Read Hmong Njua Cov Thawjtswj 20 Bible Online

Cov Thawjtswj 20 - Hmong Njua bible

Cov Thawjtswj 20

¹Taagnrho cov Yixalayees kws nyob peg lub nroog Daas saab qaumteb thoob plawg moog txug nraag lub nroog Npesenpas saab qaabteb, thoob plawg lug rua huv lub xeev Nkile-as kws nyob saab nubtuaj, puavleej teb lu lug nqua hu ntawd. Puab tuaj txoos ua ke koom ua ib lub sab taabmeeg tug TSWV huv qhov chaw sis ntsib ntawm lub nroog Mixepas.

²Txhua xeem Yixalayees cov thawjcoj puavleej tuaj koom nrug Vaajtswv tsaav tuabneeg, muaj plaub puas txheeb tug tubrog kws nqaa rawv cuabyeej ua rog tuaj nyob qhov ntawd.

³Thaus kws cov Npeenyamees nov has tas, taagnrho cov Yixalayees tuaj sis sau rua huv lub nroog Mixepas lawm. Ces cov Yixalayees nug has tas, “Qha rua peb saib, yog ua le caag txhaj muaj txujkev phem kev qas le nuav?”

⁴Tug Levis kws tug nam yau raug tua ntawd teb has tas, “Thaus kuv tug nam yau hab kuv lug txug nraag lub nroog Nkinpe-as, huv cov Npeenyamees cheebtsaam aav, wb lug pw ib mos nraag.

⁵Mo ntawd cov txivneej kws nyob huv lub nroog Nkinpe-as txawm tuaj vij tsev nteg kuv. Puab npaaj sab xaav tua kuv povtseg; tabsis puab txawm mos ntho kuv tug nam yau coj moog yuam hab ua rua nwg tuag le lawm.

⁶Kuv txhaj coj nwg lub cevlug txav ua tej thooj le nuav, hab muab xaa moog thoob plawg cov Yixalayees kaum ob xeem, ib xeem ib thooj. Cov tuabneeg nuav tau ua phem ua qas hab ua tsi ncaaj rhuav peb ntsejmuag kawg le.

⁷Taagnrho mej cov kws nyob ntawm nuav puavleej yog tuabneeg Yixalayees. Saib peb yuav ua le caag rua zaaj nuav?”

⁸Taagnrho cov pejxeem txhaj sawv tseeg hab has tas, “Tsi pub peb ib tug twg kws nyob huv tsevntaub lossis nyob huv tsev, moog tsev le.!

⁹Peb yuavtsum ua le nuav: Peb ca le rhu ntawv hab xaiv ib paab tuabneeg moog tua lub nroog Nkinpe-as.

¹⁰Muab cov Yixalayees rhu kaum leej tawm ntawm ib puas leej, ib puas leej tawm ntawm ib txheeb leej, ib txheeb leej tawm ntawm kaum txheeb leej, ua cov muab zaub mov rua cov tubrog noj, hab dlua le lwm cov ca moog rau txim rua cov tuabneeg huv lub nroog Nkinpe-as txujkev ua tsi ncaaj kws puab tau ua txhum rua tsaav tuabneeg Yixalayees nuav.”

¹¹Yog le ntawd, taagnrho cov Yixalayees cov txivneej txhaj tuaj sis sau koom ua ib lub sab moog tua lub nroog Nkinpe-as.

¹²Txhua xeem Yixalayees puavleej khaiv tuabneeg xaa xuv moog thoob plawg xeem Npeenyamees has tas, “Vim le caag mej yuav ua phem ua qas le nuav?

¹³Nwgnuav mej ca le muab cov nam tuabneeg phem kws nyob huv lub nroog Nkinpe-as cob rua peb teg, peb yuav muab puab tua povtseg kuas taag, txhaj le tshem tau txujkev phem kev qas nuav tawm huv tsaav tuabneeg Yixalayees moog.” Tabsis cov Npeenyamees tsi quavntsej noog cov Yixalayees has le.

¹⁴Taagnrho cov Npeenyamees kws nyob txhua lub nroog txawm tuaj sis sau rua huv Nkinpe-as tua cov Yixalayees.

¹⁵Nub ntawd cov Npeenyamees txawm txhij tau neeg nkaum rau txheeb tug tubrog kws txawj tua ntaaj huv puab tej nroog tuaj ntxiv rua xyaa pua tug tubrog kws puab xaiv tshwjxeeb huv lub nroog Nkinpe-as.

