Read Hmong Njua Henplais 7 Bible Online

Henplais 7 - Hmong Njua bible

Henplais 7

¹Tug Mekhixedes nuav ua vaajntxwv kaav lub nroog Xalees, Vaajtswv tug kws muaj fwjchim luj kawg nkaus tsaa nwg ua tug povthawj. Thaus Anplahaas moog ntaus rog, Anplahaas tua tau ntau tug vaajntxwv. Thaus nwg rov qaab lug, Mekhixedes tawm moog tog nwg hab foom koob moov rua nwg.

²Anplahaas muab tej qhov txhua chaw kws nwg txeeb tau lug ib feem kaum rua Mekhixedes. (Mekhixedes lub npe muaj ob lub ntsab lug. Thawj lub txhais has tas, “Tug Vaajntxwv kws Ncaaj nceeg”; hab vim nwg ua vaajntxwv kaav lub nroog Xalees, nwg txhaj muaj dlua ib lub npe kws txhais has tas, “Tug Vaajntxwv kws ua rua suavdlawg tau zoo nyob kaaj sab lug.”)

³Yeej tsi muaj ntaub ntawv sau qha tseg has tas, leejtwg yog Mekhixedes nam hab txiv lossis qha has tas, leejtwg yog nwg yawmkoob. Tsi muaj ntawv sau qha tseg has txug nub kws nwg yug lossis nub kws nwg tuag. Nwg ua tug povthawj moog ibtxhis le, ib yaam le Vaajtswv tug Tub.

⁴Yog le ntawd mej sim ua tuab zoo xaav saib, nwg muaj fwjchim luj npaum le caag dlag. Anplahaas tug kws yog cov Yudais tug yawmkoob, nwg txhaj muab tej qhov txhua chaw kws nwg txeeb tau lug thaus nwg moog ntaus rog ib feem kaum rua Mekhixedes.

⁵Vaajtswv txuj kevcai qha has tas, cov Levis cov xeebntxwv kws ua povthawj, puab yuavtsum sau cov Yixalayees tej qhov txhua chaw ib feem kaum coj lug ua puab tug. Puab ua le ntawd tub yog puab sau puab tuab tsaav tuabneeg tej qhov txhua chaw ntaag. Txawm yog puab yog Anplahaas cov xeebntxwv los puab tseem sau hab.

⁶Mekhixedes yeej tsi yog cov Levis xeebntxwv, tabsis nwg sau Anplahaas ib feem kaum hab nwg foom koob moov rua Anplahaas tug kws tau tej kws Vaajtswv coglug tseg.

⁷Qhov tseemceeb, tug kws foom koob moov yeej muaj fwjchim luj dlua tug kws tau txais koob moov.

⁸Txawm yog cov povthawj yog cov tuabneeg kws txawj pluj txawj tuag los puab tseem sau ib feem kaum, tabsis Mekhixedes tsi zoo le puab, nwg sau ib feem kaum. Lawv le muaj lug sau ca rua huv Vaajtswv txujlug lawm has tas, nwg yog tug kws muaj sa nyob.

⁹Tej zag yuav muaj ib tug has tas, thaus Anplahaas muab ib feem kaum rua Mekhixedes kuj yog cov Levis muab lawm hab. (Cov Levis tej xeebntxwv yeej yog cov kws sau suavdlawg ib feem kaum.)

¹⁰Rua qhov thaus Mekhixedes tawm moog tog Anplahaas, thaus ntawd cov Levis tseem nyob huv Anplahaas tug kws yog cov Levis tug yawmkoob tej roj ntshaa.

¹¹Yog le ntawd, yog cov povthawj kws yog xeem Levis coj tau tuabneeg lug cuag Vaajtswv lawm, ces tsi taag yuav muaj dlua ib tug povthawj kws muaj yaam ntxwv zoo le Mekhixedes lug hloov cov povthawj kws muaj yaam ntxwv zoo le Aloos. (Cov kws qha Vaajtswv txuj kevcai rua cov Yixalayees yog cov povthawj kws yog xeem Levis.)

