Read Hmong Njua Cov Thawjtswj 14 Bible Online

Cov Thawjtswj 14 - Hmong Njua bible

Cov Thawjtswj 14

¹Muaj ib nub Xaaxoos txawm nqeg moog rua nraag lub nroog Teenas, nwg pum cov Filitees ib tug ntxhais zoo nkauj heev nyob nraag.

²Nwg rov qaab lug tsev, nwg txawm pav rua nwg nam nwg txiv noog has tas, “Kuv moog pum cov Filitees ib tug ntxhais nyob nraag lub nroog Teenas, mas kuv nyam nwg heev. Meb moog yuav nwg lug rua kuv.”

³Tabsis nwg nam nwg txiv nug nwg has tas, “Mivtub, vim le caag koj txhaj xaav moog yuav cov Filitees kws tsi ua kevcai txav tej ntxhais lug ua quaspuj? Koj tub nrhav thoob plawg peb tsaav tuabneeg kws yog koj caajceg txawm tsi muaj hluas nkauj le lawm los?” Tabsis Xaaxoos has rua nwg txiv has tas, “Koj ca le moog yuav tug ntxhais nraag lug rua kuv. Kuv nyam nwg tuab leeg xwb.”

⁴Nwg nam nwg txiv tsi paub sov puas yog tug TSWV coj Xaaxoos moog ua le ntawd, vim tug TSWV tub nrhav sijhawm yuav moog tua cov Filitees lawm. Lub sijhawm ntawd cov Filitees kaav cov Yixalayees.

⁵Yog le ntawd, Xaaxoos txawm nrug nwg nam nwg txiv moog nraag lub nroog Teenas. Thaus puab taabtom moog txug ntawm lub vaaj txiv maab huv lub nroog Teenas, txawm muaj ib tug mivnyuas tsuv ntxhuav nyooj lawg dlha lug rua ntawm nwg.

⁶Taamsim ntawd, tug TSWV tug ntsujplig lug rua Xaaxoos hab ua rua nwg muaj zug heev, nwg txhaj muab teg dlua tug mivnyuas tsuv ntxhuav ntawd ndluag ua tej dlaim, ib yaam le dlua tug mivnyuas tshis kws mog mog ntaag. Tabsis nwg yeej tsi pav tej kws nwg ua ntawd qha rua nwg nam nwg txiv paub le.

⁷Ces nwg txawm moog thaam tug hluas nkauj ntawd, hab nwg nyam tug hluas nkauj ntawd heev.

⁸Tau ob peb nub tom qaab Xaaxoos txawm rov qaab moog yuav tug hluas nkauj ntawd ua quaspuj. Thaus nwg taug kev moog, nwg txawm rov moog xauj tug tsuv ntxhuav kws nwg muab tua tuag ntawd, nwg pum muaj ib xub muv muaj zib heev nyob huv tug tsuv ntxhuav tuag ntawd lub cev, ua rua nwg xaav tsi thoob le.

⁹Nwg txawm muab cov zib hab noj taug kev lug. Thaus nwg lug txug ntawm nwg nam nwg txiv, nwg txawm muab mivntsiv rua obtug noj. Obtug noj cov zib mu ntawd, tabsis Xaaxoos tsi qha rua obtug paub has tas, nwg muab cov zib mu ntawd huv tug tsuv ntxhuav lub cevlug.

¹⁰Xaaxoos txiv txhaj moog saib tug hluas nkauj ntawd huv nwg lub tsev, Xaaxoos txawm ua tau ib rooj mov noj. Qhov nuav yog kevcai ntawm cov tub hluas.

¹¹Thaus cov Filitees pum Xaaxoos, puab tso tau peb caug leej tub hluas tuaj nrug nwg nyob.

¹²Xaaxoos has rua puab tas, “Kuv yuav txhaj ib zaaj rua mej txhais, yog mej txhais tau lub ntsab lug rua kuv ua ntej nub xyaa kws peb xaus tshoob, kuv yuav muab peb caug cev rig tsho ntaub maag hab peb caug dlaim ntaub pua chaw rua mej.

¹³Tabsis yog mej txhais tsi tau zaaj lug nuav, mej yuavtsum muab peb caug cev rig tsho ntaub maag hab peb caug dlaim ntaub pua chaw rua kuv.” Puab teb Xaaxoos has tas, “Koj ca le txhaj lug, peb rawm nov zaaj ntawd kawg le.”

¹⁴Xaaxoos has tas, “Muaj tej yaam kws noj tawm ntawm tug noj lug. Muaj tej yaam qaab zib tawm ntawm tug kws muaj zug lug;” Tub tau peb nub tom qaab, puab tseem txhais tsi tau zaaj lug kws Xaaxoos txhaj rua puab txhais ntawd lub ntsab le.

¹⁵Nub plaub, puab txhaj moog has rua Xaaxoos tug quaspuj has tas, “Koj taij koj tug quasyawg kuas qha rua peb saib tej lug kws nwg txhaj rua peb txhais ntawd lub ntsab yog le caag. Yog koj tsi nug, peb yuav tis tawg hlawv koj txiv lub tsev hab muab koj hlawv nrug lub tsev ntawd. Tsi yog meb ob tug nyuas ko caw peb tuaj kuas meb tau txeeb peb tej khoom xwb los?”

¹⁶Yog le ntawd Xaaxoos tug quaspuj txhaj quaj lug cuag nwg hab has tas, “Koj tsi hlub kuv hlo le! Koj ntxub kuv kawg nkaus! Koj txhaj rua kuv cov phoojywg txhais, tabsis koj tsi qha lub ntsab rua kuv paub le!” Xaaxoos teb has tas, “Txawm yog kuv nam hab kuv txiv los kuv tub tsi qha. Kuv yuav ua le caag qha rua koj?”

¹⁷Xaaxoos tug quaspuj quaj ntsig txug zaaj ntawd tau xyaa nub kws noj tshoob ntawd le. Tabsis thaus txwm nkaus nub xyaa, Xaaxoos txawm qha zaaj lug kws nwg txhaj ntawd lub ntsab rua nwg tug quaspuj, vim nwg txob Xaaxoos txug zaaj ntawd heev. Ces tug quaspuj txawm qha rua cov Filitees.

¹⁸Yog le ntawd nub xyaa, ua ntej kws Xaaxoos moog huv txaaj, cov txivneej huv lub nroog ntawd has rua nwg tas, “Yaam dlaabtsi qaab zib tshaaj zib mu? Yaam dlaabtsi muaj zug tshaaj tsuv ntxhuav?” Xaaxoos teb has tas, “Yog mej tsi caab kuv tug maum nyuj moog laij lag, mej yeej txhais tsi tau kuv zaaj nuav le.”

¹⁹Taamsim ntawd tug TSWV tug ntsujplig ua rua Xaaxoos muaj zug heev, hab nwg txawm ca le nqeg moog rua nraag lub nroog Akeloos, nwg moog tua tuag peb caug leej txivneej rua nraag, nwg fuab puab hab nqaa puab tej rig tsho ntaub maag kws zoo heev lug rua cov tuabneeg kws txhais tau zaaj lug kws nwg txhaj ntawd. Tom qaab ntawd, nwg chim txug zaaj nuav heev, nwg txhaj rov qaab lug tsev lawm.

²⁰Thaus txug nub txis tshoob, luas txawm muab Xaaxoos tug quaspuj rua nwg tug phijlaaj yuav lawm.