Read Hmong Njua 1 Yauhaas 5 Bible Online

1 Yauhaas 5 - Hmong Njua bible

1 Yauhaas 5

¹Tug kws ntseeg has tas Yexus yog tug Mexiyas, tug ntawd yog Vaajtswv mivnyuas; hab tug kws hlub leej txiv, nwg yeej yuav hlub leej txiv cov mivnyuas ib yaam nkaus hab.

²Qhov kws peb paub has tas, peb hlub Vaajtswv cov mivnyuas yog le nuav: vim peb hlub Vaajtswv hab ua lawv le Vaajtswv tej lug qha.

³Qhov kws peb hlub Vaajtswv yog peb ua lawv le tej lug kws Vaajtswv has. Hab Vaajtswv tej lug peb yeej coj tsi nyuaj le,

⁴rua qhov Vaajtswv cov mivnyuas txhua tug puavleej kovyeej lub nplajteb lawm. Hab qhov kws peb kovyeej lub nplajteb tub yog vim peb ntseeg Yexus Khetos.

⁵Leejtwg txhaj yuav kovyeej lub nplajteb? Tug kws kovyeej lub nplajteb, tsuas yog tug kws ntseeg has tas, Yexus yog Vaajtswv tug Tub xwb.

⁶Thaus Yexus Khetos lug, muaj ob yaam tseemceeb; nwg ua kevcai raus dlej hab nwg tuag theej tuabneeg lub txhoj. Tsi yog dlej txhaj tseemceeb xwb, tabsis yog dlej hab ntshaav huv tuabsi. Hab Vaaj Ntsujplig yeej ua timkhawv has tas muaj tseeb le ntawd tag, rua qhov Vaaj Ntsujplig yeej yog tug kws has tseeb xwb.

⁷Muaj peb yaam ua timkhawv, xws le:

⁸Vaaj Ntsujplig, dlej hab ntshaav; peb yaam nuav puavleej has ib yaam nkaus.

⁹Thaus muaj tuabneeg ua timkhawv, peb yeej ntseeg tej lug kws puab has, yog le ntawd tsimnyog peb hajyam yuavtsum ntseeg lu lug timkhawv kws Vaajtswv has txug nwg tug Tub, rua qhov lu lug timkhawv ntawd tseemceeb dlua tej kws tuabneeg has.

¹⁰Tug kws ntseeg Vaajtswv tug Tub, tug ntawd yeej ntseeg Vaajtswv lu lug timkhawv; tabsis tug kws tsi ntseeg Vaajtswv tej lug, tug ntawd yuav has tas Vaajtswv yog tug kws has dlaag, rua qhov nwg tsi ntseeg lu lug timkhawv kws Vaajtswv has txug Vaajtswv tug Tub.

¹¹Lu lug timkhawv ntawd yog le nuav: Vaajtswv pub txujsa ntev dlhawv moog ibtxhis rua peb lawm, txujsa ntawd yog Vaajtswv tug Tub ntaag.

¹²Tug kws muaj leej Tub, tug ntawd txhaj muaj txujsa; tug kws tsi muaj leej Tub, tug ntawd tsi muaj txujsa.

¹³Kuv sau tej nuav tuaj rua mej cov kws ntseeg Vaajtswv tug Tub, kuas mej paub has tas mej tub muaj txujsa ntev dlhawv moog ibtxhis lawm.

¹⁴Peb tsi ntshai moog cuag Vaajtswv, rua qhov peb paub tseeb has tas, yog peb thov tej kws lawv le Vaajtswv lub sab nyam, Vaajtswv yeej yuav noog peb tej lug thov.

¹⁵Yog peb ca sab has tas Vaajtswv nov peb tej lug thov lawm, peb yeej paub has tas Vaajtswv yuav muab yaam kws peb thov rua peb.

¹⁶Yog mej pum mej ib tug kwvtij ua txhum kws tsi txaus tug ntawd raug kev puamtsuaj, mej yuavtsum thov Vaajtswv zaam txim rua tug kwvtij ntawd. Qhov nuav has txug tug kws ua txhum tsi txaus raug kev puamtsuaj xwb. Tabsis yeej muaj qhov txhum kws txaus raug kev puamtsuaj hab, kuv tsi tau has kuas mej thov Vaajtswv zaam txim rua tug kws ua txhum le ntawd.

¹⁷Txhua yaam kws tuabneeg ua tsi ncaaj puavleej yog kev txhum huv tuabsi, tabsis tej kev txhum ntawd muaj qee yaam tsi txaus raug kev puamtsuaj.

¹⁸Peb paub has tas tug kws yog Vaajtswv mivnyuas, tug ntawd yeej tsi nyam ua txhum, rua qhov Vaajtswv tug Tub tub tsomkwm nwg lawm, hab dlaab Ntxwgnyoog yuav ua tsi tau phem rua nwg.

¹⁹Peb paub has tas peb yog Vaajtswv cov mivnyuas, hab paub has tas dlaab Ntxwgnyoog tub kaav cov tuabneeg kws nyob huv nplajteb nuav lawm.

²⁰Peb paub has tas Vaajtswv tug Tub lug huv nplajteb nuav, hab nwg pub tswvyim rua peb, kuas peb paub tug kws yog Vaajtswv tag. Peb nrug Vaajtswv tug kws yog Vaajtswv tag sis raug zoo, rua qhov peb tub xub nrug Vaajtswv tug Tub Yexus Khetos sis raug zoo lawm. Tug nuav yog tug Vaajtswv tag, hab yog txujsa ntev dlhawv moog ibtxhis.

²¹Cov mivnyuas, mej yuavtsum ceevfaaj, mej tsi xob pe dlaab pe mlom.