Read Hmong Njua Cov Thawjtswj 16 Bible Online

Cov Thawjtswj 16 - Hmong Njua bible

Cov Thawjtswj 16

¹Muaj ib nub Xaaxoos moog txug rua huv cov Filitees lub nroog Nkaxas, nwg ntsib ib tug namndlav nyob huv, ces nwg moog nrug tug namndlav ntawd pw.

²Muaj tuabneeg moog qha rua cov tuabneeg huv lub nroog Nkaxas has tas, “Xaaxoos tuaj rua huv nuav lawm.” Puab txhaj moog vij qhov chaw ntawd, hab pw ntawm roojvaag nroog zuv ib mos kaaj ntug plawg. Puab zuv ib mos ntsag tu, puab xaav has tas, “Peb yuav tog txug thaus kaaj ntug tsaiv, peb maam nteg nwg tua povtseg.”

³Tabsis Xaaxoos moog pw huv txaaj txug thaus ib taag mo xwb. Ces nwg sawv moog dlawj lub roojvaag nroog, ob tug ncej hab tug ntsa laag qhovrooj, nwg muab kwv hlo rua sau xubpwg coj moog povtseg sau lub ncov roob kws saib ntsoov rua huv lub nroog Henploos.

⁴Tom qaab nuav muaj ib nub, Xaaxoos txawm nyam ib tug hluas nkauj hu ua Delilas nyob huv lub Haav Xaules.

⁵Cov Filitees cov thawjcoj moog cuag Delilas hab has rua nwg tas, “Koj sim nug Xaaxoos kuas nwg qha rua koj saib yog vim le caag nwg muaj zug ua luaj, hab yuav ua le caag peb txhaj kovyeej nwg, khi tau nwg hab ua kuas nwg tsi muaj zug. Yog koj nug tau, peb tuamyeem muab ib leeg ib txheeb ib puas dlaim nyaj rua koj.”

⁶Yog le ntawd, Delilas txhaj has rua Xaaxoos has tas, “Thov koj qha rua kuv saib yog ua le caag koj muaj zug ua luaj. Yog leejtwg xaav khi koj hab ua kuas koj tsi muaj zug nua, nwg yuav ua le caag txhaj kovyeej koj?”

⁷Xaaxoos teb has tas, “Yog puab muab xyaa txuj hlua neevnti tshab kws tseem tsi tau qhuav le coj lug khi kuv, ces kuv tsuas muaj zug ib yaam le suavdlawg lawm xwb.”

⁸Yog le ntawd, cov Filitees cov thawjcoj txhaj nqaa tau xyaa txuj hlua neevnti tshab kws tseem tsi tau qhuav tuaj rua Delilas muab Xaaxoos khi ca.

⁹Delilas tub kuas ib cov txivneej moog nyob ib chaav tsev tog lawm, nwg maam qw has tas, “Xaaxoos! Cov Filitees tuaj lawm!” Tabsis Xaaxoos nti ua rua cov hlua ntawd tu zum zawg ib yaam le nplaim tawg kub tej xuv. Yog le ntawd, puab tseem tsi tau paub has tas, yog vim le caag Xaaxoos txhaj muaj zug npaum le ntawd.

¹⁰Delilas has rua Xaaxoos has tas, “Saib maj, koj dlaag kuv hab tsi qha qhov tseeb rua kuv. Thov qha tseeb rua kuv saib, luas yuav ua le caag txhaj khi tau koj?”

¹¹Nwg qha rua Delilas has tas, “Yog puab muab tej hlua tshab kws tsi tau siv lug khi kuv, ces kuv tsuas muaj zug ib yaam le lwm tug lawm xwb.”

¹²Delilas txawm muab ib cov hlua tshab lug khi Xaaxoos hab qw has tas, “Xaaxoos! cov Filitees tuaj lawm!” Cov txivneej yeej nyob rawv huv ib chaav tsev tog. Tabsis Xaaxoos ntag tej hlua kws khi nwg ob saab ncej npaab tu ib yaam le tej xuv.

¹³Delilas has rua Xaaxoos has tas, “Koj tseem dlaag kuv hab tsi qha qhov tseeb rua kuv txug taav nuav le. Qha kuv saib, yuav ua le caag txhaj khi tau koj?” Nwg has rua Delilas has tas, “Yog koj muab kuv xyaa qais plaubhau ntus hab muab lub zuag npuaj kuas ruaj ruaj rua ntawm tug ntus, ces kuv tsuas muaj zug ib yaam le lwm tug lawm xwb.”

¹⁴Delilas txawm ntxag Xaaxoos pw tsaug zug, ces nwg muab Xaaxoos xyaa qais plaubhau ntus hab muab lub zuag npuaj kuas ruaj ruaj hab qw has tas, “Xaaxoos! Cov Filitees tuaj lawm!” Tabsis Xaaxoos sawv tseeg ntag ua rua nwg cov plaubhau nplaam plawg ntawm tug ntus lawm.

¹⁵Yog le ntawd Delilas txhaj has rua Xaaxoos has tas, “Vim le caag koj has tas, ‘Kuv hlub koj.’ Tabsis koj tub tsi muab sab npuab kuv le? Koj dlaag kuv peb zag lawm, hab koj tseem tsi tau qha rua kuv paub has tas yog dlaabtsi ua rua koj muaj zug ua luaj le ntawd.”

