Read Hmong Njua 1 Petus 2 Bible Online

1 Petus 2 - Hmong Njua bible

1 Petus 2

¹Yog le ntawd, mej yuavtsum tso txhua yaam kev phem kev qas tseg, tsi xob dlaag, tsi xob ua tuabneeg ntsejmuag ncaaj sab nkhaus, tsi xob khib hab tsi xob thuam lwm tug.

²Mej yuavtsum ua le tug mivnyuas mog lab kws nyavnyuas yug, tug mivnyuas ntawd ib sij noj ib zag mig kws yog cov kua kig dlawbhuv ntawm saab ntsujplig. Yog mej haus cov kua mig ntawd mej yuav hlub zoo hab mej yuav dlim mej lub txim.

³Lawv le Vaajtswv txujlug has tas, “Mej tub tau saaj tug Tswv txuj koob moov lawm.”

⁴Mej ca le lug cuag peb tug Tswv kws muaj sa nyob, nwg yog lub pobzeb kws tuabneeg muab povtseg, rua qhov puab has tas lub ntawd tsi muaj nqes; tabsis Vaajtswv xaiv lub ntawd, rua qhov Vaajtswv pum has tas lub ntawd yog lub kws muaj nqes heev.

⁵Mej yog cov pobzeb kws Vaajtswv xaav muab lug ua lub tuamtsev rua saab ntsujplig, yog le ntawd mej ca le lug cuag Vaajtswv. Mej yog cov povthawj kws dlawbhuv kws ua num huv lub Tuamtsev, tej num kws mej ua hum Vaajtswv sab, rua qhov mej yog cov kws ntseeg Yexus Khetos.

⁶Rua qhov Vaajtswv txujlug has tas: “Kuv xaiv ib lub pobzeb ua lub kws muaj nqes heev, kuv coj lub pobzeb ntawd moog teeb ua lub thawj rua huv lub nroog Xi-oos.”

⁷Lub pobzeb nuav muaj nqes rua mej txhua tug kws ntseeg, tabsis tsi muaj nqes rua cov kws tsi ntseeg: “Lub pobzeb kws cov kws ua tsev muab povtseg lawm, Vaajtswv tub muab lub pobzeb ntawd lug ua lub thawj lawm.”

⁸Hab muaj dlua lwm nqai has tas, “Tuabneeg yuav dlawm lub pobzeb ntawd hab lub pobzeb ntawd yuav ua rua puab qaug.” Qhov kws puab dlawm ntawd tub yog puab tsi ntseeg Vaajtswv txujlug lawv le Vaajtswv tub tu tseg rua puab lawm.

⁹Tabsis mej yog tsaav tuabneeg kws Vaajtswv tub xaiv ca lawm, mej yog cov povthawj kws ua Vaajtswv teg num, mej yog tsaav tuabneeg kws dlawbhuv, hab mej yog Vaajtswv tsaav tuabneeg kws Vaajtswv yuav khaiv moog qha tej num tseemceeb kws Vaajtswv tau ua lug lawm rua suavdlawg paub. Vaajtswv yog tug kws hu mej tawm huv qhov tsaus ntuj lug nyob huv qhov pum kev.

¹⁰Yaav taag lug mej tsi yog Vaajtswv tsaav tuabneeg, tabsis nwgnuav mej yog Vaajtswv tsaav tuabneeg lawm; yaav taag lug mej tsi tau Vaajtswv txujkev taabncuab, tabsis nwgnuav mej tub tau Vaajtswv txujkev taabncuab lawm.

¹¹Cov kwvtij, mej ca le noog kuv tej lug, kuv yuav ntuag mej txhua tug. Mej tsi muaj tsev nyob huv nplajteb nuav, mej nyob ib yaam le cov tuabneeg kws taug kev tuaj ua qhua xwb. Mej tsi xob ca tej kev phem kev qas kws naj nub tawmtsaam mej kaav mej lub sab.

