Read Hmong Njua Yakaunpaus 5 Bible Online

Yakaunpaus 5 - Hmong Njua bible

Yakaunpaus 5

¹Mej cov kws yog tuabneeg npluanuj, nwgnuav mej noog kuv has. Mej ca le quaj, rua qhov mej tub yuav raug kev txomnyem.

²Tej kws mej muaj tub lwj taag, hab mej tej rig tsho ntsaum kaabrwg tub noj taag lawm.

³Mej tej nyaj hab tej kub tub xeb taag lawm. Tej xeb ntawd yuav ua timkhawv tawmtsaam mej, hab yuav noj mej cev nqaj ib yaam le suavtawg kub. Mej cov kws nyob tam kawg nuav, mej naj nub khaws nyaj rua mej kuas mej npluanuj.

⁴Mej tsi them nqe zug rua cov tuabneeg kws mej ndlav ua laj ua teb. Mej ca le noog lub suab kws puab tshev mej saib! Cov tuabneeg kws mej ndlav hlais nplej, lub suab quaj tub nrov moog txug Vaajtswv tug kws muaj Fwjchim Luj kawg nkaus lub qhovntsej lawm.

⁵Mej ua neej nyob huv nplajteb nuav, mej muaj noj seem noj so hab naj nub muaj kev lomzem kawg le. Mej txaav kuas mej rog ib yaam le tug tsaj kws luas txaav ca tua noj.

⁶Mej rau txim hab tua tug tuabneeg kws tsi muaj txim los nwg tsi tawmtsaam mej le.

⁷Cov kwvtij, mej yuavtsum ua sab ntev tog nub kws peb tug Tswv Yexus lug. Mej sim saib tug tuabneeg kws ua laj ua teb saib, nwg ua sab ntev le caag tog lub caij cog qoobloo. Nwg ua sab ntev tog naag ntuj tshab hab naag ntuj tsaug.

⁸Mej yuavtsum ua lub sab ntev ib yaam le ntawd, mej tsi xob txhawj, rua qhov tub yuav txug nub kws tug Tswv lug.

⁹Cov kwvtij, mej ib tug tsi xob ywg ib tug, tug Tswv txhaj tsi txav txim rua mej. Tug kws yuav txav txim tub lug txug ntawm qhovrooj lawm.

¹⁰Cov kwvtij, mej yuavtsum ua sab ntev ib yaam le cov cev Vaajtswv lug kws tug Tswv tau khaiv lug qha suavdlawg. Txawm yog puab raug kev tsimtxom heev npaum le caag los puab tseem ua sab ntev tiv tej kev tsimtxom ntawd.

¹¹Cov tuabneeg kws ua sab ntev tiv tej kev tsimtxom, peb hu puab ua cov kws tau koob moov. Mej tub nov lawm has tas, Yauj yog tug kws ua sab ntev, hab mej tub paub lawm has tas tug Tswv npaaj txhua yaam rua Yauj thaus kawg. Rua qhov tug Tswv muaj lub sab taabncuab hab hlub.

¹²Cov kwvtij, qhov kws tseemceeb dlua tej kws kuv has lug lawm yog le nuav: Thaus mej coglug ib yaam dlaabtsi, mej tsi xob twv ntuj twv teb lossis twv txug ib yaam dlaabtsi hlo le. Yaam kws yog mej ca le has tas “Yog”, yaam kws tsi yog, mej ca le has tas “Tsi yog”, Vaajtswv txhaj yuav tsi txav txim rua mej.

¹³Mej cov yog leejtwg raug kev txomnyem, tug ntawd yuavtsum thov Vaajtswv. Yog leejtwg zoo sab, tug ntawd yuavtsum hu nkauj qhuas Vaajtswv.

¹⁴Mej cov yog leejtwg muaj mob, tug ntawd yuavtsum khaiv tuabneeg moog hu cov txwjlaug kws saib cov ntseeg tuaj thov Vaajtswv paab nwg, hab tuav tug Tswv lub npe muab roj pleev nwg.

¹⁵Yog puab ntseeg, tej lug kws puab thov yuav paab tau kuas tug kws muaj mob ntawd zoo. Tug Tswv yuav ntxiv sav ntxiv zug kuas nwg rov muaj zug le qub. Hab tug Tswv yuav zaam tug ntawd tej kev txhum huv tuabsi.

¹⁶Yog le ntawd, mej ib tug yuavtsum leeg kev txhum rua ib tug, hab ib tug thov Vaajtswv paab rua ib tug, mej tej mob txhaj yuav zoo. Tej lug kws tug tuabneeg ncaaj nceeg thov Vaajtswv, tej lug ntawd muaj fwjchim heev.

¹⁷Eliyas yog ib tug tuabneeg zoo le peb xwb, nwg kub sab lug thov kuas Vaajtswv tsi xob tso naag lug rua huv lub nplajteb nuav, ces naag txawm tsi lug tau peb xyoos hab rau lub hlis.

¹⁸Tom qaab ntawd nwg rov qaab thov Vaajtswv kuas Vaajtswv tso naag lug, ces Vaajtswv txawm tso naag lug rua huv lub nplajteb nuav, tej qoobloo txhaj tuaj taug.

¹⁹Cov kwvtij, yog mej cov muaj ib tug yuam kev tsi ua lawv le Vaajtswv txujlug tseeb lawm, hab muaj ib tug coj tau nwg rov qaab lug,

²⁰ces mej ncu ntsoov has tas, tug kws coj tau tug kws ua txhum rov qaab lug cuag Vaajtswv, kuj yog nwg paab tau tug kws yuam kev ua txhum ntawd tug ntsujplig