Read Hmong Njua Cov Thawjtswj 17 Bible Online

Cov Thawjtswj 17 - Hmong Njua bible

Cov Thawjtswj 17

¹Muaj ib tug txivneej npe hu ua Mikhas nyob peg laaj roob Efalayees.

²Nwg has rua nwg nam has tas, “Koj ib txheeb ib puas dlaim nyaj kws luas nyag lawm, koj tau foom tsi zoo rua tug tubsaab ntawd, nwgnuav cov nyaj nyob ntawm kuv. Kuv yog tug nyag cov nyaj ntawd ntaag.” Nwg nam has tas, “Kuv tug mivtub, thov tug TSWV foom koob moov rua koj!”

³Nwg muab cov nyaj ntawd rov qaab rua nwg nam, nwg nam has tas, “Thov kuas tej lug kws kuv foom tsi zoo poob ntawm kuv tug tub moog, kuv thov coglug muab cov nyaj nuav fij rua tug TSWV. Yuav muab cov nyaj nuav moog ua ob tug mlom, ib tug yog txaug hab ib tug yog nchuav. Yog le ntawd, kuv yuav muab cov nyaj nuav rov qaab rua koj.”

⁴Yog le ntawd, nwg txhaj muab cov nyaj ntawd rov rua nwg nam. Nwg nam txhaj nqaa ob puas dlaim nyaj ntawd moog rua ib tug kws nchuav nyaj, nwg muab ua ob tug mlom, ib tug yog txaug hab ib tug yog nchuav, nqaa moog txawb rua huv Mikhas tsev.

⁵Tug Mikhas nuav, muaj ib lub tsev teev mlom. Nwg muaj ntau tug mlom hab muaj ib tug efaus, nwg tsaa nwg cov tub ib tug ua povthawj.

⁶Lub sijhawm ntawd cov Yixalayees tsi muaj vaajntxwv kaav puab; txhua tug tuabneeg nyag ua lawv le nyag lub sab nyam xwb.

⁷Lub sijhawm ntawd, muaj ib tug tub hluas Levis nyob huv lub nroog Npelehees huv xeev Yudas.

⁸Nwg tsiv tawm huv lub nroog Npelehees moog nrhav chaw nyob rua lwm qhov. Thaus nwg taabtom taug kev moog, nwg moog txug huv Mikhas lub tsev kws nyob peg laaj roob Efalayees.

⁹Mikhas nug tug tub hluas ntawd has tas, “Koj tuaj qhov twg tuaj?” Nwg teb has tas, “Kuv yog ib tug tub hluas Levis, kuv nyob huv lub nroog Npelehees xeev Yudas tuaj. Kuv tuaj nrhav chaw nyob.”

¹⁰Mikhas teb has tas, “Koj ca le nrug kuv nyob ua kuv txiv hab ua kuv tug povthawj. Ib xyoos twg kuv muab kaum dlaim nyaj, muab rig tsho hab zaub mov rua koj.”

¹¹Tug tub hluas Levis txaus sab nrug Mikhas nyob hab ua zoo le nwg yog Mikhas tug tub lawm ntaag.

¹²Mikhas tsaa nwg ua Mikhas tug povthawj hab nwg nyob huv Mikhas tsev.

¹³Mikhas has tas, “Nwgnuav kuv muaj ib tug Levis lug ua kuv tug povthawj lawm. Kuv paub tug TSWV yuav ua kuas txhua yaam zoo rua kuv.”