Read Hmong Njua 2 Petus 2 Bible Online

2 Petus 2 - Hmong Njua bible

2 Petus 2

¹Yaav taag lug cov Yixalayees muaj cov cev Vaajtswv lug kws qha tseeb hab cov kws qha tsi tseeb, naj nub nua mej yeej yuav muaj cov xwbfwb kws qha tsi tseeb ib yaam le txheej thaus hab. Puab yuav qha tej zaaj kws yuav coj mej moog raug kev puamtsuaj rua mej, hab puab yuav tsi leeg has tas, puab paub Yexus Khetos tug kws tuag txhwv puab lawm, hab tuab ntsais muag xwb puab yuav raug kev puamtsuaj.

²Txawm yog le ntawd los tseem muaj ntau leej yuav xyum ua phem ua qas lawv le cov tuabneeg ntawd ua; tub yog vim puab xyum ua le ntawd, txhaj le muaj tuabneeg thuam txujkev kws yog txuj tseeb.

³Cov xwbfwb cuav ntawd, puab sab hlub, puab qha tej zaaj kws tsi muaj hauvpaug hauvntsis ntxag mej kuas puab tau zoo xwb. Tug kws yuav txav txim, nwg tub txav txim rua puab ntxuv lug lawm, hab tug kws yuav ua kuas puab puamtsuaj, nwg tub npaaj txhij lawm.

⁴Rua qhov Vaajtswv yeej tsi zaam txim rua cov timtswv ceebtsheej kws ua txhum ib tug le. Nwg muab puab pov rua huv ntuj tawg, puab raug kaw rua huv qhov chaw kws tsaus ntuj nti, tog moog txug Nub kws Vaajtswv Txav Txim rua puab.

⁵Thaus Vaajtswv tso dlej lug nyaab nplajteb, cov tuabneeg kws ua txhum, puab tuag taag huv tuabsi tsi muaj ib tug dlim le, tsuas yog Nau-es tug kws qha txujkev ncaaj nceeg hab xyaa leej kws nrug Nau-es nyob ua ke txhaj dlim xwb.

⁶Vaajtswv rau txim rua cov tuabneeg kws nyob huv lub nroog Xaudoos hab huv lub nroog Kaumaulas, nwg tso suavtawg lug hlawv ob lub nroog ntawd kub nyab taag huv tuabsi. Nwg ua le ntawd, tub yog nwg qha rua cov tuabneeg kws ua txhum kuas puab paub has tas, puab yuav puamtsuaj ib yaam nkaus le cov tuabneeg kws nyob huv ob lub nroog ntawd.

⁷Vaajtswv paab Lauj tug kws yog tuabneeg ncaaj nceeg dlim; Lauj nyuaj sab rua cov tuabneeg kws ua kev phem kev qas kawg le.

⁸Rua qhov Lauj tug kws yog tuabneeg ncaaj nceeg, nwg nrug cov tuabneeg ntawd nyob ua ke, nwg naj nub pum tej kev phem kws puab ua hab nov tej lug phem kws puab has, ua rua nwg ntxhuv sab kawg le.

⁹Yog le ntawd, peb txhaj paub has tas Vaajtswv paab tau cov tuabneeg kws Vaajtswv kaav lawm kuas puab dlim puab tej kev nyuaj sab; hab Vaajtswv muab tau cov tuabneeg kws ua txhum kaw ca moog txug nub kws Vaajtswv txav txim rua puab.

¹⁰Thaus Vaajtswv txav txim rua suavdlawg, Vaajtswv yuav txav txim rua cov tuabneeg kws ua phem ua qas hab tsi fwm Vaajtswv nyaav dlua le nwg txav txim rua suavdlawg. Cov xwbfwb cuav ntawd, puab muaj lub sab tawv hab puab nyam ua lawv le puab lub sab xwb; puab saib tsi taug cov kws muaj fwjchim sau nruab ntug.

