Read Hmong Njua Cov Thawjtswj 19 Bible Online

Cov Thawjtswj 19 - Hmong Njua bible

Cov Thawjtswj 19

¹Ua ntej cov Yixalayees muaj vaajntxwv, muaj ib tug tuabneeg Levis nyob peg lub laaj roob Efalayees kws nyob nrug dleb rua ib qho. Nwg tuaj yuav tau ib tug hluas nkauj huv lub nroog Npelehees xeev Yudas ua nwg nam yau.

²Tabsis tug nam yau ntawd tsi txaus sab rua nwg tug quasyawg, nwg txhaj tsiv rov qaab moog rua nraag nwg txiv tsev huv lub nroog Npelehees, hab nyob nraag tau plaub hlis.

³Ces tug quasyawg caum qaab moog hab thov kuas nwg rov lug nrug tug quasyawg nyob. Tug quasyawg coj nwg tug qhev hab caab ob tug neeg luav nrug nwg moog. Nwg tug nam yau txawm coj nwg moog huv leej txiv tsev, thaus leej txiv pum tug Levis, nwg lug puag nkaus hab zoo sab heev.

⁴Ces nwg yawmtxiv cheem kuas nwg nyob, nwg txhaj nrug yawmtxiv nyob tau peb nub, noj haus hab pw huv yawmtxiv tsev.

⁵Nub plaub puab txawm sawv ntxuv lug npaaj hab yuav rov lug tsev. Tabsis yawmtxiv cheem nwg tug vauv has tas, “Ua tshais sav rua mej noj tsaiv, mej maam le moog.”

⁶Yog le ntawd, yawmtxiv hab tug vauv rov nyob quastsawg noj haus ua ke dlua. Ces yawmtxiv has rua tug vauv has tas, “Rov pw ib mos ntxiv kuas peb zoo sab tsaiv.”

⁷Tug Levis yuav sawv kev moog, tabsis yawmtxiv cheem nwg heev kuas nyob xwb, yog le ntawd, nwg txhaj pw ib mos ntxiv.

⁸Nub tsib thaus sawv ntxuv nwg txawm sawv kev moog, tabsis yawmtxiv has tas, “Tog noj tshais taag tsaiv maam le moog.” Obtug txhaj tog txug thaus nub qaij, yawmtxiv hab tug vauv rov moog noj mov ua ke.

⁹Thaus tug txivneej ntawd, nwg tug nam yau hab tug qhev rov sawv kev dlua, yawmtxiv txawm has tas, “Nub tub yuav poob qho; mej yuavtsum tau rov nyob ib mos ntxiv hab tsaiv. Tub yuav tsaus ntuj taamsim nuav ntaag; nyob kuas zoo sab. Pigkig mej maam le sawv ntxuv moog.”

¹⁰Tabsis tug Levis tsi kaam nyob lawm, nwg txhaj sawv kev coj nwg tug nam yau, ob tug neeg luav hab tug qhev moog rua tom lub zog Yenpus, (kws yog lub nroog Yeluxalees.)

¹¹Thaus puab lug txug ze rua ntawm Yenpus lub nub tub yuav laug poob qho, tug qhev has rua nwg tug tswv has tas, “Yuav ua le caag, tub yuav tsaus ntuj, ces peb su ib mos huv cov Yenpus lub nroog, pigkig peb maam le moog.”

¹²Tug tswv teb has tas, “Cov tuabneeg ntawd tsi yog Yixalayees, peb tsi xob pw huv puab lub nroog. Peb moog kuas txug tom lub nroog Nkinpe-as tsaiv, peb maam le su tod.”

¹³Nwg has ntxiv tas, “Peb moog ceev nrooj kuas txug lub nroog Nkinpe-as lossis Lamas tsaiv, peb maam le pw ib mos tom ob lub nroog ntawd ib lub.”

¹⁴Yog le ntawd, puab txhaj dlhau lub nroog Yenpus lug txug rua huv lub nroog Nkinpe-as kws yog xeem Npeenyamees cheebtsaam aav, nub taabtom poob qho kag.

¹⁵Puab txhaj ncaim kev moog nrhav chaw pw rua huv lub nroog ntawd. Puab moog nyob ntawm ib qhov chaw huv plawv nroog, tabsis tsi muaj leejtwg tuaj coj puab moog tsev le.

