Read Hmong Njua Henplais 11 Bible Online

Henplais 11 - Hmong Njua bible

Henplais 11

¹Kev ntseeg yog qhov kws peb paub tseeb has tas, peb yuav tau tej kws peb ca sab rua, hab yog qhov kws peb ca sab ntsoov rua tej kws peb qhovmuag tsi pum.

²Tub yog vim cov tuabneeg txheej thaus u ntseeg puab txhaj ua tau hum Vaajtswv sab.

³Tub yog vim peb ntseeg peb txhaj totaub has tas, thaus Vaajtswv tsim ntuj tsim teb Vaajtswv has kuas muaj, txawm ca le muaj tag. Yog le ntawd tej kws peb qhovmuag pum, yeej lug ntawm tej kws peb qhovmuag tsi pum lug.

⁴Tub yog vim Anpees ntseeg, nwg txhaj muab tej kws zoo dlua Ka-ees le fij rua Vaajtswv. Vim Anpees ntseeg, Vaajtswv txhaj suav has tas Anpees yog tug ncaaj nceeg, rua qhov tej kws Anpees muab fij rua Vaajtswv ntawd hum Vaajtswv sab. Txawm yog Anpees tub tuag lawm los nwgnuav nwg kev nteeg tseem naj nub qha peb.

⁵Tub yog vim Enauj ntseeg, Enauj txhaj tsi tuag. Vaajtswv coj nwg moog tsi muaj leejtwg nrhav tau nwg, rua qhov Vaajtswv tub coj nwg moog lawm. Vaajtswv txujlug has tas: “Thaus Vaajtswv tseem tsi tau coj Enauj moog, Enauj yeej ua hum Vaajtswv sab.”

⁶Tug kws tsi ntseeg, tug ntawd yeej ua tsi tau hum Vaajtswv sab, rua qhov tug kws xaav lug cuag Vaajtswv, tug ntawd yuavtsum ntseeg has tas yeej muaj Vaajtswv tag, hab Vaajtswv yuav muab nqe zug rua tug kws lug cuag Vaajtswv.

⁷Tub yog vim Nau-es ntseeg, Nau-es txhaj noog Vaajtswv lug. Vaajtswv qha rua Nau-es txug tej xwm kws yaav tom ntej yuav muaj lug kws Nau-es qhovmuag tsi pum. Nau-es txhaj txua ib lub nkoj, Nau-es hab nwg tsev tuabneeg txhaj dlim kev pluj kev tuag. Vaajtswv ua le ntawd tub yog nwg rau txim rua tej tuabneeg kws tsi ntseeg. Vim Nau-es ntseeg, Vaajtswv txhaj suav has tas Nau-es yog tug kws ncaaj nceeg.

⁸Tub yog vim Anplahaas ntseeg, thaus Vaajtswv kuas Anplahaas tawm moog nyob lub tebchaws kws Vaajtswv coglug tseg has tas, Vaajtswv yuav pub rua nwg, nwg txhaj noog Vaajtswv lug. Anplahaas tawm huv nwg lub tebchaws moog, tabsis nwg tsi paub has tas sov nwg yuav moog qhov twg.

⁹Tub yog vim Anplahaas ntseeg, Anplahaas txhaj tau moog nyob lub tebchaws kws Vaajtswv coglug tseg has tas, Vaajtswv yuav pub rua nwg nyob. Anplahaas nyob huv tsevntaub ib yaam le nwg yog tug tuabneeg kws tsi muaj tebchaws nyob. Tom qaab ntawd Ixaj hab Yakhauj nyob huv tsevntaub ib yaam le obtug yawm Anplahaas. Vaajtswv coglug tseg rua obtug ib yaam le coglug rua Anplahaas.

¹⁰Anplahaas nyob le ntawd, rua qhov nwg taabtom tog nub kws Vaajtswv coj nwg moog huv lub nroog kws nyob moog ibtxhis, lub nroog ntawd Vaajtswv yog tug kws muab qauv hab ua lub nroog ntawd.

¹¹Tub yog vim Anplahaas ntseeg, Anplahaas txhaj muaj tub muaj ki. Txawm yog nwg laug heev hab Xalas ibtxwm xeeb tsi taug tub los nwg ca sab has tas, Vaajtswv yeej yuav ua lawv le Vaajtswv tej lug cog tseg.

¹²Txawm yog Anplahaas laug laug lawm tub yuav tuag los nwg tseem muaj xeebntxwv coob npaum le cov nubqub kws nyob sau nruab ntug, hab npaum le cov xuabzeb ntawm ntug havtxwv kws tsi muaj tuabneeg suav txheeb.

