Read Hmong Njua Yakaunpaus 2 Bible Online

Yakaunpaus 2 - Hmong Njua bible

Yakaunpaus 2

¹Cov kwvtij, mej yog cov kws ntseeg peb tug Tswv Yexus Khetos tug kws muaj tshwjchim luj, mej tsi xob xaiv leejtwg ntsejmuag le.

²Pevxaam has tas, thaus mej tuaj ua ke noog lug qhuab qha, muaj ib tug npluanuj naav tsoog tsho zoo zoo, nwg coj nplhaib nyaj nplhaib kub, hab muaj ib tug txomnyem naav tsoog tsho khaub khaub hlaab, obtug tuaj noog lug qhuab qha,

³yog mej saib taug tug kws naav tsoog tsho zoo zoo, hab has rua nwg has tas, “Koj lug nyob ntawm lub rooj zoo zoo nuav,” tabsis mej has rua tug txomnyem has tas, “Koj sawv ntawm ko lossis koj lug nyob huv aav ntawm peb kutaw nuav.”

⁴Ces yog mej ua tsi ncaaj, hab xaiv tuabneeg ntsejmuag lawv le mej lub sab phem xaav xwb.

⁵Cov kwvtij kws kuv hlub, mej ca le noog kuv has! Vaajtswv xaiv cov tuabneeg pluag huv nplajteb nuav lug ua cov kws muab sab rau ntseeg Vaajtswv, hab lug ua Vaajtswv tsaav tuabneeg lawv le Vaajtswv tau coglug tseg lawm has tas tug kws noog Vaajtswv lug, tug ntawd yuav tau ua Vaajtswv tsaav tuabneeg.

⁶Tabsis mej saib tsi taug cov tuabneeg pluag! Cov tuabneeg kws tsimtxom mej hab caab mej moog cuag tug txav txim, tub yog cov tuabneeg npluanuj ntaag los sav.

⁷Puab yog cov kws thuam lub npe zoo kawg nkaus kws Vaajtswv tis rua mej.

⁸Yog mej ua lawv le Vaajtswv txuj kevcai kws sau ca rua huv Vaajtswv txujlug kws has tas, “Mej yuavtsum hlub kwvtij zej zog ib yaam le mej hlub mej lub cev txhaj yog mej ua zoo tag.”

⁹Tabsis yog mej xaiv tuabneeg ntsejmuag, ces yog mej ua txhum. Txawm yog Vaajtswv txuj kevcai los yeej qha has tas mej ua txhum lawm hab.

¹⁰Tug kws ua txhum Vaajtswv txuj kevcai ib nqai xwb, ces kuj yog nwg ua txhum txhua nqai huv tuabsi.

¹¹Rua qhov Vaajtswv tug kws has tas, “Tsi xob ntxag luas quaspuj, luas quasyawg,” nwg has dlua has tas “Tsi xob tua tuabneeg.” Ces txawm yog mej tsi tau ntxag luas quaspuj luas quasyawg los yog mej tua tuabneeg, ces yog mej ua txhum kevcai lawm.

¹²Yog le ntawd, mej yuavtsum ceevfaaj tej lug kws mej has hab tej num kws mej ua, rua qhov txuj kevcai kws paab tau mej dlim lug nyob ywjpheej ntawd, yuav txav txim rua mej.

¹³Nub kws Vaajtswv txav txim, Vaajtswv yuav txav txim rua tug kws tsi taabncuab lwm tug, tabsis Vaajtswv yuav tsi txav txim rua tug kws taabncuab lwm tug.

¹⁴Cov kwvtij, yog muaj ib tug has tas, nwg yog tug kws ntseeg Vaajtswv, tabsis nwg tsi ua lawv le nwg ntseeg, ces yuav muaj qaabhau dlaabtsi? Yog nwg has le ntawd xwb, nwg txujkev ntseeg puas yuav paab tau kuas nwg dlim?

¹⁵Yog mej pum cov kwvtij ntseeg, tsi has quaspuj lossis txivneej, puab tsi muaj noj lossis tsi muaj naav,

¹⁶mej has rua puab has tas, “Thov Vaajtswv foom koob moov rua mej kuas muaj noj muaj naav,” tabsis mej tsi muab ib yaam dlaabtsi rua puab le, qhov kws mej has le ntawd yuav muaj qaabhau dlaabtsi?

¹⁷Txujkev ntseeg los kuj ib yaam le ntawd: Yog mej has tas mej ntseeg, tabsis mej tsi ua ib yaam num tshwm ces mej txujkev ntseeg tub tuag lawm.

¹⁸Tej zag yuav muaj ib tug has rua kuv has tas, “Koj yog tug kws ntseeg, tabsis kuv yog tug ua num.” Kuv yuav teb tug ntawd has tas, “Koj sim qha koj txujkev ntseeg kws tsi ua num rua kuv saib zoo le caag? Kuv teg num maam le qha kuv txujkev ntseeg rua koj.”

¹⁹Koj ntseeg has tas yeej muaj tuab tug Vaajtswv xwb; koj ntseeg le ntawd zoo lawm. Dlaab los kuj ntseeg ib yaam nkaus le ntawd, hab dlaab ntshai Vaajtswv ua ib ce tshee nyo.

²⁰Tug tuabneeg ruag, kuv qha rua koj paub has tas, txujkev ntseeg kws tsi ua num yeej tsi muaj qaabhau dlaabtsi le.

²¹Peb yawmkoob Anplahaas ua le caag, nwg txhaj ua tau hum Vaajtswv sab? Qhov kws nwg ua tau hum Vaajtswv sab, yog qhov kws nwg muab Ixaj kws yog nwg tuab leeg tub tso rua sau lub thaaj, hab yuav muab tua fij rua Vaajtswv ntaag.

²²Koj tsi pum los? Anplahaas txujkev ntseeg hab nwg kev ua num moog ibtxig. Nwg teg num ua rua nwg txujkev ntseeg tav.

²³Tej nuav yeej muaj lawv le Vaajtswv txujlug sau tseg lawm has tas, “Vim Anplahaas ntseeg Vaajtswv, Vaajtswv txhaj le coj Anplahaas lug nrug Vaajtswv sis raug zoo.” Hab Vaajtswv txhaj has tas, Anplahaas yog nwg tug phoojywg.

²⁴Yog le ntawd mej txhaj pum has tas, tug kws Vaajtswv coj lug nrug Vaajtswv sis raug zoo, tug ntawd yeej ua num, nwg tsi yog tug kws ntseeg xwb.

²⁵Ib yaam le tug namndlav kws hu ua Lahaj, nwg hu ob tug txivneej kws tuaj soj tebchaws moog huv nwg tsev, hab qha kuas obtug tsiv lwm txujkev moog. Qhov kws nwg paab obtug le ntawd hum Vaajtswv sab.

²⁶Lub cev kws tsi muaj sa yog lub cev kws tuag lawm, ib yaam le ntawd txujkev ntseeg kws tsi ua num yog txujkev ntseeg kws tuag lawm hab.