Read Hmong Njua Yakaunpaus 4 Bible Online

Yakaunpaus 4 - Hmong Njua bible

Yakaunpaus 4

¹Yaam dlaabtsi ua rua mej sis ntaus sis tua, hab ua rua mej sis caav sis tshe? Puas yog tej kev ntshaw kws nyob huv mej lub sab ua rua mej ua le ntawd?

²Mej xaav yuav yaam nuav yaam u, tabsis tsi tau, mej txawm yuav muab luas tua povtseg. Mej ntshaw luas tug, tabsis tsi tau, mej txawm sis caav sis tshe, sis ntaus sis tua. Mej tsi muaj tej kws mej xaav yuav, rua qhov mej tsi thov Vaajtswv.

³Thaus mej thov mej tsi tau, rua qhov mej lub sab phem, tej kws mej thov ntawd, mej yuav coj moog siv lawv le mej lub sab nyam xwb.

⁴Cov tuabneeg sab phem, mej tsi paub has tas cov kws ua le tuabneeg nplajteb ua, yog puab ua yeebncuab rua Vaajtswv. Yog le ntawd, tug kws ua le tuabneeg nplajteb ua, yog nwg txhobtxwm ua yeebncuab rua Vaajtswv.

⁵Vaajtswv txujlug has tas, “Lub sab kws Vaajtswv pub rua peb, lub sab ntawd ntshaw yaam nuav yaam u heev.” Mej tsi xob xaav has tas lu lug ntawd tsi tseeb.

⁶Tabsis txuj koob moov kws Vaajtswv pub rua peb hajyam zoo dlua tej kws peb lub sab ntshaw. Rua qhov Vaajtswv txujlug has tas, “Vaajtswv yuav tawmtsaam tug kws khaavtheeb, tabsis Vaajtswv yuav foom koob moov rua tug kws txu fwjchim.”

⁷Yog le ntawd, mej ca le noog Vaajtswv lug. Mej yuavtsum tawmtsaam dlaab Ntxwgnyoog, dlaab txhaj yuav tsiv ntawm mej moog.

⁸Mej ca le lug nyob ze Vaajtswv, Vaajtswv txhaj yuav lug nyob ze mej. Cov tuabneeg txhum, mej yuavtsum ntxuav mej tej teg kuas huv. Cov tuabneeg sab phem, mej yuavtsum tu mej lub sab kuas zoo.

⁹Mej yuavtsum nyuaj sab hab quaj ntsuag. Mej cov kws luag luag, mej ca le quaj. Mej cov kws zoo sab, mej ca le ntxhuv sab.

¹⁰Mej ca le txu mej lub fwjchim taabmeeg Vaajtswv, Vaajtswv txhaj yuav tsaa mej lub fwjchim.

¹¹Cov kwvtij, mej ib tug tsi xob has lug saib tsi taug ib tug. Tug kws has lug saib tsi taug nwg kwv nwg tij lossis txav txim rua nwg tej kwvtij, ces yog nwg saib tsi taug Vaajtswv txuj kevcai. Tug kws thuam Vaajtswv txuj kevcai, tug ntawd nwg tsi coj lawv le Vaajtswv txuj kevcai. Nwg yog tug kws thuam xwb.

¹²Vaajtswv tuab leeg xwb txhaj yog tug kws muab kevcai rua peb coj hab txav txim. Vaajtswv tuab leeg xwb txhaj yog tug kws paab tau kuas tuabneeg dlim txim hab ua tau kuas tuabneeg puamtsuaj. Mej xaav has tas mej yog leejtwg mej txhaj muaj cuabkaav txav txim rua lwm tug?

¹³Mej cov kws has tas, “Nub nua lossis pigkig, peb yuav moog rua lwm lub nroog. Peb yuav moog nyob huv lub nroog ntawd ib xyoos ua laag ua luam kuas tau nyaj ntau ntau.” Mej ca le noog kuv qha.

¹⁴Mej tub tsi paub has tas sov pigkig mej txujsa yuav zoo le caag. Mej txujsa zoo le tej fuab kws nyob ib plag xwb, ces tub yaaj taag lawm.

¹⁵Mej tsi xob has le ntawd, tsimnyog mej yuavtsum has tas, “Yog hum Vaajtswv sab, peb yuav ua yaam nuav yaam u.”

¹⁶Tabsis mej naj nub muab hlub hab khaavtheeb. Tej ntawd puavleej yog kev txhum huv tuabsi.

¹⁷Yog le ntawd tug kws paub ua qhov zoo, tabsis nwg tsi ua, tug ntawd txhum.