Read Hmong Njua Henplais 2 Bible Online

Henplais 2 - Hmong Njua bible

Henplais 2

¹Yog le ntawd peb yuavtsum hajyam ua tuab zoo khaws tej lug tseemceeb kws peb tau nov lug lawm ca zoo zoo, peb txhaj le yuav muab sab npuab tej lug ntawd.

²Rua qhov tej lug kws cov timtswv ceebtsheej qha puavleej yog lug tseeb. Tug kws tsi noog hab tsi ua lawv le tej lug ntawd, tug ntawd tub raug txim lawv le nwg tej kev txhum lawm.

³Yog peb tsi quavntsej txujkev dlim txim kws tseemceeb, peb yuav ua le caag dlim tau. Tug Tswv yog tug kws xub qha txujkev dlim txim ntawd ntaag. Cov tuabneeg kws nov nwg qha, puab qha tseeb rua peb has tas muaj le ntawd tag.

⁴Tsi yog le ntawd xwb, Vaajtswv tseem ua tej txujci luj hab tseemceeb, hab ua tej kws qha nwg lub fwjchim rua suavdlawg pum has tas, yeej muaj le puab has tag. Hab Vaajtswv pub Vaaj Ntsujplig tug Dlawbhuv rua suavdlawg lawv le Vaajtswv pum zoo pub.

⁵Vaajtswv tsi tau tsaa cov timtswv ceebtsheej ua cov kaav lub nplajteb tshab kws peb has txug yuav lug tom ntej nuav.

⁶Tabsis Vaajtswv txujlug has tas: “Vaajtswv, tuabneeg tsimtxaj npaum le caag, koj tsua xaam txug puab? Tej nyuas tuabneeg xwb, puab tsimtxaj npaum le caag koj tsua yuav tsomkwm puab?

⁷Koj tsim nwg, koj pub nwg muaj fwjchim yau dlua cov timtswv ceebtsheej ib nyuas ntu, koj pub nwg muaj fwjchim hab tau ntsejmuag

⁸hab tsaa nwg ua tug kaav ib puas tsaav yaam huv tuabsi.” Lu lug kws has tas, Vaajtswv tsaa tuabneeg “ua tug kaav ib puas tsaav yaam,” lu lug ntawd qha tseeb has tas, tsi muaj ib yaam dlaabtsi kws Vaajtswv tsi muab rua tuabneeg kaav, txawm le ntawd los nwgnuav peb tseem tsi tau pum tuabneeg kaav ib puas tsaav yaam.

⁹Tabsis peb pum has tas, Vaajtswv ca Yexus muaj fwjchim yau dlua cov timtswv ceebtsheej ib nyuas ntu. Vaajtswv ua le ntawd, rua qhov Vaajtswv tug kws hlub suavdlawg, nwg yuav khaiv Yexus lug tuag theej suavdlawg lub txhoj. Nwgnuav peb pum Yexus muaj tug tshwjchim kws ci ntsaa ab hab nwg tau ntsejmuag, rua qhov nwg raug kev tuag txomnyem ntsuav.

¹⁰Qhov kws Vaajtswv tug kws tsim hab saib ib puas tsaav yaam, nwg khaiv Yexus lug raug kev txomnyem, kuas Yexus txhaj ua tau Yexus teg num tav, qhov ntawd Vaajtswv ua yog lawm. Vaajtswv ua le ntawd, nwg txhaj yuav coj tau nwg cov mivnyuas ntau leej lug txais yuav nwg txuj koob moov, rua qhov Yexus yog tug kws cawm puab kuas puab dlim puab lub txim.

¹¹Yexus hab cov tuabneeg kws Yexus tub pub lub sab tshab rua lawm, puavleej yog tuab leeg txiv yug xwb. Tub yog vim le ntawd, Yexus txhaj tsi txaajmuag hu has tas, puab yog nwg cov kwvtij.

¹²Lawv le tej lug kws nwg has tseg lawm has tas: “Vaajtswv, kuv yuav qha koj zaaj rua kuv cov kwvtij noog; Kuv yuav hu nkauj ua koj tsaug taabmeeg cov tuabneeg kws tuaj nyob ua ke noog lug qhuab qha.”

¹³Nwg has dlua has tas, “Kuv yuav ca sab rua Vaajtswv.” Hab nwg has ntxiv dlua has tas, “Kuv nrug cov mivnyuas kws Vaajtswv pub rua kuv nyob ntawm nuav.”

¹⁴Vim cov mivnyuas ntawd puavleej yog tuabneeg muaj roj muaj ntshaav, yog le ntawd Yexus txhaj lug yug ua tuabneeg muaj roj muaj ntshaav ib yaam le puab. Nwg ua le ntawd, nwg txujkev tuag txhaj rhuav tau dlaab Ntxwgnyoog lub fwjchim kws ua kuas tuabneeg tuag puamtsuaj moog,

¹⁵hab tso tau cov tuabneeg kws ibtxwm ntshai kev pluj kev tuag kuas puab dlim.

¹⁶Peb tub pum tseeb lawm has tas, tsi yog Vaajtswv paab cov timtswv ceebtsheej, tabsis yog Vaajtswv paab Anplahaas cov xeebntxwv.

¹⁷Yog le ntawd Yexus yuavtsum lug ua tuabneeg ib yaam le nwg cov kwvtij, nwg txhaj yuav ua tau puab tug Povthawj Hlub ncaaj nceeg kws muaj lub sab hlub ua Vaajtswv teg num. Nwg ua le ntawd Vaajtswv txhaj yuav zaam tau suavdlawg lub txim.

¹⁸Nwgnuav Yexus paub paab cov tuabneeg kws raug kev nyuaj sab, rua qhov nwg tub raug kev nyuaj sab hab kev tsimtxom lug lawm.