Read Hmong Njua 1 Petus 4 Bible Online

1 Petus 4 - Hmong Njua bible

1 Petus 4

¹Yexus Khetos tub raug kev tsimtxom lawm, yog le ntawd mej yuavtsum xaav ib yaam le Yexus, mej txhaj le yuav muaj zug. Rua qhov tug kws raug kev tsimtxom, tug ntawd tub tso nwg txujkev txhum tseg lawm.

²Yog le ntawd, txij nuav moog mej yuavtsum ua mej lub neej lawv le Vaajtswv lub sab nyam, mej tsi xob ca kev phem kev qas kaav mej lub sab.

³Yaav taag lug mej naj nub ua le cov kws tsi ntseeg Vaajtswv ua. Mej nyam ua phem ua qas, quav cawv, noj tsau haus qaug, qw ua nqaaj ua nqug hab pe dlaab pe mlom.

⁴Nwgnuav cov kws tsi ntseeg Vaajtswv puab xaav tsi thoob, sov ua le caag mej tsi nrug puab moog ua phem ua qas, yog le ntawd puab txhaj thuam mej.

⁵Tabsis puab cov ntawd nyag yuavtsum qha nyag lub neej rua Vaajtswv, Vaajtswv tub npaaj txhij lawm, nwg yuav txav txim rua cov tuabneeg caj hab cov tuabneeg tuag.

⁶Tub yog vim le ntawd txhaj muaj tuabneeg qha Txujmoo Zoo rua cov tuabneeg kws tub tuag lawm hab, kuas Vaajtswv txav txim rua puab ib yaam le txav txim rua suavdlawg; qha Txujmoo Zoo rua puab kuas thaus puab moog nrug Vaajtswv nyob, puab txhaj ua tau puab lub neej zoo ib yaam le Vaajtswv lub.

⁷Nwgnuav tub yuav txug lub sijhawm kws ib puas tsaav yaam huv nplajteb nuav puamtsuaj. Yog le ntawd mej yuavtsum tswj mej lub sab, ceevfaaj hab nquag thov Vaajtswv.

⁸Qhov kws tseemceeb tshaaj plawg huv tuabsi, yog mej ib leeg yuavtsum hlub ib leeg tag tag, rua qhov txujkev hlub npug tau txhua yaam kev txhum huv tuabsi.

⁹Mej ib leeg yuavtsum zoo sab hlo hu ib leeg lug tsev tsi xob ywg le.

¹⁰Vaajtswv tub pub koob moov rua mej txhua tug lawm, yog le ntawd mej yuavtsum siv tej koob moov kws mej tau ntawd kuas muaj nqes rua lwm tug.

¹¹Tug kws qha Vaajtswv txujlug, nwg yuavtsum qha; tug kws paab ua num, nwg yuavtsum siv nwg tug dlaag tug zug kws Vaajtswv pub rua nwg, yog mej cov kws ntseeg Yexus Khetos ua le ntawd, mej yuav ua rua Vaajtswv tau ntsejmuag, Vaajtswv lub koob meej hab Vaajtswv lub fwjchim yeej yuav nyob moog ibtxhis le! Amees.

¹²Cov kwvtij kws kuv hlub, mej tsi xob poob sab thaus mej raug kev tsimtxom, tej kws mej raug ntawd tub yog sim mej sab, mej tsi xob xaav has tas tej kev tsimtxom ntawd tsi zoo le tej kws suavdlawg ibtxwm raug.

¹³Tabsis mej yuavtsum zoo sab, rua qhov kws mej raug kev tsimtxom ib yaam le Yexus Khetos tub raug lug lawm. Thaus suavdlawg pum nwg tug tshwjchim kws ci ntsaa ab, mej yuav zoo sab kawg nkaus le.

¹⁴Yog leejtwg thuam mej vim mej yog cov kws ntseeg Yexus Khetos, mej ca le zoo sab; qhov kws puab thuam mej ntawd qha rua suavdlawg paub has tas, Vaajtswv tub khaiv Vaaj Ntsujplig lug nrug mej nyob lawm, Vaajtswv tug Ntsujplig ntawd yog tug kws muaj tshwjchim ci ntsaa ab.

¹⁵Mej tsi xob tua tuabneeg, tsi xob ua tubsaab, tsi xob ua phem hab tsi xob thaab plaub, yog leejtwg ua le nuav, tug ntawd yeej yuav raug kev txomnyem.

¹⁶Tabsis yog mej cov kws ntseeg Yexus Khetos, mej raug kev tsimtxom, mej ca le ua Vaajtswv tsaug, mej tsi xob txaajmuag qha rua cov tuabneeg kws tsimtxom mej ntawd has tas, mej yog cov kws ntseeg Yexus Khetos.

¹⁷Nwgnuav tub txug lub sijhawm kws Vaajtswv yuav txav txim lawm, Vaajtswv yuav xub taug cov kws ntseeg Vaajtswv zaaj ua ntej. Yog Vaajtswv xub taug peb zaaj ua ntej, thaus Vaajtswv taug cov kws tsi ntseeg Vaajtswv Txujmoo Zoo zaaj, puab yuav ua le caag?

¹⁸Lawv le Vaajtswv txujlug has tas, “Yog cov tuabneeg ncaaj nceeg tub dlim txim nyuaj, yog le ntawd cov tuabneeg txhum kws tsi muaj Vaajtswv, puab yuav ua le caag dlim tau?”

¹⁹Yog le ntawd, mej cov kws Vaajtswv pum zoo ca mej raug kev txomnyem, mej yuavtsum kub sab lug ua tej num zoo, hab tso sab plhuav rua tug kws Tsim mej, nwg yeej yuav ua lawv le nwg tau coglug tseg lawm.