Read Hmong Njua Cov Thawjtswj 3 Bible Online

Cov Thawjtswj 3 - Hmong Njua bible

Cov Thawjtswj 3

¹Yog le ntawd tug TSWV txhaj tseg qee tsaav tuabneeg nyob huv lub tebchaws ntawd sim cov Yixalayees kws tsi tau nrug cov Kana-aas ua rog dlua.

²Nwg ua le nuav tub yog ua qha cov Yixalayees txhua tam kuas paub txug kev ua rog, tshwjxeeb yog rua cov kws ibtxwm tsi tau ua rog dlua le xwb.

³Cov tuabneeg kws tseg rua huv lub tebchaws ntawd, nyob huv cov Filitees tsib lub nroog, cov tuabneeg ntawd yog cov Kana-aas, cov Xidoos hab cov Hivis kws nyob peg cov roob Lenpanoos, txij ndlua ntawm lub Roob Npa-aas Helemoos moog rua ntawm lub Dlawm Hamas.

⁴Puab yog cov kws yuav sim cov Yixalayees sab, saib puab puas noog tug TSWV tej lug saamfwm kws Mauxes tau qha rua puab cov yawmkoob lawm.

⁵Yog le ntawd, cov Yixalayees txhaj tau nyob xyaw cov Kana-aas, cov Hitis, cov Amaules, cov Pelixes, cov Hivis hab cov Yenpus.

⁶Cov Yixalayees tso puab tej tub tej ntxhais moog yuav cov tuabneeg ntawd tej tub tej ntxhais, hab moog pe puab tej vaajtswv.

⁷Cov Yixalayees tsi ncu qaab tug TSWV kws yog puab tug Vaajtswv lawm; puab ua txhum tug TSWV hab moog pe tej mlom Npa-aas hab Aselas.

⁸Yog le ntawd, tug TSWV chim heev rua cov Yixalayees, nwg txhaj tso puab rua Vaajntxwv Kusas Lisathayees kws kaav lub tebchaws Mexuputamias tuaj tua yeej puab. Puab txhaj raug nteg moog ua nwg qhev tau yim xyoo.

⁹Ces cov Yixalayees quaj thov tug TSWV, nwg txhaj khaiv ib tug txivneej moog tso puab dlim. Tug ntawd yog Kalej tug kwv Kenas tug tub Autheniyees.

¹⁰Tug TSWV tug Ntsujplig lug rua Autheniyees, hab nwg tau ua cov Yixalayees tug thawjcoj. Autheniyees moog ntaus rog, hab tug TSWV pub nwg tua yeej tug vaajntxwv kws kaav tebchaws Mexuputamias.

¹¹Thaus ntawd, lub tebchaws muaj kev thaajyeeb tau plaub caug xyoo, ces Autheniyees txawm tuag lawm.

¹²Cov Yixalayees rov ua txhum rua tug TSWV dlua. Vim txujkev txhum nuav tug TSWV txhaj ua rua Vaajntxwv Enkiloos kws kaav tebchaws Mau-am muaj zug tshaaj cov Yixalayees.

¹³Enkaloos koom teg nrug cov Amaules hab cov Amalej; puab txhaj tuaj tua yeej cov Yixalayees hab txeeb tau lub nroog Yelikaus kws yog lub nroog toovlaaj.

¹⁴Cov Yixalayees txhaj raug Enkaloos coj moog ua qhev tau kaum yim xyoo.

¹⁵Ces cov Yixalayees quaj thov tug TSWV, nwg txhaj khaiv ib tug txivneej moog tso puab dlim. Tug ntawd yog Ehus hab yog tug kws xis saab teg txhumphem, nwg yog Nkelas tug tub kws yog xeem Npeenyamees. Cov Yixalayees khaiv Ehus moog cuag cov Mau-am tug Vaajntxwv Enkiloos hab nqaa ib cov khoom moog pub nwg.

¹⁶Ehus ntaus tau ib raab ntaaj ob saab ntse ntev le ib tshim. Nwg muab raab ntaaj ntawd paav rua ntawm nwg saab ncej puab xis rua saab huv qaab nwg lub rig.

