhoj le,

²⁷peb tsuas muaj kev txhawj kev ntshai tog rawv nub kws Vaajtswv rau txim hab muab cov suavtawg kws kub heev coj lug hlawv cov tuabneeg kws tawmtsaam Vaajtswv xwb.

²⁸Yog muaj ob leeg lossis peb leeg ua timkhawv has tas, puab pum ib tug ua txhum Mauxes txuj kevcai, ces ca le muab tug kws ua txhum ntawd tua povtseg tsi xob khauvxwm nwg le.

²⁹Yog le ntawd tug kws saib tsi taug Vaajtswv tug Tub, nwg hajyam muaj txim luj dlua tug kws ua txhum Mauxes txuj kevcai, rua qhov nwg saib tsi taug Yexus cov ntshaav kws tub ntxuav nwg tej kev txhum, kuas nwg ua tau tuabneeg zoo lawv le Vaajtswv txuj kevcai tshab.

³⁰Rua qhov peb paub tug kws has tas, “Kuv yuav pauj kuas tau”; hab tug kws has tas, “Tug Tswv yuav txav txim rua nwg tsaav tuabneeg.”

³¹Suavdlawg puavleej paub has tas, tug kws poob rua huv Vaajtswv tug kws muaj sa nyob lub xibteg, tug ntawd yuav ntshai kawg nkaus le.

³²Mej ca le ua tuab zoo xaav saib yaav taag lug mej lub neej zoo le caag. Thaus Vaajtswv coj mej lug nyob huv qhov kaaj lawm, tom qaab ntawd txawm yog mej raug ntau yaam kev txomnyem los mej tseem ua sab ntev tiv.

³³Muaj qee zag luas thuam hab tsimtxom mej taabmeeg suavdlawg. Thaus mej pum mej tuab paab raug luas tsimtxom puavleej mob mej sab.

³⁴Mej muaj lub sab hlub cov tuabneeg kws raug txim. Thaus muaj tuabneeg txeeb mej tej qhov txhua chaw, mej zoo sab hlo ca puab nqaa moog, rua qhov mej paub has tas, mej tub muaj yaam kws zoo dlua tej ntawd lawm, hab yaam ntawd yuav nyob moog ibtxhis.

³⁵Mej tsi xob poob sab, yog mej ca sab, mej yeej yuav tau nqe zug ntau.

³⁶Mej yuavtsum ua sab ntev, mej txhaj yuav ua tau lawv le Vaajtswv lub sab nyam, hab tau tej kws Vaajtswv coglug tseg has tas nwg yuav muab rua mej.

³⁷Rua qhov Vaajtswv txujlug has tas: “Tshuav tsi ntev tug kws yuav lug, nwg yuav lug, hab nwg yuav tsi ncua sijhawm lawm.

³⁸Tabsis kuv tsaav tuabneeg kws ncaaj nceeg yuav muaj sa nyob vim puab ntseeg; tabsis yog puab cov ntawd muaj ib tug thim rov qaab lawm, kuv yuav tsi txaus sab rua tug ntawd.”

³⁹Peb tsi yog cov kws thim rov qaab moog raug kev puamtsuaj, tabsis peb yog cov kws ntseeg moog txug nub kws peb dlim peb lub txim.