Read Hmong Njua Henplais 6 Bible Online

Henplais 6 - Hmong Njua bible

Henplais 6

¹Yog le ntawd, peb tsi xob pheej naj nub kawm Yexus Khetos txuj kevcai lub hauvpaug xwb, peb yuavtsum kawm ntxiv lawm tom ntej hab. Peb tsi xob rov pib qaab ua dlua, tsi has tso tej kws tsi muaj nqes tseg, ntseeg Vaajtswv,

²lossis kevcai ntxuav, kevcai tsaa teg, zaaj kws tuabneeg tuag sawv huv qhov tuag rov qaab lug, hab zaaj kws tuabneeg raug txim moog ibtxhis. Tej ntawd peb tub kawm lug lawm tsi taag peb yuav rov qaab kawm dlua.

³Peb yuavtsum kawm ntxiv moog lawm tom ntej. Yog Vaajtswv pum zoo peb yeej yuav ua le ntawd.

⁴Cov tuabneeg kws tub tso Yexus tseg lawm, yuav ua le caag rov qaab lug hloov dlua sab tshab ib zag ntxiv? Yaav taag lug Vaajtswv ua rua cov tuabneeg ntawd pum kev, nwg foom koob moov rua puab hab nwg pub Vaaj Ntsujplig tug Dlawbhuv rua puab.

⁵Puab puavleej paub has tas, Vaajtswv txujlug yog txuj kws tseemceeb kawg le, hab puab tub pum lub fwjchim kws yuav muaj lug tam tom ntej nuav mivntsiv lawm.

⁶Txawm yog puab paub le ntawd los tom qaab ntawd puab tseem tso Yexus tseg lawm hab. Yog yuav coj puab rov qaab lug hloov dlua sab tshab yeej tsi tau le, rua qhov qhov kws puab tso Yexus tseg tub yog puab rov muab Vaajtswv tug Tub ntsa rua sau tug ntoo khaublig dlua ib zag, hab ua rua luas thuam luas rhuav Yexus ntsejmuag ntaag.

⁷Vaajtswv foom koob moov rua thaaj aav kws naj nub nqug dlej naag. Tej qoobloo kws cog rua huv thaaj aav ntawd yuav luj hlub zoo hab yuav muaj nqes rua tug kws cog.

⁸Tabsis yog thaaj aav ntawd muaj nroj hab muaj xuavpaug tuaj xwb, thaaj aav ntawd tsi muaj nqes dlaabtsi le. Thaus kawg Vaajtswv yuav foom tsi zoo rua, suavtawg yuav kub thaaj aav ntawd taag huv tuabsi.

⁹Cov kwvtij kws peb hlub, txawm yog peb has le nuav rua mej lawm los peb tseem ca sab tau rua mej. Peb paub has tas, mej muaj txuj koob moov kws zoo dlua tej kws peb has lug lawm. Txuj ntawd yog txuj kws paab mej dlim mej lub txim.

¹⁰Vaajtswv yog tug ncaaj nceeg! Nwg yeej yuav ncu ntsoov tej num kws mej tau ua lug lawm, hab qhov kws mej paab cov ntseeg ib yaam le naj nub nua mej tseem paab. Mej ua le ntawd tub yog vim mej muab sab npuab Vaajtswv.

¹¹Peb xaav kuas mej txhua tug muab sab npuab Vaajtswv moog txug nub kawg, mej txhaj yuav tau tej kws mej ca sab rua.

¹²Peb tsi xaav pub mej ua tuabneeg tubnkeeg, peb xaav kuas mej ua mej lub neej zoo le cov kws muab sab rau ntseeg hab ua sab ntev lub, mej txhaj yuav tau tej kws Vaajtswv coglug tseg lawm has tas, nwg yuav muab pub rua mej.

¹³Thaus Vaajtswv coglug tseg rua Anplahaas, nwg has tseeb has tas, nwg yuav ua lawv le tej lug kws nwg cog tseg. Thaus nwg coglug tseg ntawd, nwg tuav nwg lub npe coglug xwb, rua qhov yeej tsi muaj ib tug kws muaj fwjchim luj dlua nwg.

¹⁴Vaajtswv has tas, “Kuv coglug tseg rua koj has tas, kuv yuav foom koob moov rua koj hab kuas koj cov xeebntxwv fuamvaam coob.”

¹⁵Anplahaas ua sab ntev tog, nwg txhaj tau tej kws Vaajtswv coglug tseg.

¹⁶Thaus ib tug tuabneeg yuav coglug, nwg yuavtsum tuav tug kws muaj fwjchim luj dlua nwg lub npe coglug. Tej kws nwg coglug ntawd txhaj yuav ua rua suavdlawg tsi muaj lug sis caav sis tshe.

¹⁷Vaajtswv xaav kuas cov kws yuav tau tej kws Vaajtswv coglug tseg lawm, puab paub tseeb has tas, Vaajtswv yeej tsi hloov tej kws nwg yuav ua, Vaajtswv txhaj has ib lu lug tseemceeb ntxiv rua lu lug kws nwg tau cog tseg lawm.

¹⁸Yog le ntawd, ob yaam nuav yeej hloov tsi tau, Vaajtswv tsi has dlaag. Peb cov kws tsiv dlim kev puamtsuaj lug nrug Vaajtswv nyob lawm, peb txhaj yuav ua taug sab ntev tog yaam kws peb ca sab has tas, yaav tom ntej nuav peb yuav tau.

¹⁹Qhov kws peb ca sab nuav zoo ib yaam le tug tswg kws muaj hlua khi peb lub sab kuas nyob ruaj ruaj. Qhov kws peb ca sab ntawd yuav coj peb hlaa dlhau dlaim ntaub kws thaiv huv lub Tuamtsev sau ntuj ceebtsheej moog rua saab huv.

²⁰Yexus tub xub ua peb ntej moog huv qhov chaw ntawd lawm. Nwg moog le ntawd tub yog nwg paab peb. Nwg ua tug Povthawj Hlub moog ibtxhis ib yaam le Mekhixedes.