Read Hmong Njua Yakaunpaus 1 Bible Online

Yakaunpaus 1 - Hmong Njua bible

Yakaunpaus 1

¹Kuv yog Yakaunpaus kws yog Vaajtswv hab tug Tswv Yexus Khetos tug tubkhai: Kuv xaa tsaab ntawv nuav tuaj rua Vaajtswv tsaav tuabneeg kws tsiv moog nyob thoob plawg qhov txhua chaw huv qaab ntuj nuav.

²Cov kwvtij, thaus mej raug ntau yaam kev nyuaj sab, mej ca le suav has tas yog mej tau koob moov zoo kawg.

³Rua qhov mej tub paub lawm has tas, yog mej ua sab ntev nyaj tej kev nyuaj sab, ces tej ntawd yuav ua rua mej muab sab rau ntseeg ntxiv.

⁴Tabsis mej yuavtsum ua sab ntev moog le tsi xob tso tseg, mej txhaj yuav ua tau tuabneeg zoo kawg nkaus, tsi muaj ib qhov kws lwm tug yuav thuam tau.

⁵Yog mej leejtwg tsi muaj tswvyim, kuas nwg ca le thov ntawm Vaajtswv, Vaajtswv yuav pub tswvyim rua nwg, rua qhov Vaajtswv yog tug muaj sab dlawb sab zoo pub ib puas tsaav yaam rua suavdlawg, nwg tsi khauvxwm le.

⁶Tabsis thaus mej thov, mej yuavtsum ntseeg tsi xob ua xyem xyaav. Tug kws ua xyem xyaav, tug ntawd zoo ib yaam le tej dlej havtxwv kws cua ntsawj ndlaas moog ndlaas lug.

⁷Tug kws zoo le ntawd, nwg tsi xob xaav has tas nwg yuav tau txais ib yaam dlaabtsi ntawm Vaajtswv le,

⁸rua qhov nwg lub sab ywjfaab ywjfwj, nwg yuav ua yaam twg los nwg ua tsi tsheej.

⁹Tug kwvtij ntseeg kws pluag, nwg yuavtsum zoo sab rua thaus Vaajtswv tsaa nwg lub neej,

¹⁰hab tug kwvtij ntseeg kws npluanuj, nwg yuavtsum zoo sab rua thaus Vaajtswv txu nwg lub neej. Rua qhov cov tuabneeg kws npluanuj yuav pluj moog ib yaam le tej paaj ntoos.

¹¹Vim thaus nub tuaj tshaav ntuj kub tej paaj ntoos yuav ntsws hab zeeg taag tsi zoo nkauj lawm. Ib yaam nkaus le ntawd, tug kws npluanuj yuav raug kev puamtsuaj thaus nwg tseem taabtom ua nwg teg num ntxhuv quas nyo.

¹²Tug kws ua sab ntev tiv tej kev nyuaj sab, tug ntawd yuav tau nyob kaaj sab lug. Rua qhov thaus nwg tiv dlhau tej kev sim sab ntawm lawm, nwg yuav tau txujsa kws Vaajtswv coglug tseg lawm has tas, Vaajtswv yuav muab rua tug kws hlub Vaajtswv.

¹³Yog tej kev sim sab ntawd ua rua nwg yuam kev ua txhum, nwg tsi xob has tas, “Yog Vaajtswv sim kuv.” Rua qhov tej kev phem ntxag tsi tau Vaajtswv, hab Vaajtswv yeej tsi sim leejtwg sab le.

¹⁴Tabsis tug kws ua txhum, yeej yog nwg lub sab kws nyam ua phem coj nwg moog ua txhum.

¹⁵Thaus nwg lub sab xeeb txujkev xaav ua phem lawm, ces nwg moog ua txhum, hab thaus nwg ua txhum lawm, nwg yuav raug kev pluj kev tuag.

¹⁶Cov kwvtij kws kuv hlub, mej tsi xob pub leejtwg ntxag tau mej yuam kev.

¹⁷Ib puas tsaav yaam kws zoo hab ib puas tsaav yaam koob moov kws zoo kawg nkaus yeej yog Vaajtswv pub rua peb. Vaajtswv yog tug kws tsim lub nub, lub hli, hab tej nubqub kws nyob sau nruab ntug. Lub nub hab lub hli yeej ua rua lub nplajteb txawj kaaj hab txawj tsaus, tabsis Vaajtswv tsi zoo le ntawd, Vaajtswv yeej zoo Vaajtswv le qub.

¹⁸Vaajtswv pum zoo qha nwg txujlug tseeb rua peb, kuas peb tau lug ua nwg cov mivnyuas, hab ua ib puas tsaav yaam kws Vaajtswv tsim cov thawj.

¹⁹Cov kwvtij kws kuv hlub, mej yuavtsum ncu ntsoov has tas, txhua tug yuavtsum kub sab lug noog, tabsis tsi xob maaj has, hab tsi xob chim sai.

²⁰Rua qhov peb tej kev chim yeej paab tsi tau kuas peb ua tau tuabneeg ncaaj nceeg lawv le Vaajtswv lub sab nyam.

²¹Yog le ntawd, mej yuavtsum muab mej tej kev phem kev qas kws mej naj nub ua tso povtseg huv tuabsi. Mej ca le ua lawv le Vaajtswv has hab khaws nkaus Vaajtswv tej lug kws nwg muab cog rua huv mej lub sab lawm ca. Tej lug ntawd yuav paab tau kuas mej dlim mej lub txim.

²²Mej yuavtsum xyum ua lawv le Vaajtswv txujlug, tsi yog ua tug kws noog xwb. Yog mej noog xwb, tsi ua lawv le, ces kuj yog mej rov dlaag mej.

²³Rua qhov tug kws noog Vaajtswv txujlug taag lawm, tabsis nwg tsi ua lawv le ntawd, tug ntawd zoo ib yaam le tug kws nwg saib nwg lub ntsejmuag huv dlaim tsom av.

²⁴Thaus nwg saib taag nwg tawm moog lawm, nwg tsi ncu qaab has tas, nwg lub ntsejmuag zoo le caag lawm.

²⁵Tabsis tug kws ua tuab zoo saib tseeb tseeb txuj kevcai kws zoo kawg nkaus kws paab tau tuabneeg dlim lug nyob ywjpheej, tug kws khaws tej lug ntawd ca rua huv nruab sab hab xyum ua lawv le tej lug ntawd, hab tsi yog noog taag xwb tsi ncu qaab lawm, Vaajtswv yuav foom koob moov rua nwg.

²⁶Tug kws xaav has tas, nwg yog tug kws coj Vaajtswv txuj kevcai nruj lawm, tabsis yog nwg tsi ceev nwg tug nplaig, ces qhov kws nwg coj Vaajtswv txuj kevcai nruj le ntawd yeej tsi muaj nqes rua nwg le. Qhov kws nwg ua le ntawd yog nwg rov dlaag nwg xwb.

²⁷Txuj kevcai kws Vaajtswv tug kws yog peb leej Txiv suav has tas yog txuj kws zoo hab tseeb, txuj ntawd yog mej yuavtsum paab cov puj ntsuag hab cov mivnyuas ntsuag kws raug kev txomnyem quaj ntsuag. Hab mej tsi xob moog nrug tuabneeg nplajteb ua phem ua qas.