¹³Cov tuabneeg ntawd puab muab sab rau ntseeg moog txug nub kws puab tuag. Puab tseem tsi tau tau tej kws Vaajtswv coglug tseg has tas, Vaajtswv yuav pub rua puab, tabsis puab ca sab has tas, yaav tom ntej puab yuav tau, puab txhaj zoo sab tog. Puab leeg taabmeeg suavdlawg has tas, puab tsi muaj teb tsi muaj chaw nyob huv nplajteb nuav, puab taug kev tuaj ua qhua xwb.

¹⁴Peb paub has tas, cov tuabneeg kws has le ntawd puab taabtom nrhav teb nrhav chaw nyob.

¹⁵Puab yeej ncu tsi txug lub tebchaws kws puab tawm tuaj lawm. Yog puab ncu txug, nyaj puab yuav tau rov qaab moog nyob,

¹⁶tabsis puab xaav moog nyob lub tebchaws kws zoo dlua lub ntawd, lub tebchaws kws puab xaav moog nyob, yog sau ntuj ceebtsheej. Yog le ntawd Vaajtswv txhaj tsi txaajmuag ca puab hu nwg has tas, nwg yog puab tug Vaajtswv, rua qhov Vaajtswv tub tu ib lub tebchaws ca rua puab lawm.

¹⁷Tub yog vim Anplahaas ntseeg, Anplahaas txhaj coj nwg tug tub Ixaj moog, yuav muab tua fij rua Vaajtswv. Thaus ntawd tub yog Vaajtswv sim Anplahaas sab. Txawm yog Vaajtswv coglug tseg rua Anplahaas lawm los Anplahaas tseem zoo sab muab nwg tuab leeg tub coj moog tua fij rua Vaajtswv hab.

¹⁸Vaajtswv tub has rua Anplahaas lawm has tas, “Koj cov xeebntxwv yuav lug ntawm Ixaj lug.”

¹⁹Anplahaas ca sab has tas, txawm yog Ixaj tuag lawm los Vaajtswv yuav tsaa Ixaj sawv huv qhov tuag rov qaab lug. Qhov kws Vaajtswv cheem tsi pub Anplahaas tua Ixaj, qhov ntawd pev ib yaam le Ixaj sawv huv qhov tuag rov qaab lug ntaag.

²⁰Tub yog vim Ixaj ntseeg, Ixaj txhaj foom koob moov rua Yakhauj hab Exaus. Ixaj qha tej xwmtxheej kws yuav muaj lug yaav tom ntej rua obtug.

²¹Tub yog vim Yakhauj ntseeg, thaus Yakhauj yuav tuag, nwg txhaj foom koob moov rua Yauxej ob tug tub. Thaus Yakhauj pehawm Vaajtswv, Yakhauj muab nwg tug paas nreg lug txheem nwg lub cev, rua qhov nwg laug heev lawm.

²²Tub yog vim Yauxej ntseeg, thaus Yauxej yuav tuag, nwg has txug zaaj kws cov Yixalayees yuav tawm huv tebchaws Iziv moog. hab nwg qha qhov chaw kws nwg kuas puab coj nwg lub cev moog log ca.

²³Tub yog vim Mauxes nam hab Mauxes txiv ntseeg, thaus yug tau Mauxes, obtug txhaj muab Mauxes zais tau peb lub hlis. Obtug pum has tas, obtug tug mivtub ntawd zoo nraug heev, obtug txhaj muaj lub sab tawv tsi ua lawv le vaajntxwv tej lug.

²⁴Tub yog vim Mauxes ntseeg, thaus nwg hlub lawm, nwg tsi pub suavdlawg hu has tas, nwg yog Falaus tug ntxhais tug tub.

²⁵Nwg txaus sab nrug Vaajtswv tsaav tuabneeg raug kev txomnyem; nwg has tas nwg ua le ntawd zoo dlua le nwg yuav moog ua tej kev phem kev qas kws nyob ib nyuas ntu xwb.

²⁶Nwg ntseeg has tas, Vaajtswv yuav khaiv tug Mexiyas lug paab Vaajtswv tsaav tuabneeg. Txawm yog tej kws nwg ntseeg le ntawd ua rua luas thuam nwg los nwg pum has tas, qhov ntawd muaj nqes heev dlua txhua tsaav yaam zoo kws nyob huv tebchaws Iziv, rua qhov nwg saib ntsoov tej kws yaav tom ntej Vaajtswv yuav muab rua nwg.

