Read Hmong Njua Henplais 5 Bible Online

Henplais 5 - Hmong Njua bible

Henplais 5

¹Txhua tug Povthawj Hlub puavleej yog Vaajtswv xaiv tuabneeg lug ua hab tsaa puab ua Vaajtswv teg num paab suavdlawg. Thaus tug Povthawj Hlub ua teg num ntawd, nwg muab khoom fij rua Vaajtswv hab muab tsaj tua theej suavdlawg lub txhoj.

²Vim nwg qaug zug ib yaam le suavdlawg, nwg txhaj paub ua sab ntev paab cov tuabneeg kws ruag hab yuam kev ua txhum.

³Tug povthawj hlub yog tug kws muab tsaj tua theej suavdlawg lub txhoj, tabsis vim nwg yeej qaug zug ib yaam le suavdlawg, nwg yuavtsum theej nwg lub txhoj hab.

⁴Tsi muaj leejtwg yuav muaj cuabkaav tsaa nwg ua tug Povthawj Hlub, tsuas yog Vaajtswv pum zoo tsaa tug twg, tug ntawd txhaj tau ua, ib yaam le Vaajtswv pum zoo tsaa Aloos ua tug Povthawj Hlub.

⁵Ib yaam le ntawd, Yexus Khetos tsi tau khaav has tas, nwg yog ib tug Povthawj Hlub. Tabsis Vaajtswv yog tug kws has rua nwg has tas: “Koj yog kuv tug Tub, nub nua kuv ua koj Txiv lawm.”

⁶Vaajtswv has dlua ib lus has tas, “Koj yuav ua Povthawj Hlub moog ibtxhis, ib yaam le Mekhixedes.”

⁷Thaus Yexus tseem nyob huv nplajteb nuav, nwg thov Vaajtswv tug kws paab tau kuas nwg dlim kev pluj kev tuag. Thaus nwg thov nwg quaj hab lug kua muag kawg le. Vaajtswv noog nwg tej lug thov, rua qhov nwg txu nwg lub fwjchim hab muab nwg txujsa tso plhuav rua Vaajtswv kaav.

⁸Txawm yog Yexus yog Vaajtswv tug Tub los nwg tseem kawm noog lug lug ntawm kev tiv kev txomnyem.

⁹Thaus Vaajtswv ua rua nwg zoo kawg nkaus lawm, nwg txhaj yog tug kws pub txujsa ntev dlhawv moog ibtxhis rua txhua tug kws noog nwg lug.

¹⁰Tom qaab ntawd Vaajtswv tsaa nwg ua tug Povthawj Hlub ib yaam le Mekhixedes.

¹¹Peb tseem muaj ntau zaaj kws yuav pav qha mej, tabsis pav nyuaj heev, rua qhov mej tsi tshua totaub.

¹²Nwgnuav tub tsimnyog mej ua taug xwbfwb lawm, tabsis tseem yuavtsum muaj tuabneeg muab Vaajtswv zaaj lub hauvpaug lug qha mej dlua. Tub tsimnyog mej noj taug zaub taug mov lawm, tabsis mej tseem noj mig.

¹³Tug kws noj mig tug ntawd tseem yog mivnyuas yau, nwg tsi tau paub tseeb has tas, zaaj twg yog, zaaj twg tsi yog.

¹⁴Tabsis tej zaub mov tsuas yog cov laug txhaj noj taug xwb. Puab tub xyum lug lawm puab txhaj paub has tas, yaam twg phem yaam twg zoo.