Read Hmong Njua Yakaunpaus 3 Bible Online

Yakaunpaus 3 - Hmong Njua bible

Yakaunpaus 3

¹Cov kwvtij, tsi tsimnyog mej coob leej yuav ntshaw ua xwbfwb, rua qhov peb paub has tas Vaajtswv yuav ua tuab zoo taug peb cov kws yog xwbfwb nruj dlua le taug lwm tug.

²Peb txhua tug pheej ib sij ua yuam kev ib zag. Tug kws tsi tau has lug yuam kev ib zag le, tug ntawd yog tug kws zoo kawg nkaus, nwg tswj tau nwg lub sab hab nwg lub cev huv tuabsi.

³Peb saam xauv rua neeg, neeg txhaj noog peb lug, peb txhaj tswj tau kuas neeg moog qhov kws peb xaav moog.

⁴Mej yuavtsum xaav txug lub nkoj kws luj, txawm yog lub nkoj ntawd luj kawg le, hab cua dlaaj cua dlub ntsawj hlub npaum le caag los lub nkoj yeej moog lawv le tug dluav hlais dlej miv miv kws nyob tom tw nkoj kws tug tsaav nkoj fwj.

⁵Ib yaam nkaus le ntawd, txawm yog tug nplaig yog ib tug miv miv nyob ntawm lub cev xwb los tug nplaig muaj peevxwm has tau ntau zaaj. Mej sim xaav saib ib lub nyuas ncaig tawg miv miv xwb los muaj cuabkaav kub toj roob hauv peg txhua nrho.

⁶Tug nplaig zoo le suavtawg. Tug nplaig ua tau rua txujkev txhum nthuav luj moog thoob plawg yug lub cev. Tug nplaig zig tau suavtawg huv ntuj tawg lug hlawv peb txujsa.

⁷Tuabneeg cob tau txhua yaam tsaj kuas noog lug, tsi has naag noog, naab, hab tej tsaj kws nyob huv havtxwv los tuabneeg yeej cob tau.

⁸Tabsis tsi muaj leejtwg cob tau tug nplaig. Tug nplaig phem hab tswj tsi tau le, nwg muaj taug lom tuabneeg tuag.

⁹Peb siv peb tug nplaig ua Vaajtswv tug kws yog peb leej Txiv tsaug, hab peb siv peb tug nplaig tshev tej tuabneeg zej zog. Tej tuabneeg ntawd Vaajtswv tsim muaj tug yaam ntxwv zoo le Vaajtswv.

¹⁰Lu lug ua Vaajtswv tsaug hab lu lug tshev tuabneeg puavleej yog tug nplaig has. Cov kwvtij, tsi tsimnyog yuav muaj le ntawd.

¹¹Dlej qaab zib hab dlej ab yeej tsi txhawv huv tuab lub qhovdlej lug ib zag le.

¹²Cov kwvtij, tsob ntoo txiv ncuav pas yeej tsi txi txiv ntoo roj, hab tsob txiv maab yeej tsi txi txiv ncuav pas, hab lub qhovdlej dlaw yeej tsi txhawv dlej tsuag.

¹³Nyob huv mej cov yog tug twg txawj ntse hab totaub, tug ntawd ua nwg lub neej kuas zoo, ua nwg teg num kuas zoo lug ntawm kev txu fwjchim hab muaj tswvyim.

¹⁴Tabsis yog mej tseem muaj lub sab khib, cibnyeej hab xaav ua tug hlub, mej tsi xob khaav has tas mej muaj tswvyim hab ua tau num zoo. Yog mej khaav le ntawd, ces yog mej tawmtsaam Vaajtswv txujlug kws yog qhov tseeb xwb.

¹⁵Lub tswvyim zoo le ntawd yeej tsi yog lug sau ntuj lug, lub tswvyim ntawd yog nplajteb le, hab yog dlaab Ntxwgnyoog muab rua mej.

¹⁶Yog muaj kev sis ntxub hab muaj tuabneeg ntshaw ua tug hlub, yeej yuav muaj kev kub ntxhuv, hab yuav muaj ntau yaam kev phem.

¹⁷Tabsis lub tswvyim kws lug sau ntuj lug yog lub kws zoo kawg nkaus. Lub tswvyim ntawd tsi ntau ncauj, paub cai, has lug zoo, nrug luas ua phoojywg, hlub lwm tug, muab sab rau ua num zoo, tsi xaiv leejtwg ntsejmuag hab tsi zais sab.

¹⁸Cov tuabneeg kws ua rua suavdlawg nyob sis humxeeb, puab yuav paab tau suavdlawg ua tau tuabneeg ncaaj nceeg.