Read Hmong Njua Cov Thawjtswj 13 Bible Online

Cov Thawjtswj 13 - Hmong Njua bible

Cov Thawjtswj 13

¹Cov Yixalayees rov ua txhum rua tug TSWV dlua, tug TSWV txhaj muab puab cob rua cov Filitees kaav tau plaub caug xyoo.

²Lub sijhawm ntawd, muaj ib tug txivneej npe hu ua Manau-as nyob huv lub nroog Xaulas. Nwg yog xeem Daas. Nwg tug quaspuj yeej ibtxwm xeeb tsi taug tub le.

³Tug TSWV ib tug timtswv lug rua Manau-as tug quaspuj pum hab has rua nwg tug quaspuj has tas, “Koj yeej ibtxwm xeeb tsi taug tub, tabsis tsi ntev koj yuav xeeb mivnyuas hab yuav yug tau ib tug mivtub.

⁴Koj ncu ntsoov tsi xob haus cawv txiv maab lossis cawv ntsim lossis noj tej zaub mov kws txwv tsi pub noj;

⁵hab tom qaab kws yug tau koj tug tub lawm, koj yuavtsum tsi xob txav nwg cov plaubhau hlo le, rua qhov yuav muab nwg fij ua ib tug Naxis rua Vaajtswv txij nub kws yug tau nwg lug. Nwg yuav pib ua teg num kws paab tso cov Yixalayees kuas dlim ntawm cov Filitees txhais teg.”

⁶Tug quaspuj ntawd txawm moog qha rua nwg tug quasyawg has tas, “Vaajtswv ib tug tuabneeg tau lug cuag kuv, nwg lub ntsejmuag muaj fwvxyeej ib yaam le Vaajtswv tug timtswv ntaag. Kuv tsi tau nug saib nwg tuaj qhov twg tuaj, hab nwg tsi qha nwg lub npe rua kuv paub le.

⁷Tabsis nwg qha rua kuv has tas, kuv yuav xeeb mivnyuas hab yuav yug tau ib tug tub. Nwg has kuas kuv tsi xob haus cawv txiv maab lossis cawv ntsim lossis tsi xob noj tej zaub mov kws txwv tsi pub noj, rua qhov tug mivtub nuav yuav muab fij ua ib tug Naxis rua Vaajtswv moog taag nwg simneej.”

⁸Ces Manau-as txawm thov tug TSWV has tas, “Tug TSWV, thov tso Vaajtswv tug tuabneeg rov qaab lug cuag wb hab qha saib wb yuav ua le caag rua tug mivtub nuav thaus yug tau nwg lawm.”

⁹Vaajtswv ua lawv le Manau-as thov, hab nwg tug timtswv rov lug rua Manau-as tug quaspuj pum thaus nwg nyob tom teb. Tabsis Manau-as kws yog nwg tug quasyawg tsi nrug nwg nyob ntawd,

¹⁰Yog le ntawd, nwg txhaj dlha rov lug qha rua nwg tug quasyawg dlua has tas, “Koj saib! Tug txivneej kws ob nub ntawd lug cuag kuv, rov lug rua kuv pum dlua lawm tag.”

¹¹Manau-as sawv tseeg hab caum nwg tug quaspuj qaab moog. Manau-as txhaj moog cuag tug txivneej ntawd hab nug has tas, “Koj yog tug txivneej kws qha rua kuv tug quaspuj ntaag los?” Nwg teb has tas, “Kuv yog tug ntawd ntaag.”

¹²Manau-as nug has tas, “Yog muaj tseeb le koj has tag, tug mivtub ntawd yuav ua dlaabtsi? Nwg yuav coj lub neej zoo le caag?”

¹³Tug TSWV tug timtswv teb has tas, “Koj tug quaspuj yuavtsum ua txhua yaam lawv le kuv tub qha rua nwg lawm.

¹⁴Nwg yuavtsum tsi xob noj tej yaam kws yog muab cawv txiv maab ua; nwg yuavtsum tsi xob haus cawv txiv maab lossis cawv ntsim lossis tsi xob noj tej zaub mov kws txwv tsi pub noj. Nwg yuavtsum ua txhua yaam le kuv tub qha rua nwg lawm xwb.”

¹⁵Manau-as has rua tug TSWV tug timtswv has tas, “Wb xaav kuas koj nyob tog, wb moog muab ib tug mivnyuas tshis lug tua ua zaub mov rua koj noj tsaiv.”

¹⁶Tug TSWV tug timtswv teb has tas, “Txawm yog meb cheem kuv nyob los kuv yuav tsi noj meb rooj mov ntawd. Tabsis yog meb xaav npaaj rooj mov ntawd los ca le muab rooj mov ntawd hlawv fij rua tug TSWV.”

¹⁷Manau-as teb has tas, “Thov qha koj lub npe rua wb kuas wb txhaj paub qhuas koj thaus tshwm muaj tseeb lawv le tej lug kws koj has ntawd lawm.”

¹⁸Tug timtswv nug has tas, “Vim le caag meb txhaj xaav paub kuv lub npe? Kuv lub npe yog lub kws xaav tsi thoob.”

¹⁹Yog le ntawd, Manau-as txhaj moog nteg tau ib tug mivnyuas tshis lug tua hab muab mivntsiv moov nplej coj moog hlawv fij rua sau lub thaaj pobzeb rua tug TSWV kws ua tej txujci kws xaav tsi thoob.

²⁰Thaus cov nplaim tawg cig laam lug sau lub thaaj, Manau-as obtug pum tug timtswv ntawd nyob huv cov nplaim tawg nce moog rua sau ntuj lawm. Thaus Manau-as obtug pum le ntawd, ces obtug ca le qhau cev hlo ua ntsejmuag ti nkaus rua huv aav.

²¹Txij thaus ntawd lug, tug TSWV tug timtswv txawm tsi lug rua Manau-as hab nwg tug quaspuj pum ntxiv le lawm, Manau-as txhaj paub has tas tug txivneej ntawd yog Vaajtswv tug timtswv.

²²Manau-as has rua nwg tug quaspuj has tas, “Wb yeej yuav tuag xwb lauj, rua qhov wb pum Vaajtswv lawm!”

²³Tabsis nwg tug quaspuj teb has tas, “Yog tug TSWV xaav tua wb povtseg tag, nwg yuav tsi txais wb cov khoom fij ntawm wb teg; hab nwg yuav tsi kaam ua txhua yaam nuav rua wb pum lossis nwg yuav tsi qha txhua yaam nuav rua wb paub le.”

²⁴Tug quaspuj ntawd txhaj yug tau ib tug tub hab tis nwg lub npe hu ua Xaaxoos. Tug mivtub nuav luj hlub zoo hab tug TSWV foom koob moov rua nwg.

²⁵Hab tug TSWV lub fwjchim txawm ua rua nwg muaj zug heev zuj zug thaus nwg nyob huv xeem Daas lub yeej ntu nruab nraab ntawm lub nroog Xaulas hab Eseta-aus.