Read Hmong Njua Cov Thawjtswj 10 Bible Online

Cov Thawjtswj 10 - Hmong Njua bible

Cov Thawjtswj 10

¹Tom qaab kws Anpimelej tuag lawm, Pu-as tug tub Taulas kws yog Daudaus tug xeebntxwv lug ua tug paab cov Yixalayees. Nwg yog xeem Ixakhas hab nwg nyob huv lub nroog Samiles peg lub laaj roob Efalayees.

²Nwg ua cov Yixalayees tug thawjcoj tau neeg nkaum peb xyoos. Nwg maam tuag, hab luas muab nwg log rua huv lub nroog Samiles.

³Tom qaab kws Taulas tuag lawm, Yais kws nyob huv xeev Nkile-as txhaj ua tug coj cov Yixalayees tau neeg nkaum ob xyoos.

⁴Nwg muaj peb caug leej tub, puab caij peb caug tug neeg luav. Puab muaj peb caug lub nroog nyob huv xeev Nkile-as kws nwgnuav tseem hu ua Yais tej zog.

⁵Yais tuag hab luas muab nwg coj moog log rua ntawm lub nroog Kamoos.

⁶Cov Yixalayees rov ua txhum rua tug TSWV kws yog puab moog pe Npa-aas hab tej mlom Atates, hab moog pe cov Xilias, cov Xidoos, cov Mau-am, cov Amoos hab cov Filitees tej vaajtswv. Puab tso tug TSWV tseg tsi pehawm nwg lawm.

⁷Yog le ntawd, tug TSWV chim heev rua cov Yixalayees. Nwg txhaj tso cov Filitees hab cov Amoos tuaj tua cov Yixalayees.

⁸Puab quab yuam hab tsimtxom cov Yixalayees kws nyob huv tebchaws Amaules ntawm tug Dlej Yauladees saab nubtuaj, huv lub xeev Nkile-as tau kaum yim xyoo.

⁹Cov Amoos tseem hlaa tug Dlej Yauladees moog tua xeem Yudas, xeem Npeenyamees hab xeem Efalayees huv tuabsi. Cov Yixalayees tau kev nyuaj sab luj kawg nkaus.

¹⁰Cov Yixalayees txhaj quaj thov tug TSWV has tas, “Peb tau ua txhum tawmtsaam koj, peb tso koj kws yog peb tug Vaajtswv tseg hab moog pe Npa-aas lawm.”

¹¹Tug TSWV teb puab has tas, “Thaus cov Iziv, cov Amaules, cov Amoos, cov Filitees,

¹²cov Xidoos, cov Amalej hab cov Ma-oos tau quab yuam mej yaav taag lug, hab mej tau quaj thov kuv. Kuv yeej ibtxwm tsi tau cawm mej dlim ntawm puab teg hlo le los?

¹³Tabsis mej tseem tso kuv tseg hab moog pe luas tej vaajtswv, yog le ntawd, kuv yuav tsi paab mej ib zag ntxiv le lawm.

¹⁴Mej ca le rov qaab moog hab quaj thov tej vaajtswv kws mej tub xaiv lawm. Ca tej vaajtswv ntawd paab mej thaus mej raug kev txomnyem.”

¹⁵Tabsis cov Yixalayees has rua tug TSWV has tas, “Peb tau ua txhum lawm tag, Koj yuav rau txim le caag rua peb los nyob ntawm koj pum zoo, tabsis nub nua thov koj cawm peb lauj!”

¹⁶Yog le ntawd, puab txhaj muab lwm tsaav tuabneeg tej vaajtswv kws puab tau coj lug pe ntawd tsoo povtseg huv tuabsi, hab rov lug pehawm tug TSWV dlua; hab tug TSWV tsi xaav ca cov Yixalayees raug kev txomnyem ntxiv lawm.

¹⁷Ces cov Amoos txawm txhij tubrog hab tuaj tsuam yeej rua ntawm lub xeev Nkile-as.

¹⁸Cov Yixalayees tuaj sis sau ua ke hab tsuam yeej rua ntawm Mixepas huv lub xeev Nkile-as. Cov Nkile-as tej thawj tubrog txhaj sis thaam has tas, “Leejtwg yog tug coj peb moog tua cov Amoos, tug ntawd ca le ua tug thawjcoj peb cov kws nyob huv lub xeev Nkile-as nuav.”