Read Hmong Njua Henplais 8 Bible Online

Henplais 8 - Hmong Njua bible

Henplais 8

¹Zaaj kws peb taabtom has nuav lub ntsab lug tseemceeb has le nuav, peb muaj ib tug Povthawj hlub zoo le ntawd, nwg nyob ntawm tug kws muaj fwjchim luj kawg nkaus lub zwmtxwv saab xis sau ntuj ceebtsheej.

²Nwg ua tug Povthawj Hlub teg num huv Chaav Dlawbhuv Kawg Nkaus kws nyob huv lub tsevntaub tseemceeb kws yog tug Tswv ua tsi yog tuabneeg ua.

³Txhua tug povthawj hlub puavleej yog Vaajtswv tsaa lug ua cov kws muab khoom hab tua tsaj fij rua Vaajtswv. Yog le ntawd peb tug Povthawj Hlub yuavtsum muaj ib yaam dlaabtsi fij rua Vaajtswv hab.

⁴Yog nwgnuav nwg tseem nyob huv nplajteb nuav, nwg yuav tsi ua povthawj, rua qhov tub muaj cov povthawj kws muab khoom fij rua Vaajtswv lawv le cov Yudais txuj kevcai lawm.

⁵Tej num kws cov povthawj ntawd ua, tsuas yog tej kws muaj nyob sau ntuj tug yaam ntxwv hab tug dluab xwb. Ib yaam le thaus Mauxes taabtom yuav ua lub tsevntaub, Vaajtswv has rua Mauxes has tas, “Koj yuavtsum ua txhua yaam lawv le tej qauv kws kuv qha rua koj sau roob.”

⁶Tabsis Vaajtswv muab teg num kws tseemceeb dlua cov povthawj ntawd txuj rua Yexus ua. Ib yaam le txuj kevcai tshab kws Yexus ua kuas tuabneeg hab Vaajtswv sis cuag tau, txuj ntawd yeej zoo dlua txuj qub, rua qhov txuj ntawd muaj lug cog tseg has txug tej kws hajyam zoo dlua.

⁷Yog txuj qub kevcai zoo lawm, ces tsi taag yuav muaj dlua txuj tshab.

⁸Tabsis Vaajtswv thuam nwg tsaav tuabneeg has tas: “Tug Tswv has tas, muaj ib nub tom ntej nuav, Kuv yuav pub ib txuj kevcai tshab rua cov Yixalayees hab rua xeem Yudas.

⁹Txuj ntawd yuav zoo tsi thooj le txuj kws kuv muab rua puab cov yawmkoob, nub kws kuv muab txuj kevcai ntawd, kuv tuav puab teg coj puab tawm huv tebchaws Iziv lug. Puab tsi ua lawv le txuj kevcai kws kuv muab rua puab, yog le ntawd kuv txhaj tsi quavntsej puab le lawm.

¹⁰Txuj nuav yog txuj kevcai kws kuv yuav muab rua cov Yixalayees. Tug Tswv has tas, tom qaab ntawd kuv yuav ua kuas puab ncu ntsoov kuv txuj Kevcai, hab kuv yuav sau txuj kevcai ntawd rua huv puab lub sab. Kuv yuav yog puab tug Vaajtswv, hab puab yuav yog kuv tsaav tuabneeg.

¹¹Tsi taag puab yuav qha rua tej tuabneeg zej zog lossis qha puab tuab tsaav tuabneeg kuas paub tug Tswv, rua qhov puab txhua tug puavleej yuav paub kuv, tsi has tug hlub tug yau.

¹²Kuv yuav ua sab ntev rua txhua tug kws ua txhum, hab yuav tsi cim ntsoov puab lub txim ib zag le lawm.”

¹³Thaus Vaajtswv has txug ib txuj kevcai tshab tub yog nwg suav has tas, txuj qub kevcai tsi zoo siv lawm. Hab tej kws qub lawm tsi has yaam twg los yeej yuav puamtsuaj moog sai.