Read Hmong Njua Cov Thawjtswj 2 Bible Online

Cov Thawjtswj 2 - Hmong Njua bible

Cov Thawjtswj 2

¹Tug TSWV tug timtswv tawm huv lub nroog Nkilenkas moog rua huv lub nroog Npaukhees hab has rua cov Yixalayees has tas, “Kuv coj mej tawm nraag tebchaws Iziv hab coj mej lug nyob huv lub tebchaws kws kuv coglug tseg rua mej cov yawmkoob lawm. Kuv qha rua mej has tas, ‘kuv yuav tsi rhuav tej lug kws kuv tau cog tseg rua mej lawm ib zag le.

²Mej yuavtsum tsi xob nrug cov tuabneeg kws nyob huv lub tebchaws nuav coglug. Mej yuavtsum muab puab tej thaaj teev dlaab tsoo povtseg.’ Tabsis mej tsi ua lawv le kuv kuas mej ua. Mej ca le moog ua lwm yaam lawm xwb!

³Yog le ntawd, nwgnuav kuv qha rua mej has tas, kuv yuav tsi ntab cov tuabneeg nuav tawm ua ntej kws mej moog. Puab yuav ua yeebncuab rua mej hab puab tej vaajtswv yuav ua ntxab cuab tog mej kev.”

⁴Thaus tug timtswv has le ntawd, cov Yixalayees txawm quaj zum zawg,

⁵hab tub yog vim le nuav txhaj muab thaaj chaw ntawd ti npe hu ua Npaukhees. Puab txhaj tua tsaj fij rua tug TSWV ntawm qhov chaw ntawd.

⁶Yausuas tso cov Yixalayees rov qaab moog, hab puab nyag rov moog nyob rua huv nyag cheebtsaam kws tub faib rua puab lawm.

⁷Cov Yixalayees ua tug TSWV teg num moog txug nub kws taag Yausuas tam neej. Thaus Yausuas tuag, puab tseem ua tug TSWV teg num moog txug nub kws cov thawjcoj kws pum txhua yaam num tseemceeb kws tug TSWV ua paab cov Yixalayees tuag taag huv tuabsi lawm hab.

⁸Tug TSWV tug tubkhai Yausuas kws yog Noos tug tub tuag thaus nwg noobnyoog muaj ib puas kaum xyoo.

⁹Puab txhaj muab nwg log rua huv nwg thaaj aav huv lub nroog Tinas Xelas, peg lub laaj roob Efalayees kws nyob ntawm lub Roob Nkasas saab qaumteb.

¹⁰Cov laug kws nyob tam ntawd puavleej tuag taag huv tuabsi lawm, ces tam tom qaab nuav tsi ncu qaab txug tug TSWV tej txaj ntsig kws nwg tau ua rua tsaav tuabneeg Yixalayees le lawm.

¹¹Ces cov Yixalayees txawm ua txhum tawmtsaam tug TSWV hab pib moog teev tej mlom Npa-aas.

¹²Puab tseg tsi pehawm tug TSWV kws yog puab cov yawmkoob tug Vaajtswv, yog tug Vaajtswv kws coj puab tawm nraag tebchaws Iziv lug, hab puab pib moog pe lwm tsaav tuabneeg kws nyob ibncig puab tej vaajtswv. Puab pe tej vaajtswv ntawd hab ua rua tug TSWV chim heev rua puab.

¹³Puab tso tseg tsi pehawm tug TSWV hab moog teev tej mlom Npa-aas hab teev tej mlom Atates.

¹⁴Tug TSWV txhaj chim heev rua cov Yixalayees hab tso tej tubsaab tuaj tua hab fuab puab. Nwg tso puab rua cov yeebncuab kws nyob ibncig puab ua cov tswjfwm puab. Cov Yixalayees tsi muaj peevxwm tawmtsaam cov yeebncuab ntawd le lawm.

¹⁵Txhua zag kws puab moog ntaus rog, tug TSWV tso kev phem lug raug puab lawv le nwg tau ceebtoom hab coglug rua puab lawm. Puab txhaj raug kev txomnyem heev.

¹⁶Tug TSWV pub cov Yixalayees muaj tej thawjcoj lug cawm kuas puab dlim ntawm tej tubsaab.

¹⁷Tabsis cov Yixalayees tseem tsi noog puab cov thawjcoj lug hab. Puab tsi muab sab npuab tug TSWV hab moog pehawm lwm tsaav tuabneeg tej vaajtswv. Puab cov yawmkoob yeej ibtxwm noog tug TSWV tej lug saamfwm, tabsis tam nwgnuav tsi ua lawv le ntawd lawm.

¹⁸Thaus twg kws tug TSWV pub rua cov Yixalayees muaj ib tug thawjcoj, tug TSWV yeej paab nwg hab cawm kuas puab dlim ntawm puab cov yeebncuab teg moog txug thaus kws tug thawjcoj ntawd taag simneej. Tug TSWV taabncuab puab rua qhov puab quaj ntsuag rua puab tej kev txomnyem hab kev tsimtxom.

¹⁹Tabsis thaus tug thawjcoj tuag lawm, cov pejxeem tig rov moog ua le puab txuj qub kev hab tseem ua phem tshaaj tam thaus u lawm hab. Puab tseem teev hab pe luas tej vaajtswv, hab muaj lub sab tawv ua phem ua qas tsi tso tseg le.

²⁰Tug TSWV chim heev rua cov Yixalayees hab has tas, “Tsaav tuabneeg nuav muab tej lug kws thaus u kuv cog tseg rua puab cov yawmkoob tso tseg lawm. Rua qhov puab tsi noog kuv lug,

²¹kuv yuav tsi ntab tej tsaav tuabneeg kws thaus Yausuas tuag tseem tsi tau muab ntab tawm ntawd, tawm huv lub tebchaws moog.

²²Kuv yuav siv cov tuabneeg ntawd sim cov Yixalayees sab saib puab puas yuav taug kuv txujkev, ib yaam le puab cov yawmkoob ibtxwm ua lug lawm.”

²³Yog le ntawd, tug TSWV txhaj tseg cov tuabneeg ntawd nyob huv lub tebchaws; nwg tsi pub kuas Yausuas tua yeej puab, txawm yog thaus Yausuas tub tuag lawm los tug TSWV tseem tsi tau ntab puab tawm moog sai hab.