Read Hmong Njua 2 Petus 1 Bible Online

2 Petus 1 - Hmong Njua bible

2 Petus 1

¹Kuv yog Ximoos Petus tug kws yog ib tug tubkhai hab yog Yexus Khetos tug timthawj. Kuv sau tsaab ntawv nuav xaa moog rua txhua tug kws ntseeg Yexus Khetos tug kws yog peb tug Vaajtswv hab peb tug Cawmseej kws yog tug ncaaj nceeg. Nwg pub mej hab peb muaj cuabkaav lug ntseeg ib yaam nkaus.

²Thov Vaajtswv foom koob moov hab pub txujkev kaaj sab rua mej txhua tug kws paub Vaajtswv hab paub peb tug Tswv Yexus Khetos lawm.

³Vaajtswv tug kws muaj fwjchim, nwg pub txhua yaam zoo rua peb, kuas peb ua tau peb lub neej hum nwg sab. Nwg ua le ntawd rua qhov peb paub tug kws hu peb lug yuav nwg lub fwjchim, hab paab tau peb ua tau tuabneeg ncaaj nceeg ib yaam le nwg.

⁴Vaajtswv coglug tseg has tas, nwg yuav muab nwg txuj koob moov kws zoo kawg nkaus rua peb, nwg ua le ntawd kuas mej txhua tug kws tau txuj koob moov ntawd dlim tej kev phem kev qas kws yuav coj tuabneeg nplajteb moog raug kev puamtsuaj, hab kuas mej lub neej zoo ib yaam le Vaajtswv lub.

⁵Tub yog vim le ntawd, mej cov kws ntseeg Vaajtswv, mej yuavtsum muab sab rau ua tej num zoo; mej ua num zoo lawm, mej yuavtsum muaj tswvyim;

⁶mej muaj tswvyim lawm, mej yuavtsum tswj mej lub sab; mej tswj mej lub sab lawm, mej yuavtsum ua sab ntev; mej ua sab ntev lawm, mej yuavtsum ua mej lub neej kuas hum Vaajtswv sab;

⁷mej ua hum Vaajtswv sab lawm, mej yuavtsum sis hlub le kwvtij sis hlub; mej sis hlub le kwvtij lawm, mej yuavtsum sis hlub le cov ntseeg sis hlub.

⁸Yog mej naj nub ua mej lub neej zoo le ntawd, tej ntawd yuav ua rua mej paub peb tug Tswv Yexus Khetos heev ntxiv, hab mej lub neej yuav tawg paaj txi txiv.

⁹Tabsis tug kws tsi ua nwg lub neej zoo le ntawd, tug ntawd qhovmuag faam lawm, nwg pum tsi tseeb hab nwg tsi ncu qaab has tas, Yexus Khetos tub ntxuav nwg tej kev txhum huv tuabsi lawm.

¹⁰Yog le ntawd cov kwvtij, mej yuavtsum muab sab rau ua num heev dlua yaav taag lug txhaj tsimnyog qhov kws Vaajtswv hu hab xaiv mej ca lawm. Yog mej ua le ntawd, mej yuav tsi yuam kev ib zag le.

¹¹Yog mej ua le ntawd, Vaajtswv txhaj yuav pub mej muaj feem moog nyob huv peb tug Tswv Yexus Khetos tug kws yog peb tug Cawmseej lub tebchaws kws nyob moog ibtxhis le.

¹²Yog le ntawd, kuv yuav naj nub ntuag mej kuas mej ncu ntsoov tej nuav, txawm yog mej tub paub tej ntawd hab mej muab sab rau ua lawv le Vaajtswv txujlug lawm los kuv tseem yuav ntuag mej hab.

¹³Thaus kuv tseem ua neej nyob nuav kuv xaav has tas, tsimnyog kuv yuavtsum ntuag kuas mej ncu ntsoov tej ntawd.

¹⁴Rua qhov kuv yeej paub has tas, tshuav tsi ntev kuv yuav tso kuv lub cev kws txawj tuag nuav tseg, lawv le peb tug Tswv Yexus Khetos tub qha tseeb rua kuv lawm.

¹⁵Yog le ntawd, kuv xaav kuas mej ncu tej ntawd ca, thaus dlua kuv lawm mej txhaj yuav ncu ntsoov moog le.

¹⁶Peb tub qha zaaj kws has txug peb tug Tswv Yexus Khetos lub fwjchim hab zaaj kws nwg yuav rov qaab lug rua mej lawm; thaus peb qha tej ntawd rua mej, peb tsi tau qha lawv le tej lug nruag kws cov tuabneeg txawj ntse has, tabsis peb lub qhovmuag yeej pum kag nwg lub fwjchim lawm ntaag.

¹⁷Thaus Vaajtswv tug kws yog leej Txiv pub koob meej hab pub tug tshwjchim kws ci ntsaa ab rua nwg, thaus ntawd peb yeej nrug nwg nyob ua ke, hab muaj lub suab kws has huv tug Tshwjchim kws Ci Ntsaa Ab tuaj rua nwg has tas, “Tug nuav yog kuv tug Tub kws kuv hlub, kuv txaus sab heev rua nwg.”

¹⁸Thaus peb nrug nwg nyob sau lub roob dlawbhuv ntawd, peb puavleej nov lub suab kws has sau ntuj tuaj rua nwg.

¹⁹Yog le ntawd, peb hajyam ca sab rua tej kws cov cev Vaajtswv lug tau qha tseg lawm. Yog mej khaws tej lug ntawd ca rua huv mej lub sab yuav zoo heev, rua qhov tej lug ntawd zoo ib yaam le lub teeb kws ci huv qhov tsaus ntuj moog txug thaus kaaj ntug, hab lub nubqub kws ci ci thaus yuav kaaj ntug yuav ci rua huv mej lub sab.

²⁰Dlua le ntawd, mej yuavtsum ncu ntsoov has tas, yeej tsi muaj ib tug kws yuav muaj tswvyim txhais tau tej lug qha tshwm kws cov cev Vaajtswv lug tau sau tseg lawm.

²¹Rua qhov tej lug qha tshwm ntawd tsi yog tuabneeg qha, tabsis yog Vaaj Ntsujplig tug Dlawbhuv tshoov tuabneeg lub sab kuas puab qha Vaajtswv txujlug xwb.