Read Hmong Njua 1 Petus 1 Bible Online

1 Petus 1 - Hmong Njua bible

1 Petus 1

¹Kuv yog Petus kws yog Yexus Khetos tug tubkhai, kuv sau tsaab ntawv nuav xaa tuaj rua mej txhua tug kws Vaajtswv tub xaiv ca lug ua Vaajtswv tsaav tuabneeg kws tsiv moog nyob txhua nrho txhua qhov chaw huv lub xeev Pootus, Kalatias, Kapadaukias, Axias hab Npithinias.

²Vaajtswv tug kws yog peb leej Txiv, nwg tub xaiv mej lug ua nwg tsaav tuabneeg hab nwg khaiv nwg tug Ntsujplig lug paab mej, kuas mej ua tau mej lub neej rua Vaajtswv tau ntsejmuag. Nwg muab Yexus Khetos cov ntshaav ntxuav mej lub sab kuas mej lub sab dlawbhuv, hab nwg xaav kuas mej noog Yexus Khetos lug. Thov Vaajtswv naj nub foom koob moov rua mej, hab paab kuas mej tau zoo nyob kaaj sab lug moog le.

³Peb yuavtsum ua Vaajtswv tug kws yog peb tug Tswv Yexus Khetos leej Txiv tsaug! Rua qhov nwg hlub peb kawg le, nwg txhaj tsaa Yexus Khetos sawv huv qhov tuag rov qaab lug paab peb, kuas peb muaj txujsa tshab. Nwg ua le nuav peb txujkev ca sab txhaj ruaj khov

⁴hab peb naj nub tog saib nub twg peb yuav tau txuj koob moov kws Vaajtswv npaaj tseg rua Vaajtswv tsaav tuabneeg. Vaajtswv tub khaws txuj koob moov ntawd ca rua sau ntuj ceebtsheej tog mej lawm. Txuj koob moov ntawd tsi txawj lwj, tsi txawj phem hab tsi txawj qub le.

⁵Vaajtswv tub npaaj tej ntawd ca rua mej lawm. Vaajtswv tug kws muaj fwjchim, nwg yuav tsomkwm mej cov kws ca sab rua nwg, hab thaus txug nub kawg Vaajtswv yuav ua rua suavdlawg pum has tas, mej tub dlim mej lub txim lawm.

⁶Txawm yog mej yeej yuav raug kev txomnyem nyuaj sab ib nyuas ntu los mej yuavtsum zoo sab rua qhov kws mej yuav dlim mej lub txim.

⁷Qhov kws Vaajtswv ca mej raug tej kev txomnyem ntawd, tub yog Vaajtswv sim saib mej muab sab rau ntseeg npaum le caag. Txawm yog kub los tuabneeg yuavtsum muab suavtawg sim saib puas tseem kub. Yog le ntawd, Vaajtswv yuavtsum muab mej txujkev ntseeg kws tseemceeb dlua kub sim saib puas yuav thev taug. Yog mej thev taug, thaus txug nub kws Yexus Khetos lug Vaajtswv yuav qhuas mej hab mej yuav tau ntsejmuag.

⁸Txawm yog mej tsi pum nwg los mej yeej hlub nwg, hab txawm yog mej qhovmuag tsi pum nwg los mej yeej ntseeg nwg. Yog le ntawd, mej txhaj zoo sab kawg nkaus tsi pum qaab yuav pav le,

⁹rua qhov mej taabtom txais txujkev dlim mej lub txim lawv le kws mej ca sab rua Vaajtswv.

¹⁰Cov cev Vaajtswv lug tub nrhav hab ua tuab zoo saib zaaj kws has txug txujkev dlim txim ntawd tseeb tseeb lawm, puab yog cov kws qha ua ntej has txug txuj koob moov kws Vaajtswv yuav pub rua mej.

¹¹Puab naj nub ua tuab zoo saib hov ntev txhaj txug lub sijhawm kws muaj le ntawd. Yexus Khetos tug Ntsujplig kws nyob huv puab lub sab qha rua puab has tas, thaus txug lub sijhawm ntawd Yexus Khetos yuav raug kev tsimtxom hab tom qaab ntawd Yexus yuav tau koob meej.

