Read Hmong Njua Cov Thawjtswj 21 Bible Online

Cov Thawjtswj 21 - Hmong Njua bible

Cov Thawjtswj 21

¹Thaus cov Yixalayees moog sis sau ua ke rua huv lub nroog Mixepas, puab tau coglug rua tug TSWV has tas, “Peb cov Yixalayees yuav tsi muab peb tej ntxhais qua rua cov Npeenyamees ua quaspuj le.”

²Yog le ntawd, cov Yixalayees txhaj moog rua huv lub nroog Npethees hab moog nyob ntawm qhov chaw kws nrug Vaajtswv sis ntsib moog txug thaus tsaus ntuj. Puab quaj nyav ab sab heev has tas:

³“Tug TSWV kws yog cov Yixalayees tug Vaajtswv, vim le caag yuav muaj tej xwmtxheej nuav? Vim le caag xeem Npeenyamees ca le tu noob huv tsaav tuabneeg Yixalayees moog lawm?”

⁴Taagkig kaaj ntug txoog cov pejxeem sawv ntxuv moog teeb tau ib lub thaaj rua huv lub nroog ntawd. Puab muab tsaj tua hlawv fij, hab fij khoom ua kev sis raug zoo rua tug TSWV.

⁵Puab txawm nug has tas, “Yog le ntawd, peb cov Yixalayees puas muaj xeem twg kws tsi tau moog nrug suavdlawg koom ua ke rua ntawm qhov chaw kws nrug tug TSWV sis ntsib huv lub nroog Mixepas?” (Puab tub tau coglug tseg lawm has tas, yog leejtwg tseem tsi moog koom ua ke rua huv lub nroog Mixepas, yuavtsum muab tug ntawd tua povtseg.)

⁶Cov Yixalayees tu sab heev vim tej kws puab tau ua rua puab cov kwvtij Npeenyamees. Puab txhaj has tas, “Nub nua cov Yixalayees ib xeem tu noob lawm.

⁷Peb yuav ua le caag txhaj nrhav tau quaspuj rua cov txivneej Npeenyamees kws seem ntawd? Rua qhov peb tau coglug rua tug TSWV lawm has tas, peb yuav tsi muab peb tej ntxhais qua rua puab ua quaspuj.”

⁸Ces puab sis nug has tas, “Cov Yixalayees xeem twg txhaj tsi tau moog pehawm tug TSWV huv lub nroog Mixepas?” Suavdlawg pum cov kws nyob huv lub nroog Yanpes huv Nkinpe-as, yeej tsi muaj ib paab twg tuaj rua huv lub yeej ntawd le.

⁹Thaus puab hu cov tubrog lug txheeb saib paab twg tuaj qhov twg tuaj, mas tsi pum cov nyob huv lub nroog Yanpes tuaj ntawd le.

¹⁰Yog le ntawd cov pejxeem kws tuaj sis sau, txhaj tso tau kaum txheeb tug txivneej kws sab tawv heev hab saamfwm rua puab has tas, “Mej ca le moog muab txhua tug tuabneeg kws nyob huv lub nroog Yanpes tua kuas tuag taag, lojxov tej quaspuj hab mivnyuas tsi pub seem ib tug le.

¹¹Txhua tug txivneej hab txhua tug quaspuj kws tsi yog ntxhais nkaujxwb, muab tua povtseg huv tuabsi.”

¹²Puab txhaj coj tau plaub puas tug ntxhais nkaujxwb huv lub nroog Yanpes lug, hab coj cov ntxhais ntawd lug nyob huv lub yeej ntawm lub nroog Silaus kws nyob huv tebchaws Kana-aas.

¹³Ces cov Yixalayees kws tuaj txoos ua ke ntawd txhaj tso tuabneeg moog has rua cov Npeenyamees kws nkaum ntawm lub Pobzeb Leemoos has tas, tsi muaj kev sis tua lawm.

¹⁴Cov Npeenyamees ntawd txhaj rov lug, hab cov Yixalayees txhaj muab cov ntxhais kws puab coj huv lub nroog Yanpes lug rua cov Npeenyamees yuav ua quaspuj. Tabsis cov ntxhais ntawd tsi txhua puab hab.

¹⁵Cov Yixalayees nyuaj sab heev rua cov Npeenyamees, vim tug TSWV muab puab cais tawm ntawd txhua xeem Yixalayees lawm.

¹⁶Yog le ntawd, cov thawjcoj kws tuaj sis sau ua ke ntawd txhaj has tas, “Xeem Npeenyamees yeej tsi tshuav ib tug quaspuj seem le lawm. Peb yuav ua le caag txhaj nrhav tau quaspuj rua cov txivneej kws seem ntawd yuav?

¹⁷Peb yuav tau nrhav kev rua xeem Npeenyamees kws seem ntawd, kuas cov Yixalayees kaum ob xeem txhaj tsi muaj ib xeem twg tu caajceg,

¹⁸peb tsi muab peb tej ntxhais qua rua puab yuav, vim peb tau foom tsi zoo rua txhua tug kws muab ntxhais qua rua cov Npeenyamees yuav lawm.”

¹⁹Ces puab txawm sis thaam has tas, “Tub yuav txug caij kws peb ua kevcai txwm xyoo ua tug TSWV tsaug nyob huv lub nroog Silaus.” (Lub nroog Silaus nyob ntawm lub nroog Npethees saab qaumteb, hab ntawm lub nroog Lenpaunas saab qaabteb, hab nyob saab nubtuaj ntawm txujkev kws moog rua huv lub nroog Npethees hab lub nroog Sekhees.)

²⁰Puab txhaj has rua cov Npeenyamees has tas, “Mej ca le moog nkaum rua tom tej vaaj txiv maab,

²¹hab saib ntsoov, thaus twg cov hluas nkauj huv lub nroog Silaus tawm tuaj seev cev ua kevcai, mej ca le tawm huv vaaj txiv maab lug. Ib leeg nteg ib tug hluas nkauj hab coj nrug mej moog rua huv xeem Npeenyamees cheebtsaam aav.

²²Thaus puab txiv lossis puab tej nug tuaj cuag peb hab ywg, peb maam le has rua puab tas, ‘Thov mej ca rua puab yuav, rua qhov thaus kws taabtom sis tua peb tsi tau nteg quaspuj rua puab. Mej yeej tsi txhum, rua qhov tsi yog mej txhobtxwm qua mej tej ntxhais rua puab.’ ”

²³Ces cov Npeenyamees txawm ua le ntawd; puab ib leeg txhaj xaiv ib tug quaspuj ntawm cov hluas nkauj kws tuaj seev cev huv lub nroog Silaus, hab coj tsiv lawm. Ces puab rov qaab moog rua huv puab cheebtsaam aav, hab rov moog txhim khu puab tej qub nroog rua puab nyob.

²⁴Lub sijhawm ntawd cov Yixalayees txawm ncaim qhov chaw ntawd, nyag rov moog nrug nyag xeem, nyag tsev tuabneeg nyob hab rov moog rua huv nyag cheebtsaam aav lawm.

²⁵Lub sijhawm ntawd, cov Yixalayees tseem tsi tau muaj vaajntxwv, puab txhua tug nyag ua lawv le nyag lub sab nyam xwb.