¹⁶Taagnrho cov tubrog xyaa pua leej kws puab xaiv tshwjxeeb ntawd, xis saab txhumphem xwb, hab txhua tug puavleej txawj ntaus zeg hlua ncaaj kawg le, txawm yog tsom ntsoov rua ib txuj plaubhau xwb los yeej raug le.

¹⁷Cov Yixalayees tej tubrog kws txeev tua rog lug lawm muaj plaub puas txheeb leej; tsi suav cov Npeenyamees.

¹⁸Cov Yixalayees moog rua huv lub chaw pehawm Vaajtswv huv lub nroog Npethees hab nug Vaajtswv has tas, “Peb yuav ca xeem twg ua ntej moog tua cov Npeenyamees?” Tug TSWV teb has tas, “Ca xeem Yudas moog ua ntej.”

¹⁹Yog le ntawd, taagkig sawv ntxuv cov Yixalayees txawm moog tsuam yeej ze rua ntawm lub nroog Nkinpe-as.

²⁰Cov Yixalayees txhaj moog tua cov Npeenyamees, hab cov tubrog moog nyob taagnrho rua tej chaw kws yuav sis tua ntawm lub nroog Nkinpe-as.

²¹Thaus nub tseem tsi tau poob qho, cov tubrog Npeenyamees tawm huv nroog tuaj tua cov tubrog Yixalayees tuag lawm neeg nkaum ob txheeb leej.

²²Ces cov Yixalayees rov moog rua ntawm qhov chaw pehawm Vaajtswv hab quaj thov tug TSWV moog txug thaus tsaus ntuj. Puab nug tug TSWV has tas, “Puas tsimnyog peb moog ua rog tawmtsaam peb cov kwvtij Npeenyamees ntxiv lawm?” Tug TSWV teb has tas, “Mej ca le rov qaab moog.?” Yog le ntawd, cov tubrog Yixalayees txhaj zoo sab hlo rov moog nyob ntawm puab tej qub chaw kws puab tub xub nyob thawj nub lawm.

²³

²⁴Nub ob cov Yixalayees rov moog tua cov Npeenyamees dlua.

²⁵Nub ob cov tubrog Npeenyamees rov tawm huv lub nroog Nkinpe-as tuaj tua cov Yixalayees, zag nuav puab tua cov tubrog Yixalayees kws txeev tua rog lug lawm tuag kaum yim txheeb leej.

²⁶Ces cov tubrog Yixalayees rov moog rua peg lub nroog Npethees, hab quaj rua tug TSWV dlua. Puab moog nyob huv qhov chaw kws nrug tug TSWV sis ntsib hab yoo mov moog txug thaus tsaus ntuj. Puab muab tsaj tua hlawv fij hab fij khoom ua kev sis raug zoo rua tug TSWV.

²⁷Lub sijhawm ntawd, lub Phijxaab kws ntim Vaajtswv tej lug cog tseg tseem nyob huv lub nroog Npethees, hab Ele-axas tug tub Finehas kws yog Aloos tug xeebntxwv, ua tug saib lub Phijxaab ntawd. Cov pejxeem txhaj nug tug TSWV has tas, “Peb tseem yuav rov moog ua rog rua peb cov kwvtij Npeenyamees dlua lossis ca peb tso tseg?” Tug TSWV teb has tas, “Ca le rov moog tua. Pigkig Kuv yuav pub kuas mej tua yeej cov Npeenyamees.”

²⁸

²⁹Yog le ntawd, cov Yixalayees txhaj tso ib cov tubrog moog nkaum puagncig lub nroog Nkinpe-as.

³⁰Ces nub peb cov Yixalayees rov moog tua cov Npeenyamees hab puab cov tubrog moog nyob rua ntawm puab tej chaw sis tua huv lub nroog Nkinpe-as ib yaam le ob zag taag lug lawm.

³¹Cov Npeenyamees txawm tawm tuaj tua hab raug ntxag coj moog dleb ntawm lub nroog. Puab txawm pib tua cov Yixalayees ib yaam le puab tua thawj ob zag. Nyob tom taj nraag hab ntawm ob txujkev tshuam; ib txuj moog rua huv lub nroog Npethees hab ib txuj moog rua huv lub nroog Nkinpe-as. Puab tua cov Yixalayees tuag peb caug leej.

³²Cov Npeenyamees has tas, “peb yuav tua yeej puab ib yaam le thawj ob zag taag lug lawm hab.” Tabsis cov Yixalayees tuav tswvyim ntxag hab coj cov Npeenyamees moog kuas nrug dleb lub nroog tsaiv.

