Read Hmong Njua Henplais 12 Bible Online

Henplais 12 - Hmong Njua bible

Henplais 12

¹Peb tub muaj tuabneeg coob coob nyob puagncig peb ua timkhawv rua peb lawm. Yog le ntawd, peb ca le muab txhua yaam kws thaiv peb kev hab tej kev txhum kws khi peb tso povtseg, hab peb ca le sis twv dlha ncaaj nraim moog kuas txug tug nrim tom kawg.

²Peb yuavtsum saib ntsoov Yexus tug kws yog peb lub hauvpaug kev ntseeg hab ua kuas peb kev ntseeg tav. Thaus luas muab nwg ntsa rua sau ntoo khaublig, nwg ua sab ntev nyaj tej kev txomnyem ntawd, nwg tsi suav has tas qhov kws nwg tuag sau ntoo khaublig ua rua nwg poob ntsejmuag, rua qhov nwg paub has tas, thaus dlhau txujkev txomnyem lawm, nwg yuav zoo sab kawg le, nwgnuav nwg tub moog nyob ntawm Vaajtswv lub zwmtxwv saab xis lawm.

³Mej yuavtsum ncu ntsoov Yexus tej kev txomnyem, hab qhov kws nwg ua sab ntev rua cov tuabneeg txhum kws ntxub nwg. Yog mej ua le ntawd, mej yeej yuav tsi poob sab lossis tso Yexus tseg.

⁴Mej cov kws tawmtsaam kev phem, mej tseem tsi tau tawmtsaam moog txug nub kws raug luas tua.

⁵Mej tsi ncu qaab tej lug kws Vaajtswv ntuag mej lawm los? Nwg ntuag mej, rua qhov mej yog nwg cov mivnyuas. Nwg has tas: “Mivtub, thaus tug Tswv qhuab ntuag koj, koj yuavtsum khaws nwg tej lug ca, hab thaus nwg tshev koj, koj tsi xob poob sab.

⁶Rua qhov tug Tswv qhuab ntuag txhua tug kws nwg hlub, hab nwg nplawm txhua tug kws nwg coj lug ua nwg tub.”

⁷Mej yuavtsum ua sab ntev nyaj tej kws mej raug, ib yaam le mej ua sab ntev thaus mej txiv qhuab ntuag mej, rua qhov tej ntawd ua rua suavdlawg paub has tas, Vaajtswv qhuab ntuag mej vim mej yog nwg cov mivnyuas. Yeej tsi muaj ib tug mivnyuas kws leej txiv yuav tsi tau qhuab ntuag le.

⁸Yog Vaajtswv tsi qhuab ntuag mej ib yaam le nwg qhuab ntuag nwg cov mivnyuas tag, ces mej yog mivnyuas tsaub xwb.

⁹Peb muaj nam muaj txiv qhuab ntuag peb, peb txhaj fwm obtug. Yog le ntawd, hajyam tsimnyog peb noog peb Txiv tug kws nyob sau ntuj ceebtsheej lug, peb txhaj tau txujsa ntev dlhawv moog ibtxhis.

¹⁰Peb nam peb txiv qhuab ntuag peb thaus peb tseem yau lawv le puab pum zoo xwb, tabsis Vaajtswv qhuab ntuag peb kuas muaj nqes rua peb, peb txhaj le yuav ua tau tuabneeg dlawbhuv ib yaam le Vaajtswv yog tug kws dlawbhuv.

¹¹Thaus luas qhuab ntuag peb, thaus ntawd peb tsi kaaj sab, peb nyuaj sab xwb, tabsis tom qaab ntawd cov tuabneeg kws khaws luas tej lug qhuab ntuag rua nruab sab, cov tuabneeg ntawd yuav tsimtxaj hab yuav tau zoo nyob kaaj sab lug.

¹²Yog le ntawd, mej yuavtsum muab mej txhais teg kws tsaug lawm tsaa ua num, hab muab mej lub hauvcaug kws tsi muaj zug qoj kuas moog taug kev.

¹³Mej yuavtsum taug kev ncaaj nraim moog kuas txug qhov kawg. Mej ua le ntawd, txhais kutaw kws cegtawv lawm txhaj yuav zoo. Yog mej tsi ua le ntawd, ntshai nyob tsaam yuav khu tsi tau.

¹⁴Mej yuavtsum ua sab ntev nrug suavdlawg sis raug zoo, hab mej yuavtsum xyum ua kuas mej lub neej dlawbhuv, rua qhov tug kws tsi muaj lub neej zoo le nuav, tug ntawd yeej yuav tsi pum tug Tswv ib zag le.

