Read Hmong Njua Henplais 9 Bible Online

Henplais 9 - Hmong Njua bible

Henplais 9

¹Txuj qub kevcai yeej muaj lug qha kuas tuabneeg paub pehawm Vaajtswv, hab muaj ib qhov chaw kws tuabneeg ua ca rua suavdlawg moog pehawm Vaajtswv.

²Puab ua ib lub tsevntaub, chaav saab nrau suavdlawg hu has tas Chaw Dlawbhuv. Nyob huv muaj teeb, muaj rooj hab muaj cov ncuav fij rua Vaajtswv.

³Chaav kws nyob tom qaab ntawm dlaim ntaub thaiv kws yog dlaim ob kws moog rua saab huv, suavdlawg hu has tas Chaav kws Dlawbhuv Kawg Nkaus.

⁴Nyob huv chaav ntawd muaj ib lub rooj kub ca ua qhov chaw hlawv moov tshuaj tsw qaab, hab muaj ib lub Phijxaab vuam kub ntim txuj kevcai rua huv. Nyob huv lub phijxaab ntawd muaj ib lub taig kub kws muaj hau kaw ntim Manas. Muaj Aloos tug paas nreg kws hlaav nplooj hab muaj ob dlaim txag zeb kws sau Txuj Kevcai.

⁵Puab puab ob tug qhelunpees kws muaj Vaajtswv tug tshwjchim kws ci ntsaa ab rua sau lub phijxaab. Qhov ntawd yog Vaajtswv qhov chaw nyob. Puab puab ob tug qhelunpees ntawd nthuav tis vuv qhov chaw kws Vaajtswv zaam txim rua tuabneeg. Tabsis nwgnuav tsi yog lub sijhawm kws yuav qha zaaj nuav txhua txhua huv tuabsi.

⁶Thaus npaaj tej ntawd txhij rua huv lawm, cov povthawj yuavtsum naj nub moog huv lub tsevntaub chaav ntawd ua puab teg num.

⁷Tabsis tsuas yog tug Povthawj Hlub tuab leeg xwb txhaj moog tau rua huv Chaav Dlawbhuv. Ib xyoos nwg moog ib zag, nwg nqaa cov ntshaav tsaj coj moog fij dlaws nwg, hab dlaws suavdlawg tej kev txhum kws suavdlawg yuam kev ua lawm.

⁸Vaaj Ntsujplig tug Dlawbhuv qha tej ntawd rua suavdlawg paub tseeb has tas, thaus chaav nrau tseem muaj nyob Vaajtswv tsi qheb kev rua suavdlawg moog huv Chaav Dlawbhuv Kawg Nkaus.

⁹Chaav ntawd pev txug tam nuav ntaag. Lub ntsab lug txhais has tas, tej tsaj kws suavdlawg muab tua fij rua Vaajtswv paab tsi tau kuas cov tuabneeg kws tuaj pehawm Vaajtswv ua tau tuabneeg zoo.

¹⁰Tej ntawd tsuas yog zaub yog mov yog dlej haus, hab yog tej kevcai ntxuav xwb. Tej ntawd yog tej kevcai kws tuabneeg yuavtsum xyum coj moog txug nub kws Vaajtswv hloov dlua ib puas tsaav yaam tshab.

¹¹Tabsis Yexus Khetos tub lug ua tug Povthawj Hlub saib ib puas tsaav yaam zoo kws nwgnuav tub muaj lawm. Lub tsevntaub kws Yexus moog ua num huv, lub ntawd tseemceeb dlua hab zoo dlua lub qub. Lub ntawd tsi yog tuabneeg txhais teg ua hab tsi yog lub kws Vaajtswv tsim ca rua huv nplajteb nuav.

¹²Thaus Yexus moog huv lub tsevntaub ntawd, nwg moog huv Chaav Dlawbhuv Kawg Nkaus tuab zag xwb; nwg tsi nqaa ntshaav tshis hab ntshaav txiv nyuj coj moog theej txhoj, tabsis nwg muab nwg cov ntshaav theej peb lub txhoj kuas peb dlim peb lub txim moog ibtxhis le.

¹³Puab muab cov ntshaav tshis hab ntshaav txiv nyuj hab tej tshauv kws hlawv tug mivnyuas xyuas nyuj ntawd nphoo rua cov tuabneeg kws ua txhum kevcai. Tej ntawd sau cov tuabneeg ntawd tej kev txhum moog.

