Read Hmong Njua Cov Thawjtswj 1 Bible Online

Cov Thawjtswj 1 - Hmong Njua bible

Cov Thawjtswj 1

¹Tom qaab kws Yausuas tuag lawm, cov Yixalayees nug tug TSWV has tas, “Paab twg yuav ntaus thawj ua ntej moog paab peb tua cov Kana-aas?”

²Tug TSWV teb has tas, “Xeem Yudas yuav ntaus thawj moog ua ntej. Kuv muab lub tebchaws tso rua puab kaav lawm.”

³Cov Yudas has rua cov Xime-oos has tas, “Mej nrug peb moog kuas txug ntawm tug nrimteb kws faib rua peb hab paab peb tua cov Kana-aas. Ces peb tsua nrug mej moog rua ntawm cheebtsaam kws faib rua mej.” Yog le ntawd, xeem Xime-oos

⁴txhaj nrug xeem Yudas moog ntaus rog. Tug TSWV muab cov Kana-aas hab cov Pelixes cob rua puab teg, hab puab tua yeej kaum txheeb leej tuabneeg kws nyob huv lub nroog Npexeles.

⁵Puab ntsib Adauninpexes huv lub nroog Npexeles hab puab nrug nwg sis tua.

⁶Nwg tsiv tawm, tabsis puab caum nwg qaab, nteg tau nwg hab muab nwg ob tug taubteg hab ob tug taubtaws txav povtseg.

⁷Adauninpexes has tas, “Kuv tau muab xyaa caum tug vaajntxwv cov taubteg hab taubtaws txav povtseg, hab ca puab khaws tej mov kws poob huv kuv qaab rooj noj. Nwgnuav Vaajtswv tau ua pauj rua kuv ib yaam le kuv tau ua rua puab lawm.” Puab coj nwg lug rua huv lub nroog Yeluxalees, nwg txhaj tuag rua huv lawm.

⁸Cov Yudas ntaus yeej hab txeeb tau lub nroog Yeluxalees. Puab tua cov tuabneeg huv nroog tuag taag hab muab lub nroog ntawd hlawv kub nyab taag huv tuabsi lawm.

⁹Tom qaab ntawd, puab moog tua cov Kana-aas kws nyob sau tej ncov roob, ntawm tej taw roob hab huv tej taj mojsaab qhua moog rua saab qaabteb.

¹⁰Puab tawm moog tua cov Kana-aas huv lub nroog Henploos kws ibtxwm hu ua Kili-as Alenpas. Nyob qhov ntawd puab tua yeej Sesais cuab kwvtij, Ahimas cuab kwvtij hab Talemais cuab kwvtij.

¹¹Cov Yudas sawv kev qhov ntawd moog ntaus lub nroog Denpis. (Lub nroog ntawd ibtxwm hu ua Kili-as Sefeles.)

¹²Puab cov ntawd muaj ib tug hu ua Kalej, nwg has tas, “Yog leejtwg moog tua yeej lub nroog Kili-as Sefeles, mas kuv yuav muab kuv tug ntxhais Akhexas rua nwg yuav ua quaspuj.”

¹³Autheniyees kws yog Kalej tug kwv Kenas tug tub txhaj moog txeeb tau lub nroog ntawd, yog le ntawd, Kalej txhaj muab nwg tug ntxhais Akhexas rua Autheniyees yuav.

¹⁴Nub kws txis tshoob Autheniyees taij Akhexas kuas thov nwg txiv muab ib thaaj teb rua obtug. Akhexas txhaj nqeg sau nwg tug neeg luav nrausqaum lug, hab Kalej nug has tas, “Mivntxhais, koj xaav tau dlaabtsi?”

¹⁵Nwg teb has tas, “Kuv xaav tau ob peb lub qhovdlej. Rua qhov thaaj aav kws koj muab rua kuv ntawd yog aav qhuav xwb.” Yog le ntawd, Kalej txhaj muab thaaj aav kws muaj ib lub qhovdlej nyob saab peg hab ib lub nyob saab nraag rua nwg tug ntxhais.

¹⁶Mauxes yawmtxiv cov xeebntxwv kws yog cov tuabneeg Kenais, nrug cov Yudas tawm huv Yelikaus, kws yog lub nroog toovlaaj moog rua huv taj suabpuam qhuav ntawm Alas saab qaabteb huv xeev Yudas. Puab moog nyob xyaw cov Amalej rua ntawm thaaj chaw ntawd.

¹⁷Cov Yudas nrug cov Xime-oos moog hab puab tua yeej cov Kana-aas huv lub nroog Xefas. Puab rhuav lub nroog ntawd puamtsuaj taag. Yog le ntawd, puab txhaj tis npe rua lub nroog ntawd hu ua Haulemas.