³³Yog le ntawd, thaus cov tubrog Yixalayees ua txuj tsiv rov qaab hab moog sis sau rua peg Npa-aas Tamaj, ces taamsim ntawd cov tubrog dlha tawm huv puab tej chaw nkaum ntawm lub nroog Nkinpe-as saab nubpoob lug.

³⁴Ces kaum txheeb leej txivneej kws xaiv tshwjxeeb ntawd cov Yixalayees txhaj moog tua lub nroog Nkinpe-as, hab puab sis tua nyaav kawg le. Cov Npeenyamees tsi paub has tas, puab yuav raug kev puamtsuaj luj npaum le ntawd.

³⁵Tug TSWV pub cov Yixalayees tua yeej cov Npeenyamees. Nub ntawd cov Yixalayees tua puab cov yeebncuab tuag neeg nkaum tsib txheeb ib puas leej,

³⁶cov Npeenyamees txhaj paub has tas, puab swb cov Yixalayees lawm. Cov tubrog Yixalayees ua txuj swb cov Npeenyamees rov qaab ntawd, tub yog puab ca sab rua cov kws puab tso moog nkaum puagncig lub nroog Nkinpe-as.

³⁷Cov txivneej ntawd dlha ceev nrooj moog rua huv lub nroog Nkinpe-as; puab sis faib moog thoob plawg lub nroog hab tua txhua tug kws nyob huv tuag taag huv tuabsi.

³⁸Paab tubrog Yixalayees hab cov txivneej kws nkaum ntawm ntug nroog, sis thaam kuas muab tej yaam dlaabtsi hlawv kuas muaj paa nchu rua sau nruab ntug. Hab thaus cov Yixalayees kws ua txuj tsiv tawm huv tshaav rog lug pum cov paa nchu nto ntuj plawg huv lub nroog tuaj;

³⁹ces puab tig rov qaab tiv tua. Thaus ntawd cov Npeenyamees tub tua cov Yixalayees tuag peb caug leej lawm. Puab rov sis thaam has tas, “Yog tag, cov Yixalayees swb peb ib yaam le thawj ob zag lawm.”

⁴⁰Tabsis thaus paa tawg pib nchu luj zuj zug tshwm tom nroog tuaj, cov Npeenyamees tig saib pum paa tawg nchu auv nab nto ntuj plawg, ua rua puab xaav tsi thoob le.

⁴¹Ces cov Yixalayees tig tua cov Npeenyamees, hab cov Npeenyamees poob sab luj heev, rua qhov puab paub has tas, zag nuav puab raug kev puamtsuaj lawm.

⁴²Puab txhaj tig tsiv cov Yixalayees taug kev moog rua tom taj suabpuam, tabsis puab tsiv tsi dlim le. Puab taabtom moog raug paab tubrog kws coob tshaaj hab cov txivneej kws rov huv lub nroog lug nteg hab muab tua tuag taag xwb.

⁴³Cov Yixalayees moog tog cov yeebncuab kev, hab caum cov yeebncuab tsi su le moog txug ndlua ntawm lub nroog Nkinpe-as saab nubtuaj.

⁴⁴Kaum yim txheeb leej tubrog Npeenyamees kws sab tawv heev raug tua tuag taag huv tuabsi.

⁴⁵Dlua le lwm paab tsiv moog rua tom taj nraag moog txug ntawm lub Pobzeb Leemoos. Muaj tsib txheeb leej raug tua tuag taag rua ntawm tej tog kev. Cov Yixalayees tseem caum cov Npeenyamees kws seem moog txug rua huv lub nroog Nkidoos hab tua cov Npeenyamees tuag ob txheeb leej.

⁴⁶Taagnrho cov Npeenyamees kws raug tua tuag nub ntawd muaj neeg nkaum tsib txheeb leej. Puab cov ntawd puavleej yog cov tubrog kws sab tawv heev xwb.

⁴⁷Tabsis cov txivneej rau pua leej kws tsiv moog rua ntawm lub taj nraag tom lub Pobzeb Leemoos txhaj le dlim, hab puab nkaum tau plaub hlis tod.

⁴⁸Cov Yixalayees rov qaab moog muab cov Npeenyamees kws seem tua tuag taag huv tuabsi, tsi has txivneej, quaspuj, mivnyuas, hab tsaj txhu. Cov Yixalayees muab txhua lub zog kws nyob cheebtsaam ntawd hlawv kub nyaab taag dlu lug.