¹⁵Mej yuavtsum ceevfaaj tsi xob pub mej cov ib tug twg tso Vaajtswv txuj koob moov tseg. Mej yuavtsum ceevfaaj tsi xob pub mej cov ib tug twg ua le tsob nroj ab kws ua rua ntau leej muaj kev ntxhuv sab.

¹⁶Mej yuavtsum ceevfaaj tsi xob pub mej cov ib tug twg ua txhum kev nkauj kev nraug lossis ua saib tsi taug Vaajtswv ib yaam le Exaus, nwg muab nwg lub npe tij pauv tuab pluag mov noj xwb.

¹⁷Mej tub paub lawm has tas, tom qaab ntawd Exaus xaav tau nwg txiv tej koob moov tabsis tsi tau, rua qhov nwg hloov tsi tau tej kws nwg tau ua lug lawm. Txawm yog nwg quaj kua muag ndlwg si laim los nwg tsi tau le lawm.

¹⁸Mej tsi tau moog pum lub roob Xinais ib yaam le cov Yixalayees moog pum. Puab pum tsaus fuab nti, muaj suavtawg cig lab ploog hab cua dlaaj cua dlub nrov nroo ntwg,

¹⁹muaj suab xyu nrov ntsoog qeeg hab muaj ib lub suab has lug nrov nroo ntwg. Thaus suavdlawg nov lub suab ntawd puab thov kuas tsi xob has ntxiv rua puab lawm,

²⁰Rua qhov puab tsi xaav nov tej lug kws has tas, “Txawm yog ib tug tsaj tuaj chwv lub taw roob nuav los yuavtsum muab pobzeb ntaus tug tsaj ntawd kuas tuag.”

²¹Suavdlawg pum le ntawd, puab ntshai kawg le, Mauxes txhaj has tas, “Kuv ntshai ua ib ce tshee nyo.”

²²Tabsis mej tuaj txug lub roob Xi-oos hab tuaj txug Vaajtswv tug kws muaj sa nyob lub nroog. Lub nroog ntawd yog lub nroog Yeluxalees nyob sau ntuj ceebtsheej kws muaj cov timtswv ntau txheeb leej nyob,

²³hab tuaj nrug Vaajtswv cov tub hlub nyob ua ke zoo sab, puab cov ntawd yog cov kws muaj lub npe sau ca rua sau ntuj ceebtsheej. Mej tuaj cuag Vaajtswv tug kws txav txim rua suavdlawg, hab tuaj txug ntawm cov tuabneeg ncaaj nceeg kws tuag lawm cov ntsujplig. Vaajtswv tub ua rua puab cov ntawd ua tau tuabneeg zoo kawg nkaus lawm.

²⁴Mej tuaj cuag Yexus tug kws ua kuas muaj txuj kevcai tshab, hab tuaj cuag nwg cov ntshaav kws ndlwg lug ywg suavdlawg, cov ntshaav coglug ntawd zoo dlua Anpees cov ntshaav.

²⁵Yog le ntawd, mej yuavtsum ceevfaaj tsi xob tawv tug kws qha mej. Cov tuabneeg kws tsi kaam noog tug kws qha Vaajtswv txujlug huv nplajteb nuav, cov tuabneeg ntawd yeej tsi muaj ib tug dlim le. Yog le ntawd, yog peb tsi noog tug kws has sau ntuj tuaj tej lug, peb hajyam yuav raug txim nyaav dlua puab hab!

²⁶Thaus ntawd Vaajtswv lub suab ua rua lub nplajteb ua zug koog, tabsis nwgnuav Vaajtswv coglug tseg has tas, “Tseem tshuav ib zag kuv yuav ua kuas lub nplajteb ua zug koog, tsi yog lub nplajteb xwb, tabsis lub ntuj los yuav ua zug koog hab.”

²⁷Lu lug kws has tas, “Tseem tshuav ib zag”, lu lug ntawd qha rua suavdlawg paub tseeb has tas, tej kws Vaajtswv tsim yuav ua zug koog hab yuav raug muab tshem moog, tabsis tej kws tsi ua zug yuav nyob khov kho moog le.

²⁸Yog le ntawd, peb ca le ua Vaajtswv tsaug, rua qhov peb tau lub tebchaws kws nyob khov kho ua peb tug. Peb yuavtsum ua nwg tsaug hab pehawm nwg lawv le nwg lub sab nyam. Thaus peb pehawm nwg, peb yuavtsum fwm hab paub ntshai nwg;

²⁹rua qhov peb tug Vaajtswv yog cov nplaim tawg kws kub tau txhua yaam yaaj taag huv tuabsi.