²⁷Tub yog vim Mauxes ntseeg, Mauxes txhaj tawm huv tebchaws Iziv moog. Txawm yog vaajntxwv chim rua nwg los nwg tsi ntshai. Nwg tsi rov qaab lug, rua qhov nwg ntseeg cuag le kws nwg qhovmuag tub pum Vaajtswv tug kws suavdlawg qhovmuag tsi pum ntaag.

²⁸Tub yog vim Mauxes ntseeg, Mauxes txhaj ua kevcai Hlaa Dlhau hab kuas suavdlawg muab ntshaav pleev qhovrooj. Puab ua le ntawd tug timtswv kws yog txujkev tuag txhaj tsi tua cov Yixalayees cov tub hlub.

²⁹Tub yog vim cov Yixalayees ntseeg, puab ca le moog huv havtxwv lab ib yaam le puab moog sau nruab nqhuab. Tabsis thaus cov tuabneeg Iziv lawv qaab moog huv, dlej ca le nphau lug npug cov tuabneeg Iziv tuag taag huv tuabsi.

³⁰Tub yog vim cov Yixalayees ntseeg, thaus puab moog ncig lub nroog Yelikaus xyaa nub lawm, lub nroog ntawd tej ntsaa yeej txawm qaug taag huv tuabsi.

³¹Tub yog vim tug namndlav kws hu ua Lahaj ntseeg, nwg txhaj dlim. Nwg tsi nrug cov tuabneeg kws tsi noog Vaajtswv lug raug kev puamtsuaj, rua qhov nwg hu ob tug soj tebchaws lug huv nwg tsev hab paab obtug.

³²Kuv has tso tseg txij nuav xwb, rua qhov kuv tsi muaj sijhawm txaus yuav has txug Khede-oos, Npalaj, Xaaxoos, Yethas, Daviv, Xamuyees hab cov cev Vaajtswv lug ntau leej.

³³Tub yog vim puab ntseeg, puab txhaj ntaus tau tebchaws taagnrho. Puab ua tuabneeg ncaaj nceeg hab puab tau tej kws Vaajtswv coglug tseg has tas, Vaajtswv yuav muab rua puab. Puab ua rua tsuv ntxhuav rua tsi taug qhovncauj.

³⁴Puab tua tau cov suavtawg kws cig hlub hlub hab tsiv dlim nav ntaaj nav rag. Puab qaug zug, tabsis puab tsua rov qaab muaj zug. Puab muaj tswvyim ua tsuv ua rog hab puab tawmtsaam yeej lwm tsaav tuabneeg cov tubrog.

³⁵Tub yog vim muaj qee leej quaspuj ntseeg, puab txhaj tau puab tej tuabneeg kws tuag lawm sawv rov qaab lug. Muaj qee leej tsi kaam tawm huv tsev lojcuj, puab zoo sab raug kev tsimtxom moog txug nub tuag, rua qhov puab ca sab has tas, Vaajtswv yuav tsaa puab sawv huv qhov tuag rov qaab lug, hab pub txujsa kws zoo dlua puab txuj rua puab.

³⁶Muaj qee leej raug luas thuam hab raug luas nplawm, hab muaj qee leej raug luas muab saw hlau khi hab ca rua luas muab kaw rua huv tsev lojcuj;

³⁷muaj qee leej raug luas muab pobzeb ntaus, muaj qee leej raug luas muab kaw kaw ua ob yaa, muaj qee leej raug luas muab ntaaj tua, muaj qee leej naav tawv yaaj tawv tshis moog rua nuav rua u, puab tsi muaj noj tsi muaj haus, txomnyem hab raug luas tsimtxom kawg le.

³⁸Puab yog tuabneeg zoo dlhau lawm, lub nplajteb nuav tsi phim rua puab nyob. Puab tsi muaj vaaj tsi muaj tsev, puab moog nyob tom tej roob mojsaab qhua hab peg tej roob. Puab nyob huv tej qhov zeb qhov tsua hab khawb qhov aav nyob.

³⁹Tub yog vim puab ntseeg, puab lub koob meej txhaj nrov nchaa moo lug moog thoob plawg qhov txhua chaw. Tabsis puab tseem tsi tau tau tej kws Vaajtswv coglug tseg has tas, Vaajtswv yuav pub rua puab,

⁴⁰rua qhov Vaajtswv tub tu yaam kws zoo dlua tej kws puab muaj rua peb lawm. Vaajtswv yeej xaav kuas puab hab peb tuab txhij ua tau tuabneeg zoo kawg nkaus.