¹²Rua qhov yog Vaajtswv hloov cov povthawj lawm, nwg yuavtsum hloov nwg tej kevcai hab.

¹³Peb tug Tswv kws peb has txug nuav yog lwm xeem. Xeem ntawd luas yeej tsi pub ib tug ua povthawj le.

¹⁴Suavdlawg puavleej paub tseeb has tas, Yexus Khetos yug huv xeem Yudas, hab Mauxes tsi tau has tas, xeem ntawd yuav muaj tug ua povthawj.

¹⁵Zaaj nuav ua rua suavdlawg paub has tas, tub muaj dlua ib tug povthawj lawm. Tug ntawd muaj yaam ntxwv zoo le Mekhixedes.

¹⁶Luas yeej tsi tsaa nwg ua povthawj lawv le tuabneeg tej kevcai, tabsis vim nwg yog tug kws muaj sa ntev dlhawv moog ibtxhis, nwg txhaj ua tau povthawj paab peb.

¹⁷Rua qhov Vaajtswv has txug nwg has tas, “Koj yuav ua povthawj moog ibtxhis ib yaam le Mekhixedes.”

¹⁸Yog le ntawd peb txhaj tso txuj qub kevcai tseg, rua qhov txuj kevcai ntawd paab tsi tau peb hab tsi tseemceeb.

¹⁹Mauxes txuj kevcai ua tsi tau kuas tuabneeg ua tau zoo kawg nkaus. Nwgnuav peb muaj ib qhov chaw ca sab kws tseemceeb dlua qhov ntawd. Vim le ntawd peb txhaj lug cuag tau Vaajtswv.

²⁰Dlua le ntawd, thaus Vaajtswv tsaa Yexus ua povthawj, Vaajtswv yeej coglug tseg, tabsis thaus lwm tug ua povthawj Vaajtswv tsi tau coglug tseg.

²¹Thaus Vaajtswv tsaa Yexus ua tug povthawj, Vaajtswv coglug tseg rua nwg has tas: “Tug Tswv coglug tseg has tas, ‘Koj yuav ua povthawj moog ibtxhis le.’ ”

²²Yog le ntawd, Yexus yog tug kws qha tseg has tas, txuj kevcai tshab zoo dlua txuj qub.

²³Xeem Levis pheej muaj tuabneeg sawv ua povthawj ib tam dlhau ib tam, rua qhov cov kws tuag ua tsi tau num lawm.

²⁴Tabsis Yexus muaj sa nyob moog ibtxhis, hab nwg teg num ua povthawj tsi poob moog rua lwm tug ua.

²⁵Tub yog vim le ntawd, nwg txhaj paab tau cov tuabneeg kws nwg coj lug cuag Vaajtswv, tsi has nwgnuav lossis yaav tom ntej, rua qhov nwg muaj sa nyob moog ibtxhis hab thov Vaajtswv paab cov tuabneeg ntawd.

²⁶Yog le ntawd Yexus yog tug Povthawj Hlub kws paab tau txhua tug kws thov nwg. Nwg yog tug kws zoo kawg nkaus, nwg tsi muaj ib qhov txhum le. Vaajtswv coj nwg tawm huv cov tuabneeg txhum moog nyob sau ntuj ceebtsheej.

²⁷Nwg tsi zoo le tej povthawj hlub, tsi taag nwg yuav naj nub muab tsaj coj lug tua theej nwg lub txhoj ua ntej maam le theej suavdlawg lub, ib yaam le tej povthawj hlub pheej ua. Nwg muab nwg lub cev theej suavdlawg lub txhoj tuab zag xwb, theej tau moog ibtxhis le lawm.

²⁸Mauxes txuj kevcai ibtxwm tsaa cov tuabneeg kws zoo tsi heev ua povthawj hlub, tabsis tej lug kws Vaajtswv cog tseg tom qaab Mauxes txuj kevcai, tsaa Leej Tub tug kws zoo kawg nkaus ua povthawj moog ibtxhis le.