Read Hmong Njua Cov Thawjtswj 4 Bible Online

Cov Thawjtswj 4 - Hmong Njua bible

Cov Thawjtswj 4

¹Tom qaab kws Ehus tuag lawm cov Yixalayees rov ua txhum rua tug TSWV dlua.

²Yog le ntawd, tug TSWV txhaj ca cov Kana-aas tug Vaajntxwv Yanpees kws kaav huv lub nroog Haxaules tuaj tua yeej puab. Yanpees tug thawj tubrog yog Xixelas, nwg nyob huv Halauses kws yog cov tuabneeg txawv tebchaws lub nroog.

³Yanpees muaj cuaj pua lub tsheb neeg hlau, hab nwg muaj lub sab phem tswjfwm cov Yixalayees hab tsimtxom puab tau neeg nkaum xyoo. Cov Yixalayees txhaj quaj thov tug TSWV paab puab.

⁴Thaus lub sijhawm ntawd, Denpaulas kws yog Lapidaus tug quaspuj, yog ib tug cev Vaajtswv lug, hab nwg ua cov Yixalayees tug thawjtswj.

⁵Nwg nyob huv qaab ib tsob toovlaaj kws nyob ntawm lub nroog Lamas hab Npethees ntu nruab nraab ntawm lub laaj roob Efalayees, hab cov Yixalayees pheej tuaj cuag nwg qhov ntawd kuas nrug tu puab tej plaub ntug.

⁶Muaj ib nub nwg txhaj tso tuabneeg moog has rua Anpinau-as tug tub Npalaj kws nyob huv lub nroog Kedes huv xeev Nathalis, hab has rua nwg has tas, “Tug TSWV kws yog cov Yixalayees tug Vaajtswv has le nuav rua koj: ‘Koj ca le coj kaum txheeb leej tubrog huv xeem Nathalis hab xeem Xenpuloos moog rua ntawm lub Roob Tanpaus.

⁷Kuv yuav coj Xixelas kws yog Yanpees tug thawj tubrog tuaj tua mej ntawm tug Dlej Kisoos. Nwg yuav coj nwg cov tsheb neeg hab cov tubrog tuaj nrug mej sis tua, tabsis kuv yuav pub kuas mej tua yeej nwg.’ ”

⁸Ces Npalaj has rua Denpaulas has tas, “Yog koj nrug kuv moog, kuv txhaj yuav moog, tabsis yog koj tsi moog, kuv yuav tsi moog.”

⁹Denpaulas teb has tas, “Kuv yeej txaus sab yuav nrug koj moog, tabsis koj yuav tsi tau ntsejmuag qhov kws koj tua yeej, rua qhov tug TSWV yuav muab Xixelas cob rua tug quaspuj teg.” Yog le ntawd, Denpaulas txhaj nrug Npalaj moog rua huv lub nroog Kedes.

¹⁰Npalaj hu xeem Xenpuloos hab xeem Nathalis moog rua huv Kedes hab kaum txheeb leej txivneej lawv nwg qaab moog rua huv. Denpaulas kuj nrug nwg moog hab.

¹¹Thaus lub sijhawm ntawd, Henpeles kws yog cov tuabneeg Kenais tau moog tsaa nwg lub tsevntaub nyob ze rua ntawm Kedes, ntawm tsob ntoo qheb huv Xananees. Nwg tau tsiv tawm ntawm cov tuabneeg Kenais kws yog Mauxes tug nug Haunpas cov xeebntxwv lawm.

¹²Thaus Xixelas paub has tas, Npalaj nce moog txug rua sau Roob Tanpaus lawm,

¹³nwg txhaj txhij taagnrho nwg cov tubrog tsaav cuaj pua lub tsheb neeg hlau nrug nwg tawm huv lub nroog Halauses kws yog cov tuabneeg txawv tebchaws lub nroog moog tog kev rua ntawm tug Dlej Kisoos.

¹⁴Ces Denpaulas has rua Npalaj has tas, “Ca le moog los mas! Tug TSWV tub ua koj ntej moog lawm! Nub nua nwg tub muab Xixelas cob rua koj teg lawm.” Yog le ntawd, Npalaj txhaj coj nwg kaum txheeb leej tubrog nqeg sau Roob Tanpaus lug.

¹⁵Thaus Npalaj taabtom nrug Xixelas cov tubrog sis tua, tug TSWV ua rua Xixelas hab taagnrho nwg cov tsheb neeg hab cov tubrog tawg tsiv ri sua. Xixelas txhaj nqeg sau nwg lub tsheb neeg lug hab tsiv moog lawm xwb.

¹⁶Npalaj txhaj caum cov tsheb neeg hab cov tubrog moog txug huv lub nroog Halauses kws yog cov tuabneeg txawv tebchaws lub nroog, hab Xixelas cov tubrog raug tua tuag taag huv tuabsi, tsi tshuav ib tug seem le.

¹⁷Xixelas tsiv moog txug ntawm Ya-ees kws yog Henpeles tug quaspuj lub tsevntaub, Henpeles yog tuabneeg Kenais, rua qhov Vaajntxwv Yanpees kws kaav lub nroog Haxaus nrug Henpeles tsev tuabneeg sis raug zoo heev.

¹⁸Ya-ees tawm tuaj tog Xixelas hab has rua nwg tas, “Lug tsev; koj ca le lug huv kuv lub tsevntaub. Tsi xob ntshai.” Yog le ntawd Xixelas txhaj moog rua huv Ya-ees tsev, Ya-ees muab Xixelas zais rua nrau dlaim ntaub thaiv qhovrais.

¹⁹Xixelas has rua Ya-ees has tas, “Kuv nqhes dlej heev, thov koj muab mivntsiv dlej rua kuv haus.” Ya-ees txhaj qheb lub naab tawv ntim mig nyuj, muab rua Xixelas haus hab rov muab Xixelas zais dlua lawm.

²⁰Ces Xixelas has rua Ya-ees has tas, “Thov koj sawv tuabywv ntawm qhovrooj tsevntaub ko, yog muaj leejtwg tuaj hab nug koj has tas, puas muaj tuabneeg tsiv lug ntawm nuav, koj teb has tas, tsi muaj.”

²¹Xixelas lim heev, nwg txawm tsaug zug looj hlas lawm. Ces Ya-ees muab rauj hab ib tug tswg tsevntaub, maam maam nyaag moog xauj Xixelas, hab nwg muab tug tswg twb nkaus ntawm Xixelas ib saab xubntsus, muab rauj npuj tshaab plawg rua huv aav ua rua Xixelas tuag kag rua ntawd.

²²Thaus Npalaj caum Xixelas tuaj txug, Ya-ees tawm moog tog Npalaj hab has rua nwg tas, “Koj ca le lug tsev! Kuv yuav qha tug txivneej kws koj nrhav rua koj.” Yog le ntawd, Npalaj txhaj nrug Ya-ees moog rua huv nwg lub tsevntaub, hab pum Xixelas tuag xyaab leeg huv aav, ib tug tswg tsevntaub ntsa nreeg nwg taubhau tshaab plawg rua huv aav.

²³Nub ntawd tug TSWV txhaj pub cov Yixalayees tua yeej Yanpees kws yog cov Kana-aas tug vaajntxwv.

²⁴Cov Yixalayees pheej nas tsaam nyaav zuj zug moog txug thaus kws puab ua rua Yanpees puamtsuaj lawm.