Read Hmong Njua 2 Petus 3 Bible Online

2 Petus 3 - Hmong Njua bible

2 Petus 3

¹Cov kwvtij kws kuv hlub, tsaab ntawv nuav yog tsaab ob kws kuv sau xaa tuaj rua mej. Tsaab ntawv nuav hab tsaab kws kuv xub sau xaa tuaj rua mej lawm, kuv sau tuaj ntuag mej txhua tug kws muaj lub sab ncaaj nceeg, kuas mej ncu ntsoov tej kws mej tub paub lawm.

²Kuv xaav kuas mej ncu ntsoov tej lug kws thaus u cov cev Vaajtswv lug kws yog tuabneeg ncaaj nceeg tau qha tseg lawm, hab kuv xaav kuas mej ncu ntsoov tug Tswv tug kws yog peb tug Cawmseej tej lug kws cov timthawj tub qha rua mej lawm.

³Thawj lu kws kuv yuav qha mej has le nuav: thaus txug lub sijhawm kawg yuav muaj tuabneeg thuam mej, cov tuabneeg ntawd yuav ua phem ua qas lawv le puab lub sab nyam,

⁴hab puab yuav nug mej has tas, “Yexus Khetos coglug has tas, nwg yuav rov qaab lug nua puas yog? Ua le nwg nyob qhov twg? Peb cov yawmkoob tub tuag taag lawm, txij thaus tsim lub nplajteb lug txug naj nub nwgnuav, ib puas tsaav yaam tseem nyob le qub tsi muaj ib yaam txawv txaav le.”

⁵Puab tsi quavntsej qhov kws thaus u Vaajtswv has kuas muaj lub ntuj hab lub nplajteb, ces txawm ca le muaj lawv le Vaajtswv has; lub nplajteb tawm huv dlej lug hab Vaajtswv kuas dlej nyob puagncig lub nplajteb,

⁶tub yog vim le ntawd dlej txhaj nyaab lub nplajteb nuav, cov tuabneeg kws nyob txheej thaus u txhaj le tuag taag huv tuabsi lawm.

⁷Tabsis Vaajtswv ceev lub nplajteb hab lub ntuj kws naj nub nwgnuav muaj nyob rua suavtawg hlawv lawv le Vaajtswv tau has tseg lawm. Vaajtswv yuav ceev ca moog txug nub kws cov tuabneeg ua phem yuav raug txav txim hab puamtsuaj.

⁸Cov kwvtij kws kuv hlub, mej yuavtsum ncu ntsoov lu lug kws has le nuav: tug Tswv suav has tas, ib nub ntev ib yaam le ib txheeb xyoo hab ib txheeb xyoo ntev ib yaam le ib nub.

⁹Muaj qee leej xaav has tas, Vaajtswv tseem yuav tog ntev Vaajtswv maam le ua lawv le Vaajtswv tau coglug tseg lawm, tabsis yeej tsi yog le puab xaav. Vaajtswv ua sab ntev rua mej, rua qhov nwg tsi xaav ca ib tug twg puamtsuaj moog, tabsis nwg xaav kuas txhua tug nyag muab nyag tej kev txhum huv tuabsi tso povtseg.

¹⁰Nub kws tug Tswv lug, nub ntawd nwg yuav lug ib yaam le tubsaab tuaj. Nub ntawd thaus muaj suab nrov qeeg nkawg lub ntuj yuav pluj ndlais moog, suavtawg yuav kub ib puas tsaav yaam kws nyob sau nruab ntug yaaj taag. Lub nplajteb hab ib puas tsaav yaam kws nyob huv nplajteb puavleej yuav kub nyab taag huv tuabsi hab.

¹¹Tej ntawd yuav puamtsuaj moog huv tuabsi, yog le ntawd mej yuavtsum ua mej lub neej zoo le caag? Tsimnyog mej ua mej lub neej kuas dlawbhuv hab fwm Vaajtswv,

¹²mej yuavtsum naj nub tog nub kws Vaajtswv yuav lug, hab muab sab rau ua kuas nub ntawd lug txug sai. Nub ntawd yog nub kws lub ntuj yuav kub nyab taag, hab suavtawg yuav kub ib puas tsaav yaam kws nyob sau nruab ntug yaaj taag huv tuabsi.

¹³Tabsis Vaajtswv tub coglug tseg lawm has tas, yuav muaj lub ntuj tshab hab lub nplajteb tshab. Nyob huv lub ntuj tshab hab lub nplajteb tshab kws peb naj nub tog ntawd muaj kev ncaaj nceeg xwb.

¹⁴Yog le ntawd cov kwvtij kws kuv hlub, thaus mej tseem taabtom tog nub ntawd mej yuavtsum ua mej lub neej kuas dlawbhuv rua Vaajtswv pum has tas, mej ua hum Vaajtswv sab hab mej tsi muaj ib qhov txhum le.

¹⁵Mej yuavtsum ncu ntsoov has tas, qhov kws peb tug Tswv ua sab ntev rua mej, tub yog nwg ca sijhawm rua mej kuas mej dlim mej lub txim, ib yaam le peb tug kwv Paulus kws peb hlub, tub sau tej ntawd tuaj qha rua mej lawv le Vaajtswv pub tswvyim rua nwg lawm.

¹⁶Txhua tsaab ntawv kws nwg sau, nwg yeej has txug zaaj nuav. Tej kws nwg sau ntawd muaj qee lu tsi tshua yoojyim totaub. Cov tuabneeg kws paub tsi tseeb hab lub sab ywjfaab ywjfwj, puab txhais tej lug ntawd tsi lawv le lub ntsab, ib yaam le puab txhais lwm zaaj kws nyob huv Vaajtswv txujlug. Qhov kws puab ua le ntawd yuav ua rua puab raug kev puamtsuaj xwb.

¹⁷Tabsis cov kwvtij kws kuv hlub, mej yeej paub zaaj nuav lawm, yog le ntawd mej yuavtsum ceevfaaj zoo, nyob tsaam mej yuam kev ua txhum ib yaam le cov tuabneeg kws ua phem ntawd ua, hab mej yuav tsi muab sab rau ntseeg zuj zug lawm.

¹⁸Mej yuavtsum muab sab rau nrhav txuj koob moov mej txhaj yuav paub peb tug Tswv Yexus Khetos kws yog peb tug Cawmseej, hab paub nwg txujkev hlub zuj zug moog. Suavdlawg yuavtsum naj nub fwm nwg hab fwm moog ibtxhis le! Amees.