Read Hmong Njua Cov Thawjtswj 12 Bible Online

Cov Thawjtswj 12 - Hmong Njua bible

Cov Thawjtswj 12

¹Cov Efalayees npaaj moog ntaus rog; puab hlaa tug dlej Yauladees moog rua huv lub nroog Xafoos hab has rua Yefethas has tas, “Vim le caag koj hlaa nrimteb moog tua cov Amoos, koj tsi hu peb nrug koj moog? Peb yuav hlawv lub tsev nuav kuas qaug lug tsuam koj!”

²Tabsis Yefethas has rua puab tas, “Kuv cov pejxeem hab kuv tau nrug cov Amoos sis caav sis tshe txaus nkaus lawm. Kuv tub thov mej, tabsis mej tsi paab kuas kuv dlim ntawm puab teg.

³Thaus kuv pum mej tsi cev teg tuaj paab kuv, kuv txhaj muab kuv txujsa pua kev hlaa nrimteb moog tua cov Amoos, tug TSWV txhaj pub kuv tua yeej puab. Vim le caag nwgnuav mej tseem yuav tuaj tua kuv hab?”

⁴Ces Yefethas txhij taagnrho cov txivneej huv xeev Nkile-as tuaj ua ke tua cov Efalayees ua rua puab swb kag lawm. (Cov Efalayees has tas, “Mej cov Nkile-as kws nyob huv Efalayees hab Manaxes, mej nyag kev tsiv ntawm cov Efalayees lawm xwb los sav!”)

⁵Vim tsi xaav pub kuas cov Efalayees tsiv dlim tau, cov Nkile-as txhaj moog txeeb tau tej qhov chaw kws hlaa tug dlej Yauladees. Thaus txhua tug Efalayees tsiv lug hlaa qhov ntawd yuavtsum tau thov kev tso cai. Mas cov tuabneeg Nkile-as nug has tas, “Koj puas yog tuabneeg Efalayees?” Yog nwg teb has tas, “Tsi yog,”

⁶Ces puab yuam kuas nwg has tas, “Sinpaules.” Tabsis nwg has tas, “Xinpaules.” Rua qhov nwg has lu lug ntawd tsi meej. Ces puab yuav nteg nwg hab muab nwg tua rua ntawm qhov chaw kws hlaa tug dlej Yauladees. Lub sijhawm ntawd cov tuabneeg Efalayees kws raug tua tuag muaj plaub caug ob txheeb leej.

⁷Yefethas ua tug coj cov Yixalayees tau rau xyoo. Ces nwg txawm tuag lawm. Hab luas muab nwg log rua huv nwg lub zog ntawm Nkile-as.

⁸Tom qaab kws Yefethas tuag lawm, Ixaas kws nyob huv lub nroog Npelehees ua tug coj cov Yixalayees.

⁹Ixaas muaj peb caug leej tub hab peb caug leej ntxhais. Ixas muab nwg cov ntxhais qua rua cov tuabneeg saab nrau kws tsi yog nwg caajceg yuav ua quaspuj, hab nwg moog yuav cov tuabneeg saab nrau kws tsi yog nwg caajceg peb caug tug ntxhais lug rua nwg cov tub ua quaspuj. Ixaas coj cov Yixalayees tau xyaa xyoo,

¹⁰ces nwg txawm tuag lawm, hab luas muab nwg log rua huv lub nroog Npelehees.

¹¹Tom qaab kws Ixas tuag lawm, Eloos kws yog xeem Xenpuloos ua tug coj cov Yixalayees tau kaum xyoo.

¹²ces nwg txawm tuag lawm, hab luas muab nwg log rua huv lub nroog Aiyaloos huv Xenpuloos cheebtsaam aav.

¹³Tom qaab kws Eloos tuag lawm, Adoos kws yog Hilees tug tub kws nyob huv lub nroog Pilathoos ua tug coj cov Yixalayees.

¹⁴Nwg muaj plaub caug leej tub hab peb caug leej xeebntxwv, puab caij xyaa caum tug neeg luav. Adoos coj cov Yixalayees tau yim xyoo,

¹⁵ces nwg txawm tuag lawm, hab luas muab nwg log rua huv lub nroog Pilathoos, huv cov Efalayees cheebtsaam aav kws nyob peg cov Amalej tej ncov roob.