¹²Mej yuavtsum ua mej lub neej kuas zoo, txawm yog cov tuabneeg tsi ntseeg Vaajtswv kws nrug mej koom zej koom zog nyob ua ke, puab thuam has tas mej ua phem los puab yeej yuav pum teg num zoo kws mej ua, hab thaus txug nub kws Yexus rov qaab lug puab yuav qhuas Vaajtswv.

¹³Mej yog cov kws ntseeg peb tug Tswv Yexus, yog le ntawd mej yuavtsum noog numtswv lug, hab ua lawv le tej kevcai kws numtswv qha. Mej yuavtsum noog Fuabtais lug, rua qhov nwg yog tug kws muaj fwjchim luj dlua ndlais tej numtswv huv tuabsi;

¹⁴hab mej yuavtsum noog cov tswv xeev lug, rua qhov Fuabtais tsaa puab ua cov kws rau txim rua cov tuabneeg kws ua txhum, hab qhuas cov tuabneeg kws ua zoo.

¹⁵Vaajtswv xaav kuas mej ua tej num zoo, cov tuabneeg kws tsi muaj tswvyim kws pheej laam tau laam has tej zaaj kws tsi muaj hauvpaug hauvntsis, puab txhaj yuav tsi muaj lug has lawm.

¹⁶Mej yuavtsum nyob le tug kws muaj kev ywjpheej; txawm yog mej muaj kev ywjpheej los Vaajtswv yeej txwv tsi pub mej moog ua txhum, mej yuavtsum ua le mej yog Vaajtswv cov tubkhai.

¹⁷Mej yuavtsum saib taug suavdlawg hab hlub cov ntseeg, mej yuavtsum paub ntshai Vaajtswv hab fwm Fuabtais.

¹⁸Mej cov kws yog tubqhe, mej yuavtsum noog mej tug tswv lug hab fwm nwg, tsi yog mej yuav noog tug tswv kws hlub mej hab ua sab ntev rua mej lug xwb, tabsis mej yuavtsum noog tug kws ua limham rua mej hab.

¹⁹Yog mej tsi tau ua txhum, tabsis luas tsimtxom mej hab mej ua sab ntev nyaj, rua qhov mej paub has tas Vaajtswv yeej xaav kuas mej ua le ntawd, Vaajtswv yuav foom koob moov rua mej.

²⁰Yog mej raug ntaus vim mej ua txhum, txawm yog mej ua sab ntev nyaj los yeej tsi muaj leejtwg qhuas mej. Tabsis yog mej raug tsimtxom vim mej ua zoo, hab mej ua sab ntev nyaj, Vaajtswv yuav foom koob moov rua mej.

²¹Vaajtswv xaav kuas mej muaj lub sab zoo le ntawd, rua qhov Yexus Khetos tub raug kev txomnyem this mej hab ua yaam ntxwv rua mej xyum lawm, nwg ua le ntawd mej txhaj yuav ua tau le nwg ua.

²²Yexus tsi tau ua ib qho txhum, hab tsi muaj leejtwg nov nwg has ib lu lug dlaag le.

²³Thaus luas thuam nwg, nwg tsi teb luas ib lus le; hab thaus luas tsimtxom nwg, nwg tsi foom luas, tabsis nwg muab tej ntawd tso rua Vaajtswv tug kws txav txim ncaaj nceeg.

²⁴Yexus Khetos yog tug kws ris peb lub txim sau tug ntoo khaublig, kuas txujkev txhum tsi muaj fwjchim kaav peb, peb txhaj ua tau tuabneeg ncaaj nceeg. Yexus tej qhov txhaab kws luas nplawm tub khu mej tej mob zoo taag lawm.

²⁵Yaav taag lug mej zoo le paab yaaj kws yuam kev lawm, tabsis nwgnuav tug Tswv kws yug mej hab saib mej lub sab, nwg tub coj mej rov qaab lug nrug nwg ua ke lawm.