¹⁴Yog le ntawd, Yexus Khetos cov ntshaav hajyam muaj nqes heev dlua tej ntawd hab. Vaajtswv tug kws muaj sa nyob moog ibtxhis, nwg tug Ntsujplig kuas Yexus muab Yexus lub cev kws zoo kawg nkaus pub rua Vaajtswv theej tuabneeg lub txhoj. Nwg cov ntshaav ntxuav peb lub sab kuas peb dlim tej kev txhum kws peb tau ua lug lawm, peb txhaj yuav ua tau Vaajtswv tug kws muaj txujsa nyob teg num.

¹⁵Tub yog vim le ntawd, Yexus Khetos txhaj ua ib txuj kevcai tshab kuas cov tuabneeg kws Vaajtswv hu lug ua Vaajtswv tsaav tuabneeg lawm, tau koob moov moog ibtxhis lawv le tej lug kws Vaajtswv cog tseg. Puab yeej yuav tau, rua qhov muaj ib tug lug tuag theej puab tej kev txhum kws puab ua thaus puab tseem coj lawv le txuj qub kevcai.

¹⁶Yog thaus twg muaj tuabneeg muab dlaim ntawv kws sau qha faib qubtxeeg qubteg lug nyeem, yuavtsum muaj ib tug paub tseeb has tas, tug kws sau dlaim ntawv ntawd tuag lawm tag.

¹⁷Thaus tug kws sau dlaim ntawv ntawd tseem ua neej nyob, dlaim ntawv ntawd tsi tseemceeb dlaabtsi, tsuas tseemceeb thaus tug ntawd tuag lawm xwb.

¹⁸Peb txhaj paub has tas, txawm yog thawj txuj kevcai los yuavtsum muaj nqaj ndluag ntshaav nrug txhaj tseemceeb.

¹⁹Mauxes xub qha txhua nqai lawv le muaj huv Txuj Kevcai rua suavdlawg noog, nwg maam le muab ib re nplooj hixauv hab cov plaub yaaj kws puab muab zaas lab lug raus cov ntshaav txiv nyuj, hab ntshaav tshis tov dlej nchus rua phoo ntawv kws sau Vaajtswv Txuj Kevcai hab nchus rua cov pejxeem.

²⁰Mauxes has tas, “Cov ntshaav nuav ua lub cim nas rua txuj kevcai kws Vaajtswv kuas mej coj.”

²¹Mauxes muab ntshaav nchus rua lub tsevntaub hab tej qhov txhua chaw kws suavdlawg siv thaus puab pehawm Vaajtswv ib yaam nkaus le ntawd.

²²Qhov tseemceeb, lawv le Vaajtswv Txuj Kevcai yuav laug txhua yaam yuavtsum muaj nqaj ndluag ntshaav nrug txhaj lawv le kevcai. Yog nqaj tsi ndluag ntshaav tsi nrug Vaajtswv yeej zaam tsi tau tuabneeg lub txim.

²³Txawm yog tej ntawd puavleej pev txug tej kws nyob sau ntuj ceebtsheej los yuavtsum muaj nqaj ndluag ntshaav nrug txhaj lawv le kevcai. Tabsis tej kws nyob sau ntuj ceebtsheej yuavtsum muaj yaam kws tsimtxaj dlua tej ntawd txhaj hum Vaajtswv sab.

²⁴Rua qhov Yexus Khetos tsi moog huv Chaav Dlawbhuv kws yog tuabneeg txhais teg ua. Chaav ntawd tsuas yog Chaav Dlawbhuv tug yaam ntxwv xwb. Tabsis nwg moog sau ntuj ceebtsheej hab nyob ntawm Vaajtswv xubndlag thov Vaajtswv paab peb.

²⁵Cov Yudais tug Povthawj Hlub naj xyoo nqaa ntshaav tsaj moog huv Chaav Dlawbhuv Kawg Nkaus. Tabsis Yexus Khetos tsi naj xyoo muab nwg lub cev theej tuabneeg lub txhoj.

²⁶Yog Yexus ua le ntawd ces txij thaus tsim ntuj tsim teb lug, nwg yuavtsum ib sij raug kev txomnyem ib zag lug txug naj nub nwgnuav. Tabsis tam kawg nuav nwg tsuas lug tuab zag xwb, nwg muab nwg lub cev theej tau suavdlawg lub txhoj huv tuabsi lawm.

²⁷Txhua tug tuabneeg puavleej yuav tuag ib zag hab tom qaab ntawd Vaajtswv yuav txav txim rua puab.

²⁸Ib yaam le ntawd, Yexus Khetos muab nwg lub cev pub rua Vaajtswv tuab zag xwb, ris tau ntau leej lub txim. Nwg yuav rov qaab lug dlua ib zag. Zag nuav tsi yog nwg lug theej tuabneeg lub txhoj lawm, tabsis nwg lug paab cov tuabneeg kws taabtom tog nwg kuas puab dlim puab lub txim.