¹⁶Puab nyob qhov ntawd tau ntev loo, muaj ib tug txivneej laug moog ua teb lug, thaus ntawd lub nub tub poob qho lawm. Nwg yeej ibtxwm yog tuabneeg nyob peg lub laaj roob Efalayees, tabsis nwgnuav nwg lug nyob nraag lub nroog Nkinpe-as lawm. (Cov tuabneeg kws nyob huv lub nroog ntawd yog xeem Npeenyamees.)

¹⁷Tug yawm laug ntawd pum cov tuabneeg taug kev kws lug su ntawm plawv nroog hab nwg nug has tas, “Mej tuaj qhov twg tuaj? Mej yuav moog qhov twg?”

¹⁸Tug Levis teb has tas, “Peb moog nraag lub nroog Npelehees huv xeev Yudas lug, hab peb yuav rov lug moog tsev rua peg lub laaj roob Efalayees,

¹⁹txawm yog peb muaj quavnyaab rua peb cov neeg luav noj, hab muaj ncuav, muaj cawv txiv maab rua kuv, kuv tug nam yau hab kuv tug qhev noj. Txhua yaam peb puavleej muaj txhij los yeej tsi muaj leejtwg coj peb moog nrhav chaw su le.”

²⁰Tug yawm laug ntawd has tas, “Mej ca le moog su huv kuv tsev! Kuv yuav nrhav chaw rua mej; mej tsi xob pw ntawm tshaav puam nuav.”

²¹Yog le ntawd, nwg txhaj coj puab moog huv nwg tsev hab muab zaub rua puab cov neeg luav noj. Nwg muab dlej rua puab ntxuav kutaw hab rau mov rua puab noj.

²²Thaus puab su lug sav lawm, muaj ib paab tuabneeg phem ua nkauj ua nraug huv lub nroog ntawd txawm tuaj vij lub tsev hab tsoo qhovrooj. Puab has rua tug yawm laug has tas, “Ca le coj tug txivneej kws koj coj lug tsev lawm tuaj rua peb! Peb xaav ntxag nwg heev!”

²³Tabsis tug yawm laug tawm moog saab nrau hab has tas, “Kuv cov phoojywg! Thov lauj! Mej tsi xob ua tej kev phem kev qas, kev tsi ncaaj tsi nceeg le nuav! Tug txivneej nuav yog kuv tug qhua.

²⁴Mej saib, tug nuav yog nwg tug nam yau hab kuv tug ntxhais nkaujxwb. Kuv yuav coj obtug tuaj taamsim nuav, mej ca le coj obtug moog, hab ua rua obtug lawv le mej sab nyam. Tabsis thov tsi xob ua phem rua tug txivneej nuav.”

²⁵Tabsis cov txivneej ntawd tsi noog tug yawm laug has le. Yog le ntawd, tug Levis txhaj thawb ntag nwg tug nam yau rua saab nrau rua puab. Puab mos ntho nwg hab muab nwg yuam ib mos kaaj ntug plawg maam le tso nwg lug.

²⁶Thaus kaaj ntug txoog tug quaspuj txhaj lug qaug rua ntawm tug yawm laug lub qhovrooj, lub tsev kws nwg tug quasyawg su. Nwg pw nrau qhovrooj moog txug thaus nub tuaj.

²⁷Nwg tug quasyawg sawv ntxuv lug, hab thaus nwg qheb qhovrooj yuav moog tsev, nwg pum nwg tug nam yau pw xyaab leeg ntawm qhovrooj, ob txhais teg ncaav moog rua ntawm lub qhovrooj.

²⁸Nwg txhaj has tas, “Ca le sawv. Peb yuav moog tsev.” Tabsis tsi nov teb le. Yog le ntawd, nwg txhaj puag hlo tug quaspuj rua sau tug neeg luav nrausqaum hab moog tsev lawm.

²⁹Thaus nwg lug txug tsev, nwg muab rag txav nwg tug nam yau lub cev ua kaum ob thooj, hab muab xaa moog rua kaum ob xeem Yixalayees ib xeem ib thooj.

³⁰Txhua tug kws pum thooj nqaj ntawd puavleej has tas, “Peb ibtxwm tsi tau pum dlua ib zag le nuav. Txij thaus peb tsiv nraag tebchaws Iziv lug, tsi tau muaj tej xwmtxheej phem zoo le nuav tshwmsim rua peb tsaav tuabneeg le. Peb yuavtsum tau mob sab txug zaaj nuav! Hab saablaaj saib peb yuav ua le caag.”