Read Hmong Njua 1 Yauhaas 4 Bible Online

1 Yauhaas 4 - Hmong Njua bible

1 Yauhaas 4

¹Cov kwvtij kws kuv hlub, mej tsi xob rawm ntseeg txhua tug kws khaav has tas, puab muaj Vaaj Ntsujplig, tabsis mej yuavtsum ua tuab zoo saib tug ntsujplig ntawd puas yog Vaajtswv tug tag. rua qhov muaj cov xwbfwb cuav ntau leej tawm moog qha rua txhua qhov chaw lawm.

²Txhua tug kws leeg has tas, Yexus Khetos lug yug ua tuabneeg, cov ntawd txhaj yog cov kws muaj Vaajtswv tug Ntsujplig. Tub yog vim le nuav mej txhaj paub has tas, cov twg yog cov kws muaj Vaajtswv tug Ntsujplig tag.

³Tabsis txhua tug kws tsi leeg has tas Yexus lug yug ua tuabneeg, tug ntawd tsi muaj Vaajtswv tug Ntsujplig. Tug ntsujplig kws nwg muaj ntawd, yog Yexus Khetos tug yeebncuab tug ntsujplig kws mej tub nov lawm has tas nwg yuav lug, nwgnuav nwg tub lug nyob huv nplajteb nuav lawm.

⁴Cov mivnyuas, mej yog Vaajtswv cov mivnyuas hab mej tub tawmtsaam yeej cov xwbfwb cuav lawm, rua qhov Vaaj Ntsujplig tug kws nyob huv mej lub sab muaj fwjchim luj dlua tug ntsujplig kws nyob huv tej tuabneeg nplajteb lub sab.

⁵Cov xwbfwb cuav ntawd qha tej kws yog nplajteb zaaj xwb, rua qhov puab yog tuabneeg nplajteb hab tuabneeg nplajteb yeej nyam noog puab qha.

⁶Tabsis peb yog Vaajtswv cov mivnyuas. Tug kws paub Vaajtswv yeej nyam noog peb qha; tug kws tsi yog Vaajtswv le yeej tsi noog peb qha. Yog le ntawd peb txhaj paub has tas, tug kws muaj tug Ntsujplig tseeb hab tug kws muaj tug ntsujplig cuav txawv le caag.

⁷Cov phoojywg kws kuv hlub, peb ib leeg yuavtsum hlub ib leeg, rua qhov Vaajtswv yog tug kws ua rua peb txawj sis hlub. Tug kws muaj kev hlub, tug ntawd yog Vaajtswv mivnyuas hab nwg yeej paub Vaajtswv.

⁸Tug kws tsi muaj kev hlub, tug ntawd yeej tsi paub Vaajtswv, rua qhov Vaajtswv yog tug muaj kev hlub.

⁹Vaajtswv khaiv nwg tuab leeg Tub lug rua huv nplajteb nuav, kuas peb cov kws ntseeg nwg tug Tub tau txujsa tshab. Vaajtswv ua le ntawd, tub yog Vaajtswv qha rua peb has tas nwg hlub peb.

¹⁰Txujkev hlub lub ntsab yog le nuav: tsi yog peb hlub Vaajtswv, tabsis yog Vaajtswv hlub peb hab nwg khaiv nwg tug Tub lug tuag theej peb lub txhoj, Vaajtswv txhaj zaam tau peb lub txim.

¹¹Cov phoojywg, Vaajtswv tub hlub peb npaum le ntawd lawm, yog le ntawd tsimnyog peb ib leeg yuavtsum hlub ib leeg.

¹²Yeej tsi tau muaj leejtwg pum Vaajtswv ib zag le, tabsis yog peb ib leeg hlub ib leeg, Vaajtswv yeej nrug peb sis raug zoo, hab nwg yuav pub peb muaj kev hlub ib yaam le nwg.

¹³Rua qhov Vaajtswv tub pub Vaajtswv tug Ntsujplig rua peb lawm, peb txhaj paub has tas Vaajtswv nrug peb sis raug zoo, hab peb nrug Vaajtswv sis raug zoo.

¹⁴Peb tub pum hab peb tub qha rua suavdlawg paub lawm has tas, leej Txiv khaiv nwg tug Tub lug ua tuabneeg nplajteb tug Cawmseej.

¹⁵Tug kws qha has tas Yexus yog Vaajtswv tug Tub, Vaajtswv yeej nrug tug ntawd sis raug zoo hab tug ntawd yeej nrug Vaajtswv sis raug zoo.

¹⁶Peb paub hab peb ntseeg has tas Vaajtswv hlub peb. Vaajtswv yog tug kws muaj kev hlub, yog leejtwg muaj kev hlub, tug ntawd yeej nrug Vaajtswv sis raug zoo, hab Vaajtswv yeej nrug tug ntawd sis raug zoo.

¹⁷Yog peb muaj kev hlub ib yaam le Vaajtswv lawm, peb yuav tsi ntshai Nub kws Vaajtswv txav txim, rua qhov peb cov kws nyob huv lub nplajteb nuav, peb lub neej tub zoo ib yaam le Yexus Khetos lub lawm.

¹⁸Tug kws muaj kev hlub lawm, tsi taag nwg yuav ntshai, rua qhov txujkev hlub kws zoo kawg nkaus yuav tshem tau txujkev ntshai tawm. Yog le ntawd tug kws ntshai, tug ntawd tseem tsi tau muaj kev hlub, rua qhov nwg ntshai nyob tsaam nwg raug txim.

¹⁹Peb muaj kev hlub rua qhov Vaajtswv tub xub hlub peb lawm.

²⁰Tug kws has tas, “Kuv hlub Vaajtswv,” tabsis nwg tseem ntxub nwg kwv nwg tij, tug ntawd has dlaag xwb. Yog nwg tub tsi hlub nwg kwv nwg tij kws nwg qhovmuag pum, nwg yuav ua le caag hlub Vaajtswv tug kws nwg qhovmuag tsi pum.

²¹Tej lug kws Yexus Khetos qha rua peb yog le nuav: tug kws hlub Vaajtswv, tug ntawd yuavtsum hlub nwg kwv nwg tij.