¹⁸Tug TSWV paab cov Yudas, hab puab txeeb tau taagnrho saab tebchaws kws ua laaj roob lug ua puab tug, tabsis puab tsi tau txeeb lub nroog Nkaxas, Asekeloos, lossis Ekiloos hab tej zog miv kws nyob ibncig cheebtsaam cov nroog nuav. Cov tuabneeg nuav puavleej nyob lawv ntug havtxwv, puab muaj tsheb neeg hlau ntau, yog le ntawd, cov Yudas txhaj tsi muaj peevxwm lawv cov tuabneeg nuav tsiv tawm.

²⁰Muab lub nroog Henploos faib rua Kalej lawv le Mauxes tau coglug tseg, Kalej txhaj muab peb cuab kwvtij kws yog Anas cov xeebntxwv lawv tsiv tawm huv lub nroog ntawd.

²¹Tabsis xeem Npeenyamees tsi tau lawv cov Yenpus kws nyob huv lub nroog Yeluxalees tawm, hab cov Yenpus tseem nrug cov Npeenyamees nyob ua ke txij thaus ntawd lug le.

²²Xeem Efalayees hab xeem Manaxes moog txeeb tau lub nroog Npethees (lub nroog ntawd ibtxwm hu ua Luxes.) Tug TSWV paab puab, puab txhaj tso tuabneeg moog soj ntsuam lub nroog ntawd,

²⁴puab moog ntsib ib tug txivneej nyob huv lub nroog ntawd, hab puab has rua nwg tas, “Koj qha kev rua peb moog huv nroog, peb txhaj tsi ntaus koj.”

²⁵Nwg txhaj qha kev rua puab, ces cov Efalayees hab cov Manaxes txhaj muab cov tuabneeg huv lub nroog ntawd tua tuag taag, tsuas tseg tug txivneej ntawd hab nwg tsev tuabneeg nkaus xwb.

²⁶Tom qaab ntawd, nwg txhaj tsiv moog rua huv tebchaws Hitis, nwg moog rhawv tau ib lub nroog rua huv hab tis npe hu ua Luxes. Lub npe ntawd tseem nyob lug txug naj nub nua.

²⁷Cov Manaxes tsi tau lawv cov tuabneeg kws nyob huv lub nroog Npes Saas, Tanas, Daules, Ile-as, Menkidaus hab tej zog kws nyob puagncig cov nroog ntawd tawm; cov Kana-aas tseem nyob huv cov nroog ntawd.

²⁸Thaus cov Yixalayees fuamvaam coob hab muaj zug zuj zug lawm, puab txhaj yuam cov Kana-aas ua num rua puab, tabsis puab tseem tsi tau lawv cov tuabneeg ntawd tawm kuas taag.

²⁹Cov Efalayees tsi tau lawv cov Kana-aas kws nyob huv lub nroog Nkexes tawm, yog le ntawd, cov Kana-aas txhaj tseem nrug puab nyob huv lub nroog ntawd.

³⁰Cov Xenpuloos tsi tau lawv cov tuabneeg kws nyob huv lub nroog Kiloos hab Nahalas tawm, yog le ntawd, cov Kana-aas txhaj tseem nrug puab nyob huv ob lub nroog ntawd, hab puab yuam cov Kana-aas ua num rua puab.

³¹Cov Aseles tsi tau lawv cov tuabneeg kws nyob huv lub nroog Akaus, Xidoos, Alas, Akhixis, Henpas, Afekas, hab Lehaus tawm.

³²Cov Aseles tseem nyob huv cov Kana-aas cheebtsaam aav, rua qhov puab tsi tau lawv cov tuabneeg ntawd tawm.

³³Cov Nathalis tsi tau lawv cov tuabneeg kws nyob huv lub nroog Npethes Semes hab Npethanas tawm. Cov Nathalis ca le nrug cov Kana-aas nyob huv puab cheebtsaam aav, tabsis puab yuam cov Kana-aas ua num rua puab.

³⁴Cov Amaules yuam cov Daas rov moog nyob peg laaj roob hab tsi pub puab nqeg lug nyob huv taj nraag le.

³⁵Cov Amaules tseem nyob huv Aiyaloos, Sa-anpimes hab ntawm lub Roob Heles, tabsis cov Efalayees hab cov Manaxes ua cov tswjfwm cov Kana-aas hab yuam cov Kana-aas ua num rua puab.

³⁶Cov Edoos tug nrimteb pib kag ntawm txujkev sau lub laaj roob Alanpees, ntawm lub nroog Xelas saab qaumteb moog rua peg lawm.