Read Hmong Njua Henplais 4 Bible Online

Henplais 4 - Hmong Njua bible

Henplais 4

¹Vaajtswv coglug tseg rua peb has tas, nwg yuav pub peb moog nrug nwg su. Yog le ntawd peb suavdlawg yuavtsum ceevfaaj, nyob tsaam mej cov muaj qee leej tsi tau moog nrug nwg su.

²Rua qhov peb puavleej nov Txujmoo Zoo ib yaam le puab tau nov lawm hab. Puab nov, tabsis Txujmoo Zoo ntawd tsi muaj nqes rua puab, rua qhov thaus puab nov, puab tsi ntseeg.

³Peb cov kws ntseeg peb yuav tau moog nrug Vaajtswv su. Lawv le Vaajtswv has tseg has tas: “Kuv chim kuv txhaj coglug has tas, ‘Puab cov ntawd yuav tsi tau lug nrug kuv su ib zag le.’ ” Txawm yog thaus Vaajtswv tsim ntuj tsim teb, nwg tub ua nwg tej num tav taag lawm los nwg tseem has le ntawd.

⁴Rua qhov Vaajtswv txujlug muaj ib qho has txug nub xyaa has tas: “Nub xyaa Vaajtswv su, Vaajtswv tsi tsim ib yaam dlaabtsi ntxiv lawm.”

⁵Muaj dlua ib lus has txug zaaj nuav has tas, “Puab cov ntawd yuav tsi tau lug nrug kuv su ib zag le.”

⁶Cov tuabneeg thaus u kws xub nov Txujmoo Zoo, puab tsi tau moog nrug Vaajtswv su, rua qhov puab tsi ntseeg, tabsis Vaajtswv pub lwm cov moog nrug Vaajtswv su.

⁷Peb paub has tas muaj le ntawd, rua qhov Vaajtswv teem dlua ib nub tseg hu has tas, “Nub Nua.” Tom qaab ntawd ntau xyoo Vaajtswv kuas Daviv has txug zaaj ntawd lawv le tub has taag lug lawm has tas: “Nub nua yog mej nov Vaajtswv lub suab hu, mej tsi xob tawv ncauj.”

⁸Rua qhov yog Yausuas tub coj puab suavdlawg moog nrug Vaajtswv su lawm, ces tsi taag Vaajtswv yuav rov has dlua has tas, nub nua.

⁹Txawm le caag los Vaajtswv tsaav tuabneeg yeej yuav tau su ib yaam le nub xyaa Vaajtswv su.

¹⁰Rua qhov tug kws moog nrug Vaajtswv su lawm, tug ntawd yuav tsi ua num ib yaam le Vaajtswv tsi ua num lawm.

¹¹Yog le ntawd, tsimnyog peb suavdlawg yuavtsum ua tag moog kuas peb tau nrug Vaajtswv su. Tsi xob pub peb cov ib tug twg tsi noog lug le puab cov ntawd, nyob tsaam nwg tsi tau moog su.

¹²Rua qhov Vaajtswv tug kws muaj sa nyob, nwg tej lug tseemceeb hab muaj kuab kawg le. Tej lug ntawd ntse dlua raab ntaaj ob saab ntse, nkaug moog txug nruab plaab nruab plaw nruab nqaj nruab txhaa. Tej lug ntawd paub tej kws tuabneeg xaav hab paub tuabneeg lub sab huv tuabsi.

¹³Tsi muaj ib yaam dlaabtsi kws tuabneeg yuav muab roog tau tsi pub Vaajtswv pum. Ib puas tsaav yaam kws Vaajtswv tsim lug lawm, Vaajtswv yeej pum huv tuabsi, hab peb txhua tug nyag yuavtsum pav nyag lub neej qha rua Vaajtswv.

¹⁴Yog le ntawd peb yuavtsum muab sab npuab tej kws peb has tas, peb ntseeg, rua qhov peb muaj tuab tug Povthawj Hlub kws tub moog cuag Vaajtswv lawm, tug ntawd yog Vaajtswv tug Tub Yexus.

¹⁵Peb tug Povthawj Hlub yeej paub tej kws peb qaug zug, rua qhov nwg tub raug kev dlaag ntxag ib yaam le peb lug lawm. Txawm le ntawd los nwg tsi tau ua ib qho txhum le.

¹⁶Yog le ntawd peb ca le ua sab tawv qhawv moog cuag Vaajtswv tug kws nyob sau lub zwmtxwv, rua qhov nwg yog tug kws hlub peb. Nwg yuav paab peb hab foom koob moov rua txhua tug kws thov nwg.