Read Hmong Njua 1 Petus 3 Bible Online

1 Petus 3 - Hmong Njua bible

1 Petus 3

¹Ib yaam nkaus le ntawd, mej cov kws yog quaspuj, mej yuavtsum noog mej cov quasyawg lug, txawm yog mej cov quasyawg muaj qee leej tsi ntseeg Vaajtswv txujlug los thaus puab pum mej coj mej lub neej zoo, puab yuav lug ntseeg tsi taag mej yuav has ib lus le,

²rua qhov puab yeej yuav pum qhov kws mej coj mej lub neej zoo hab fwm puab.

³Mej tsi xob xaav has tas, mej yuavtsum ntxag plaubhau zoo zoo lossis coj nyaj coj kub lossis naav tej tsoog zoo zoo, mej txhaj yuav zoo nkauj.

⁴Tsi yog le ntawd, qhov kws mej zoo nkauj yog qhov kws mej muaj lub sab dlawb sab zoo hab paub cai, txhaj yog qhov kws Vaajtswv pum has tas muaj nqes.

⁵Cov quaspuj txheej thaus u kws noog Vaajtswv lug hab muab sab rau ntseeg, puab muaj lub sab zoo le ntawd hab puab noog puab cov quasyawg lug.

⁶Xalas muaj lub sab zoo le ntawd, nwg noog Anplahaas lug hab hu Anplahaas has tas tug tswv. Nwgnuav mej yog Xalas cov ntxhais, yog mej ua zoo mej yeej yuav tsi ntshai ib yaam dlaabtsi le.

⁷Mej cov kws yog quasyawg, mej yuavtsum naj nub ncu ntsoov has tas, quaspuj tsi muaj zug le mej. Yog le ntawd, mej yuavtsum saib taug mej tej quaspuj, rua qhov Vaajtswv yeej yuav pub txujsa rua puab hab rua mej ib yaam nkaus. Yog mej ua le ntawd, thaus mej thov Vaajtswv txhaj tsi muaj ib yaam dlaabtsi lug taabkaum mej.

⁸Thaus kawg nuav kuv thov ntuag mej has tas, mej yuavtsum ua ib lub sab hab ib leeg hlub ib leeg ib yaam le kwvtij sis hlub. Ib leeg paab ib leeg hab ib leeg saib taug ib leeg.

⁹Mej tsi xob ua phem pauj phem, yog leejtwg foom phem rua mej, mej tsi xob foom phem pauj, tabsis mej ca le thov Vaajtswv foom koob moov rua nwg. rua qhov thaus Vaajtswv hu mej lug, Vaajtswv coglug tseg has tas Vaajtswv yuav foom koob moov rua mej.

¹⁰Lawv le Vaajtswv txujlug has tas: “Tug kws xaav tau kev kaaj sab hab muaj lub neej zoo, tug ntawd yuavtsum tsi xob has lug phem hab tsi xob has lug dlaag.

¹¹Nwg yuavtsum tso nwg tej kev phem tseg hab ua txuj zoo; nwg yuavtsum muab sab rau nrhav kev tau zoo nyob kaaj sab lug.

¹²Rua qhov Vaajtswv yeej saib ntsoov cov tuabneeg kws ncaaj nceeg, hab nwg naj nub noog puab tej lug thov; tabsis nwg tawmtsaam cov tuabneeg kws ua phem.”

¹³Yog mej ua mej lub neej zoo, leejtwg yuav ua tau phem rua mej?

¹⁴Yog mej ua mej lub neej zoo lawm, txawm yog muaj tuabneeg tsimtxom mej los mej yeej yuav muaj kev kaaj sab; mej tsi xob ntshai puab hab tsi xob txhawj.

¹⁵Mej yuavtsum fwm Yexus Khetos hab ca nwg ua tug Tswv kaav mej lub sab. Mej yuavtsum npaaj txhij txhua lub sijhawm yog thaus twg muaj tuabneeg nug mej has tas vim le caag mej muaj chaw ca sab, thaus ntawd mej txhaj le paub teb puab.

¹⁶tabsis mej yuavtsum muaj lub sab mog sab muas teb puab. Yog mej muaj lub sab zoo le ntawd lawm, thaus cov tuabneeg kws thuam mej pum tej num zoo kws mej cov ntseeg ua, puab yuav txaajmuag rua tej lug kws puab has.

¹⁷Vim yog mej ua zoo, es mej txhaj raug kev tsimtxom, qhov ntawd hum Vaajtswv sab dlua qhov kws mej ua phem, es mej raug kev tsimtxom.

¹⁸Rua qhov Yexus Khetos tuag tuab zag xwb txhwv tau suavdlawg lub txim lawm, nwg yog tug ncaaj nceeg, nwg tuag txhwv cov kws tsi ncaaj nceeg, nwg ua le ntawd nwg txhaj coj tau mej moog cuag Vaajtswv. Luas muab nwg lub cev tua tuag, tabsis nwg tug Ntsujplig sawv rov qaab lug,

¹⁹hab nwg moog qha Vaajtswv txujlug rua cov ntsujplig kws luas muab kaw ca lawm.

²⁰Cov ntsujplig ntawd yog cov tuabneeg kws tsi noog Vaajtswv lug thaus lub sijhawm kws Nau-es txua nkoj, Vaajtswv ua sab ntev rua puab cov ntawd, tabsis puab tsi noog Vaajtswv lug. Cov tuabneeg kws moog nyob huv lub nkoj tsi muaj pistsawg leej, tsuas muaj yim leej xwb, yim leej ntawd txhaj dlim dlej nyaab,

²¹cov dlej ntawd pev txug txuj kevcai raus dlej kws qha has tas mej tub dlim mej lub txim lawm. Txuj kevcai ntawd tsi tau has tas, yuav ntxuav mej lub cev kuas huv, tabsis qha has tas mej yog cov kws tau coglug tseg rua Vaajtswv lawm has tas, mej yuav ua lawv le Vaajtswv lub sab nyam. Txuj kevcai raus dlej nuav paab tau mej dlim, rua qhov Yexus Khetos tub sawv huv qhov tuag lug lawm,

²²nwg moog rua sau ntuj ceebtsheej hab nwg nyob ntawm Vaajtswv saab xis, nwg kaav taagnrho cov timtswv sau ntuj hab cov kws muaj fwjchim huv tuabsi.