¹²Vaajtswv tub qha rua cov cev Vaajtswv lug paub lawm has tas, tej num kws puab ua ntawd tsi yog muaj nqes rua puab xwb, tabsis muaj nqes rua mej, naj nub nwgnuav cov tuabneeg kws qha Txujmoo zoo, puab tub qha tej zaaj tseemceeb ntawd rua mej paub lawm, puab yog cov kws muaj Vaaj Ntsujplig tug Dlawbhuv lub fwjchim.

¹³Yog le ntawd, mej yuavtsum tu mej lub sab zoo zoo tog, mej yuavtsum kub sab lug ua mej lub neej kuas hum Vaajtswv sab hab ca sab ntsoov has tas, thaus Yexus Khetos rov qaab lug Vaajtswv yuav pub Vaajtswv txuj koob moov rua mej.

¹⁴Yaav taag lug thaus mej tseem tsi tau paub Vaajtswv, mej naj nub nyam ua txhum, tabsis nwgnuav mej yuavtsum noog Vaajtswv lug, mej tsi xob ca tej kev phem kev qas kaav mej lub sab.

¹⁵Vaajtswv tug kws tau hu mej lug ua nwg tsaav tuabneeg, nwg yog tug kws dlawbhuv, yog le ntawd mej yuavtsum ua mej lub neej kuas dlawbhuv hab.

¹⁶Vaajtswv txujlug has tas, “Mej yuavtsum ua tuabneeg dlawbhuv, rua qhov kuv yog tug kws dlawbhuv.”

¹⁷Thaus mej thov Vaajtswv, mej hu nwg has tas Txiv, Vaajtswv yog tug kws txav txim rua txhua tug lawv le teg num kws suavdlawg tau ua lug lawm, nwg tsi xaiv leejtwg ntsejmuag; yog le ntawd mej yuavtsum fwm Vaajtswv moog taag mej simneej kws nyob huv nplajteb nuav.

¹⁸Rua qhov mej yeej paub lawm has tas, Vaajtswv tub txhwv mej dlim ntawm txuj qub kevcai kws mej cov yawmkoob qha rua mej lawm, yaam kws Vaajtswv muab txhwv mej, yaam ntawd tsi poob nqe le tej nyaj tej kub,

¹⁹yaam ntawd yog Yexus Khetos cov ntshaav kws muaj nqes heev, Yexus Khetos zoo le tug mivnyuas yaaj kws tsi muaj ib qhov phem lossis dlub dloog le.

²⁰Vaajtswv tub xub xaiv Yexus Khetos ca thaus tsi tau tsim ntuj tsim teb lug lawm, hab lub sijhawm kawg nuav Vaajtswv txhaj khaiv Yexus Khetos lug paab mej.

²¹Tub yog vim le ntawd, mej txhaj ntseeg Vaajtswv tug kws tsaa Yexus Khetos sawv huv qhov tuag rov qaab lug hab pub fwjchim rua nwg; yog le ntawd nwgnuav mej txhaj muab sab rau ntseeg hab ca sab rua Vaajtswv tuab leeg xwb.

²²Qhov kws mej noog lug rua qhov tseeb, ua rua mej muaj lub sab dlawbhuv, hab mej txhaj hlub txhua tug kws ntseeg Vaajtswv. Yog le ntawd mej ib leeg yuavtsum hlub ib leeg tag tag.

²³Rua qhov mej tub yug dlua tshab lawm, qhov kws mej tau yug dlua tshab ntawd tub yog vim mej ntseeg Vaajtswv txujlug kws muaj txujsa nyob moog ibtxhis. Tug kws yug mej ntawd, nwg tsi txawj tuag nwg muaj txujsa nyob moog ibtxhis.

²⁴Lawv le Vaajtswv txujlug has tas: “Tej tuabneeg txhua tug puavleej zoo ib yaam le tej nroj tsuag, hab puab lub fwjchim zoo ib yaam le tej paaj nroj xwb. Thaus tej nroj tsuag tuag, tej paaj nroj yuav zeeg taag,

²⁵tabsis Vaajtswv txujlug yuav nyob moog ibtxhis le.”