Read Hmong Njua Henplais 3 Bible Online

Henplais 3 - Hmong Njua bible

Henplais 3

¹Yog le ntawd cov kwvtij kws ntseeg Yexus, mej puavleej yog cov kws Vaajtswv hu lug ua Vaajtswv tsaav tuabneeg lawm, mej yuavtsum saib ntsoov Yexus tug kws Vaajtswv khaiv lug ua tug Povthawj Hlub saib tej kws peb ntseeg.

²Yexus muaj nplooj sab dlawb paug ua teg num kws Vaajtswv muab tso rua nwg ua, ib yaam le Mauxes muaj nplooj sab dlawb paug paab cov Yixalayees kws yog Vaajtswv tsev tuabneeg txhua tug huv tuabsi.

³Suavdlawg yeej qhuas tug kws ua tsev heev dlua qhuas lub tsev. Ib yaam nkaus le ntawd, tsimnyog Yexus tau ntsejmuag heev dlua Mauxes.

⁴Tej tsev yeej muaj tug ua, tabsis Vaajtswv yog tug tsim ib puas tsaav yaam.

⁵Mauxes muaj nplooj sab dlawb paug paab Vaajtswv tsev tuabneeg txhua tug huv tuabsi. Nwg yeej yog ib tug Tubkhai, nwg has txug tej kws Vaajtswv yuav qha rua suavdlawg yaav tom ntej.

⁶Tabsis Yexus Khetos yog Vaajtswv tug Tub, nwg muaj nplooj sab dlawb paug saib Vaajtswv tsev tuabneeg. Yog peb muaj nplooj sab tawv qhawv, hab ua sab ntev tog tej kws peb ca sab rua, peb txhaj yuav ua tau Vaajtswv tsev tuabneeg.

⁷Rua qhov Vaaj Ntsujplig tug Dlawbhuv qha has tas, “Nub nuav yog mej nov Vaajtswv lub suab hu,

⁸mej tsi xob tawv ncauj, ib yaam le yaav taag lug mej cov yawmkoob ntxeev sab rua Vaajtswv, hab ib yaam le nub kws puab sim Vaajtswv sab thaus puab nyob tom taj suabpuam,

⁹Vaajtswv has tas, txawm yog mej cov yawmkoob pum tej kws kuv ua lug tau plaub caug xyoo los puab tseem sim kuv sab hab.

¹⁰Tub yog vim le ntawd kuv txhaj chim rua puab cov ntawd hab kuv has tas, ‘Puab lub sab yeej nyam ua phem hab puab tsi kawm kuv tej kevcai.’

¹¹Kuv chim, kuv txhaj coglug tseg has tas, ‘Puab cov ntawd yuav tsi tau lug nrug kuv su ib zag le.’ ”

¹²Cov kwvtij, mej yuavtsum ceevfaaj zoo, nyob tsaam mej cov muaj ib tug muaj lub sab phem hab tsi ntseeg, nwg ca le tso Vaajtswv tug kws muaj sa nyob tseg.

¹³Mej tsi xob ua le ntawd, mej ib leeg yuavtsum naj nub paab ib leeg, thaus peb tseem hu tau has tas, “Nub Nua”; Vaajtswv lu lug kws has tas, “Nub Nua”; lu lug ntawd yog Vaajtswv qha peb. Yog mej ua le ntawd, kev txhum yuav ntxag tsi tau mej ib tug twg ua tuabneeg tawv ncauj.

¹⁴Yog peb muab sab npuab tej kws thaus chivthawj peb ca sab rua moog txug nub kawg, peb yuav nrug Yexus Khetos tau koob moov ib yaam nkaus.

¹⁵Vaajtswv txujlug has tas: “Nub nua yog mej nov Vaajtswv lub suab hu, mej tsi xob tawv ncauj ib yaam le yaav taag lug mej cov yawmkoob ntxeev sab rua Vaajtswv.”

¹⁶Cov kws nov Vaajtswv lub suab hu hab ntxeev sab rua Vaajtswv yog cov twg? Tub yog txhua tug kws Mauxes coj tawm huv tebchaws Iziv lug ntaag.

¹⁷Lub sijhawm plaub caug xyoo ntawd, Vaajtswv chim rua cov tuabneeg twg? Vaajtswv chim rua cov tuabneeg kws ua txhum, cov tuabneeg ntawd tub yog cov kws tuag pawg lug tom taj suabpuam.

¹⁸Thaus Vaajtswv coglug tseg has tas, “Puab cov ntawd yuav tsi tau lug su huv qhov chaw kws kuv tu tseg rua puab ib zag le,” yog nwg has txug cov twg? tub yog nwg has txug cov tuabneeg kws ntxeev sab rua nwg ntaag.

¹⁹Yog le ntawd peb paub has tas, vim puab tsi ntseeg, Vaajtswv txhaj tsi pub puab moog huv qhov chaw ntawd.