¹⁶Delilas naj nub nug Xaaxoos le ntawd. Xaaxoos dlhuav hab nkeeg noog txug tej kws Delilas pheej txob nwg,

¹⁷thaus kawg nwg txhaj ua ib sab qha qhov tseeb rua Delilas. Xaaxoos has tas, “Kuv cov plaubhau yeej ibtxwm tsi txav, rua qhov kuv yog ib tug Naxis rua Vaajtswv txij thaus yug tau kuv lug lawm. Yog muab kuv cov plaubhau txav, kuv tug zug yuav ntaug hab kuv tsuas muaj zug ib yaam le lwm tug lawm xwb.”

¹⁸Thaus Delilas paub has tas, Xaaxoos qha qhov tseeb rua nwg lawm, nwg txhaj khaiv tuabneeg moog has rua cov Filitees cov thawjcoj has tas, “Mej ca le rov tuaj. Nwg tub qha qhov tseeb rua kuv lawm.” Ces puab txawm tuaj hab nqaa nyaj tuaj.

¹⁹Delilas muab Xaaxoos ntxag pw tsaug zug rua huv nwg xubndlag, hab hu ib tug txivneej lug muab Xaaxoos xyaa qais plaubhau txav. Ces Delilas txawm tsimtxom Xaaxoos, rua qhov Xaaxoos tsi muaj zug lawm.

²⁰Delilas qw has tas, “Xaaxoos! Cov Filitees tuaj lawm!” Xaaxoos sawv tseeg lug, nwg xaav has tas, “Ua le caag los kuv tseem yuav muaj zug hab tsiv dlim.” Nwg tsi paub has tas tug TSWV tub tawm ntawm nwg moog lawm.

²¹Cov Filitees txhaj nteg tau nwg hab muab nwg ob lub qhovmuag kaus povtseg. Puab caab nwg moog rua huv lub nroog Nkaxas, muab saw hlau khi nwg, hab yuam nwg zum zeb huv tsev lojcuj.

²²Tabsis nwg cov plaubhau kws puab muab txav lawm, ntev zuj zug rov tuaj.

²³Cov Filitees cov thawjcoj tuaj sis sau ua ke coj khoom tuaj fij ua kev zoo sab txi puab tug vaajtswv Dankoos. Puab hu nkauj has tas, “Peb tug vaajtswv tau coj Xaaxoos kws yog peb tug yeebncuab lug cob rua peb teg lawm tag lauj!”

²⁴Thaus cov tuabneeg suavdlawg pum Xaaxoos, puab hu nkauj qhuas puab tug vaajtswv has tas, “Peb tug vaajtswv coj peb tug yeebncuab lug cob rua peb teg lawm, nwg yog tug rhuav tshem peb lub tebchaws hab tua peb cov tuabneeg tuag ua tsheej pawg ntaag.”

²⁵Thaus puab tuaj ua ke zoo sab, puab has tas, “Coj Xaaxoos tawm lug rua peb saib.” Ces puab txhaj coj Xaaxoos tawm huv tsev lojcuj lug rua puab saib.

²⁶Xaaxoos has rua tug mivnyuas tub kws tuav nwg teg lug ntawd has tas, “Koj coj kuv moog tuav cov ncej tse nuav. Rua qhov kuv xaav pheeb cov ncej ntawd.”

²⁷Lub tsev ntawd muaj quaspuj hab txivneej coob heev tuaj nyob puv nkaus. Cov Filitees cov thawjcoj puavleej tuaj nyob ntawd. Xaam taagnrho quaspuj hab txivneej muaj kwvlaam peb txheeb leej tuaj sawv txheej tsev sau saib Xaaxoos.

²⁸Ces Xaaxoos thov has tas, “Tug TSWV kws kaav ib puas tsaav yaam, thov ncu txug kuv lauj! Vaajtswv, zag nuav thov koj pub rua kuv rov muaj zug le qub ib zag ntxiv, kuas kuv pauj tau cov Filitees nuav. Kuv chim heev vim puab muab kuv ob lub qhovmuag kaus povtseg lawm.”

²⁹Yog le ntawd, Xaaxoos txhaj tuav ob tug ncej huv plawv kws txheem lub tsev ntawd. Nwg muab ib saab teg tuav ib tug ncej, ces nwg thawb ob tug ncej ntawd,

³⁰hab qw has tas, “Ca kuv tuag nrug cov Filitees ua ke lauj!” Nwg siv zug thawb taagnrho nwg tug zug, lub tsev ntawd txhaj qaug lug ntaus cov thawjcoj hab txhua tug kws nyob huv lub tsev ntawd tuag taag huv tuabsi. Thaus Xaaxoos tuag, nwg tua cov Filitees tuag coob tshaaj thaus nwg tseem ua neej nyob.

³¹Nwg cov kwvtij hab nwg tsev tuabneeg tuaj kwv nwg moog log rua huv nwg txiv Manau-as lub qhov ntxaa kws nyob ntawm lub nroog Xaulas hab lub nroog Eta-aus ntu nruab nraab. Nwg ua cov Yixalayees tug thawjcoj tau neeg nkaum xyoo.