¹¹Txawm yog cov timtswv ceebtsheej muaj zug hab muaj fwjchim luj dlua cov xwbfwb cuav ntawd los puab tub tsi thuam hab tsi nkaug rua Vaajtswv has tas, cov xwbfwb cuav ntawd ua txhum.

¹²Tabsis cov xwbfwb cuav ntawd ua lawv le puab lub sab nyam xwb; puab ruag ib yaam le tej tsaj qus kws yug lug rua luas nteg hab luas tua, puab thuam tej zaaj kws puab tsi totaub. Puab yuav raug puamtsuaj ib yaam le tej tsaj nruab nraag,

¹³hab puab yuav raug kev txomnyem, rua qhov puab tub ua rua lwm tug raug txomnyem lawm. Txawm yog nruab nub nrig los puab ua kev phem kev qas, noj haus qw ua nqaaj ua nqug, puab has tas tej kws puab ua ntawd, ua rua puab zoo sab kawg le. Thaus puab nrug mej noj mov ua ke, puab ua phem ua qas rhuav mej ntsejmuag; puab ua le ntawd, rua qhov puab yeej nyam tej kws puab ua ntawd.

¹⁴Puab tsuas nrhav nrhw ua kev nkauj kev nraug xwb; puab naj nub ua txhum tsi paub dlhuav le. Puab ntxag cov tuabneeg kws tsi tshua muaj tswvyim moog ua txhum. Puab ua tuabneeg sab hlub. Vaajtswv tub foom tsi zoo rua puab lawm.

¹⁵Puab tso txujkev ua ncaaj tseg, puab txhaj yuam kev moog ua txhum ib yaam le Npe-aus tug tub Npala-aas, Npala-aas ua txhum rua qhov nwg ntshaw nyaj,

¹⁶hab nwg paub has tas nwg ua txhum lawm, rua qhov nwg tug neeg luav has tau lug le tuabneeg hab txwv tsi pub nwg moog ua dlog ua dlig le tej tuabneeg vwm ua.

¹⁷Cov xwbfwb cuav ntawd zoo ib yaam le lub qhovdlej kws dlej nqhuab taag, hab zoo ib yaam le tauv fuab kws cua dlaaj cua dlub ntsawj yaa taag lawm; Vaajtswv tub npaaj qhov chaw kws tsaus ntuj nti ca rua puab lawm.

¹⁸Puab nyam has tej lug kws tsi muaj hauvpaug hauvntsis, puab ua kev phem kev qas ntxag cov tuabneeg kws nyavnyuas tso txujkev txhum tseg, kuas cov tuabneeg ntawd rov qaab yuam kev ua txhum.

¹⁹Puab coglug rua cov tuabneeg ntawd has tas, puab yuav paab kuas cov tuabneeg ntawd muaj kev ywjpheej; txawm yog puab has le ntawd los puab tseem ua txujkev puamtsuaj qhev, rua qhov tug kws nti tsi dlim yaam kws khi nwg, tug ntawd yeej ua yaam ntawd qhev.

²⁰Cov tuabneeg kws lug ntseeg Yexus Khetos tug kws yog peb tug Cawmseej, puab tub dlim tej kev phem huv nplajteb nuav lawm. Yog puab ca tej kev phem ntawd rov qaab khi puab, thaus kawg puab lub sab hajyam yuav phem dlua thaus chivthawj.

²¹Yog puab tsi paub txujkev ncaaj nceeg, zoo dlua le puab paub lawm, es puab tsua tsi ua lawv le tej lug kws Vaajtswv qha rua puab.

²²Tej kws puab raug ntawd ua rua suavdlawg paub tseeb has tas, yeej muaj lawv le zaaj paajlug kws has tas, “Dlev rov qaab moog noj dlev cov ntuav” hab has tas, “Tug npua kws luas muab dlej ntxuav huv huv lawm, nwg rov qaab moog dlaa paag aav dlua.”