¹⁷Ces nwg txawm muab cov khoom ntawd pub rua Enkiloos, Enkiloos yog ib tug txivneej kws rog heev.

¹⁸Thaus Ehus muab cov khoom pub rua Enkiloos, Ehus txawm kuas cov tuabneeg kws kwv cov khoom ntawd ca le rov moog tsev.

¹⁹Tabsis Ehus txawm tig moog saib cov dluab mlom pobzeb kws nyob ze ntawm Nkilenkas hab tig hlo lug has rua Enkaloos has tas, “Vaajntxwv, kuv muaj tej lug tseemceeb yuav has rua koj.” Yog le ntawd, vaajntxwv txhaj has rua nwg cov tubkhai tas, “Mej ca le tawm moog, ca wb ob leeg nyob xwb.” Ces puab txawm tawm moog taag lawm.

²⁰Thaus vaajntxwv nyob huv nwg chaav kws txag laaj ntxag theem tsev sau. Ehus txawm txaav zog moog has rua vaajntxwv has tas, “Vaajtswv muaj lug rua kuv tuaj has rua koj.” Ces vaajntxwv txawm sawv tseeg.

²¹Ehus muab nwg saab teg txhumphem rhu hlo raab ntaaj ntawm nwg saab ncej puab xis lug tuab nkaug rua vaajntxwv plaab.

²²Nwg muab raab ntaaj hab tug ku tsij yog taagnrho rua huv vaajntxwv plaab, ces cov roj npug nkaus lub qhov nqaj rov rua lawm. Ehus yeej tsi rhu raab ntaaj taw huv vaajntxwv plaab lug le, ces tej zaub mov huv vaajnxtwv plaab tawm tshau lug tuaj.

²³Ces Ehus txawm tawm plawg rua nrau zoov, kaw nkaus qhovrooj hab muab laag kag ca,

²⁴hab nwg tsiv lawm. Cov tubkhai lug pum lub qhovrooj tseem xauv kaw nreeg, tabsis puab xaav has tas yog vaajntxwv tseem moog tawm rooj huv tsev dlej lawm xwb.

²⁵Puab tog ntev loo, tabsis vaajntxwv pheej tsi lug qheb qhovrooj le. Puab txhaj muab yumsij moog qheb hlo qhovrooj, ua caag puab tug vaajntxwv tuag xyaab leeg rua huv plaag tsev lawm xwb.

²⁶Thaus puab tog tau ntev loo ntawd, Ehus tub tsiv moog dleb heev lawm. Nwg tsiv moog hlaa pawg pobzeb kws luas txaug moog rua ntawm lub Roob Xe-iles.

²⁷Thaus nwg moog txug peg roob Efalayees, nwg txhaj tshuab raaj tshuab xyu hu cov txivneej Yixalayees tuaj moog ntaus rog; ces nwg coj puab nqeg sau roob lug.

²⁸Nwg has rua puab tas, “Mej lawv kuv qaab! Tug TSWV tub pub mej tua yeej mej cov yeebncuab kws yog cov Mau-am lawm.” Yog le ntawd, puab txhaj lawv Ehus qaab moog hab txeeb tau thaaj chaw kws cov Mau-am pheej moog hlaa tug dlej Yauladees; puab tsi pub ib tug txivneej twg hlaa moog lug le.

²⁹Nub ntawd puab tua cov Mau-am tej tubrog kws sab tawv heev tuag kwvyees le kaum txheeb leej; tsi muaj ib tug tsiv dlim le.

³⁰Txij nub ntawd lug cov Yixalayees yeej cov Mau-am hab lub tebchaws muaj kev thaajyeeb tau yim caum xyoo.

³¹Tom qaab kws Ehus tuag lawm, Anas tug tub Sankas sawv ua thawjcoj. Nwg kuj yog ib tug kws tso cov Yixalayees dlim, hab nwg muab ib tug paas lawv nyuj nkaug cov Filitees tuag rau pua leej.